2
Zye zihondeeye kuvhomba mu shivhanza
1 Inkomeelezyo zyane izya kwanda, nkuvhalajizya kuuti mumulaavhaje uMulungu, musalifwaje ku mpuuto nu ku ndaavho zyonti ku vhantu vhonti. 2 Muvhaputilaje avhamwene na vhalongozi avhanji vhonti, kuuti tutendamaje mu vhutehamu na mu vhutehamu, inga tumulandataje uMulungu nu kuvhomba zye zihondeeye ku minso gaakwe.
3 Izyo nyinza, zye zikumuhondezya uMulungu uMuposhi wiitu. 4 Uweene akwanza avhantu vhonti vhapokwe, vhavhumanye uvhwanalyoli. 5 Tumanyile kuuti izyo zye zya nalyoli, mwe aliipo uMulungu wooka vhweleele, havhili kuli wooka we akuvhakundanya avhantu nu Mulungu, we muntu uYeesu Chilisiti. 6 Uweene áyifumiizye kuuti afwe kuvhatavhula avhantu vhonti. Shiniisho she uMulungu asimishiziizye ku havhaliilizyo he hamuhondeeye. 7 Ku vhusimishizi vhunuuvhwo, mbisiilwe kuvha ne mulumbiilizi nu mutumwa, kuzya kusambiilizya avhantu vhe te Vhayuuda vhoope vhamwitishe mu vhwanalyoli. Ganaaga ge nkuyanga ga nalyoli, te gi lenga haa!
8 Ishi, ponti pe muvhungaanile kupuuta, nkwanza avhanaavuli vhavhusyaje inyoovhe zyavho kumulaavha uMulungu ku mwoyo umwinza, shisita mulaha na madali.
9 Vhoope avhantanda, nkwanza kuuti vhavhe nu mushinzi, kuzwala amenda, kuvhe ku maata ge gahondeeye, ku luvhaatiho pa minso ga vhantu. Kuyiyemvwa kwavho kutahavhanje kutavha insisi, kuzwala amayembo ge gakunyengʼenyela, vwe vifumiiliye ni sahaabu na menda aga nsavho.a 10 Nkandi kuyiyemvwa kwavho kuvhe ku maata ga lujendo ulwinza, inza vwe zihondeeye ku vhantanda vhe vhakuyanga apazelu kuuti vhakumushindiha uMulungu.
11 Avhantanda vhakwanzilwa vhavhanje ishimwamwa ku mushinzi ahavhaliilizyo he vhakusambiilila. 12 Ntakwitiha umwantanda kusambiilizya nu kumukonzya umwanaavuli, nkandi avhanje wa kutejeelezya. 13 Mwe pe uAadamu ahataliha kupelwa, pe uEva ahalandata. 14 Havhili, te wu Aadamu áhopenkiinywe nkandi uEva we áhopenkiinywe ahavha mutalamalandu. 15 Ileelo avhantanda vhalivhwaga uvhuposhi kwi dala lya kupaapa kwavho,b inga vhakujendeelela kuvha nu lwitiho ni shikunzi, nu lujendo ulwa vhufinjile.