3
Zye zihondeeye ku vhimiilizi avha shivhanza
1 Kuli izwi ilya nalyoli kuuti, “Umuntu inga akwanza imbombo iya kuvha mwimiilizi wa shivhanza,a asungwilwe imbombo inyinza.” 2 Pe umwimiilizi akwanzilwa vhatamuyangaje imbiivhi naazimo. Avhe nu mushi wooka vhweleele. Avhe muntu we akuyishindiha, we ali nu luvhaatiho, we avhantu vhakumushindiha. Avhe muntu we mutesi ku vhajeni. Avhe amanyile kusambiilizya. 3 Atahaavhe wushimwela, atahaavhe wiivho, nalyoli avhe muntu we mutonsu. Havhili, atahaavhe mupapizi wa mpiiya. 4 Akwanzilwa ayimilililaje inyumba yaakwe ahinza, na vhaana vhaakwe vhavhe nu mushinzi nu lushindiho lwonti. 5 Inga umuntu aposiitwe kuyimililila inyumba yaakwe, angashimililila vhulivhuli ishivhanza sha Mulungu? 6 Atahaavhe muntu we ayinjiiye shiniishi mu lwitiho. Mwe kuli ahavhaliilizyo he anginza ayibaade nu kugwila mu vhutalamalandu, alongwe inza vwe uMukwalanzi woope álonziilwe. 7 Havhili, yikwanzilwa avhantu avha kunzi vhamuyanjilaje zye nyinza, inga vhatamukwinkwinaje ku zyonti pe atahagwile mu shipingo sha Mukwalanzi.
Zye zihondeeye ku vhatuuli vha shivhanza
8 Vhwevhulo avhatuuli vha shivhanzab vhakwanzilwa kuuti avhantu vhavhashindihaje. Vhatavhanje ni lenga, vhatavhanje vhe vhashimwela, havhili vhatavhanje vhapapizi vha mpiiya. 9 Vhavhanje vhantu vhe vhakulema amazwi aga lwitiho ge uMulungu átwiguliiye, vhavhanje nu mwoyo uwa kuyeefwa mu vhutalamalandu. 10 Yikwanzilwa kuvhasimishizya suuti mu mbombo, inga vhaloleha kuuti vhahondeeye pe vhahitishilwaje mu mbombo iyo iya vhutuuli. 11 Vhwevhulo avhashi vhaavho,c vhoope vhahondeeye kuuti avhantu vhavhashindihaje. Vhatavhanje vhakwakwa, nkandi vhayishindihaje. Vhavhanje vhali nu vhwanalyoli ku zyonti. 12 Umutuuli wonti uwa shivhanza avhanje nu mushi wooka vhweleele. Akwanzilwa avhimilililaje avhaana vhaakwe ahinza, pooka na vhanji vhonti avha mu nyumba yaakwe. 13 Vhaala vhe vhakuvhomba ahinza imbombo ya vhutuuli, avhantu vhakuvhashindiha havhili vhatakwogopa kuyanga zye vhitisile mwa Yeesu Chilisiti.
UMulungu atwiguliiye imbombo impinti izya Yeesu
14 Nkukusimbila ukalaata uno, she ndi nu lusuuvhilo ulwa kwinza ku kwaho shiniishi. 15 Inga nahaavha, nkwanza kuuti umanye ahinza zyonti zye zihondeeye mu vhantu vha Mulungu. Vhanaavho vhe shivhanza sha Mulungu umulanzi, ipanda nu lwalo ulwa nalyoli. 16 Uvhwanalyoli vhwe uMulungu atwiguliiye, iswe tukwitinkana kuuti vhwa kusukumizya, vhwe vhwe vhuno:
Ahaloleha ali nu muvhili,
uMupepo uMufinjile ahamulolesya kuuti ali mu vhwanalyoli.
Avhahavhizya vhahamulola.
Amazwi gaakwe ge gahalumbililwaga mu vhantu avha mu nsi zyonti,
vhahamwitiha uweene.
UMulungu ahamunyatula kusogola ku mwanya mu vhushindamu vhwakwe.