Ukalaata umutanzi uwa Paavhuli kwa
Tiimoti
1
UPaavhuli akumulamuha uTiimoti
1 Ukalaata uno nsimvile neene ne Paavhuli. Ine ne mutumwa wa Yeesu Chilisiti, kufumiilila mu ndajizyo zya Mulungu uMuposhi wiitu, nu Yeesu Chilisiti we lusuuvhilo lwitu. 2 Ine nkukusimbila iwe Tiimoti, we mwana waane nalyoli mu lwitiho.a
UTaata uMulungu nu Mwene wiitu uYeesu Chilisiti vhakufwilaje uvhwila, ulupepeelezyo nu kuukupa uvhutehamu.
Amasunde ku vhe vhakusambiilizya izyi lenga
3 Nkwanza kuuti usyale kunuukwo mu nkaaya iya mu Hefeeso, inza vwe nákuhomeleziizye mu havhaliilizyo he návhazile ku nsi iya Makedooniya. Nátili uvhalajizye avhantu vhatasambilizyaje insambiilizyo izyi lenga. 4 Havhili uvhavhuuzye vhaleshe ivwili vwe vitahondeeye nu kutaha amazina ga wooka wooka aga vhasookulu, vhe vháfuuye. Igo ge gakuleeta amadali, gatakuvhagomwa avhantu mu mbombo ya Mulungu ye yikufumililana nu lwitiho.
5 Naafumwa inkomeelezyo izyo kuuti avhantu vhavhe ni shikunzi. Ishikunzi shiniisho shili mu vhantu vhe amooyo gaavho gazelufile, vhe vhakuyeefwa mu vhutalamalandu, na vhe vhali nu lwitiho ulwa nalyoli. 6 Avhantu vhamo vhapuvile ku ziniizyo, nu kugalandata amazwi ge gatahondeeye. 7 Vhakwanza kuvha vhasambiilizi vha ndajizyo zya Mulungu, ileelo inongwa zye vhakuyanga nu kuhomeelezya, vhatazimanyile.
8 Tumanyile kuuti indajizyo nyinza, inga avhantu vhakuzilandata mwi dala lye lihondeeye ku minso ga Mulungu. 9 Havhili, tumanyile kuuti indajizyo zitavhisiilwe ku vhantu avhagolosu. Nkandi zikuvha ku vhantu avhapuvi vhe vhatakusaajila na ku vhantu vhe vhatakumushindiha uMulungu, na vhe vhakuvhomba uvhutalamalandu. Havhili, ku vhantu vhe vhakuviitilwa imbombo ya Mulungu nu kusungwa imbombo izya mu nsi. Ku vhantu vhe vhakugoga avhayise vhaavho na vhanyina vhaavho, na vhagozi avhanji vhonti. 10 Indajizyo ziniizyo zya vhavhembu, na vhe vhakuvhomba uluvhembu avhanaavuli ku vhanaavuli, vhe vhakuvhakazya avhazya, avhilenga na vhe vhakulapa kwi zyi lenga. Havhili ku vhanji vhonti vhe vhakuvhomba lyonti lye lili shingunga ni nsambiilizyo izya nalyoli.
11 Insambiilizyo ziniizyo zikufumiilila mwi Zwi iLyinza, lye likulolesya uvhupiti vhwa Mulungu uwa vhushindamu. We ampiiye Izwi ilyo kuuti indilumbililaje.
UMulungu akumufwila uPaavhuli uvhwila
12 Nkumusalifwa uMwene wiitu uYeesu Chilisiti, we ámpiiye amaha she ámbwenyi kuuti ne wanalyoli, ánsevile ku mbombo yaakwe. 13 Na she kwisinda ukwo nkamuligaga, nkavhayimvwaga avhantu vhaakwe nu kuvhasaamula, ileelo ahamfwila uvhwila. Nkavhombaga ziniizyo shisita kumanya, lwe nchiili kuvha nu lwitiho. 14 UMwene wiitu ahamfwila uvhwila nkaani, ahampa ulwitiho ni shikunzi kufuma ku kwakwe.
15 Kuli izwi ilya nalyoli lye likwanzilwa kulyitiha ku mwoyo wonti, kuuti, “UYeesu Chilisiti áyinzile mu nsi umu kuvhapoha avhatalamalandu.” Niine ne mutalamalandu kuluusya avhanji vhonti. 16 Ileelo uMulungu ahamfwila uvhwila kuuti uChilisiti avhalolesye uvhujimbiilizu vhwakwe vhwonti ku kwane, imbe ngati shiholanyo ku vhaala vhonti vhe vhalimwitiha, vhahavhwaje uvhulanzi uvhwa shiima shiima.
17 UMulungu wu Mwene uwa shiima shiima,
ataliifwa naalumo.
Ataliipo umuntu we angamulola uMulungu,
ataliipo umulungu uwunji naawumo.
Wuuyo weeka vhweleele we ahondeeye kuposheela ulushindiho
nu vhushindamu shiima shiima. Amina!
UPaavhuli akumusunda uTiimoti
18 Mwana waane Tiimoti, nkuukupa indajizyo izi zye zikufuma mu mazwi aga vhakuvhwi ge gáyanziilwe ku kwaho. Ugalandate amazwi igo gavhe shilwilo shaaho kulwa uvhulugu uvhwinza. 19 Ulemaje ulwitiho lwaho, nu kuvhomba zye uzimanyile kuuti zihondeeye. Mwe ziniizyo, vhamo vhatázisajiiye, pe zihaazya ulwitiho lwavho lunanjishe lwonti. 20 Muhati mu vhanaavho aliipo uHimenayo nu Alekizanda, vhe návhashimbiziziizye kunzi kwa Mukwalanzi kuuti vhasambiilile vhaleshe kuyanga ge gatahondeeye ku minso ga Mulungu.