Ukalaata uwa vhuvhili uwa Paavhuli kwa
Tiimoti
Uvhwandilo
Ukalaata uno ásimviilwe nu Paavhuli, umutumwa wa Yeesu Chilisiti (1:1-2), ámusimbiiye uTiimoti we áamile muvhomvi waakwe uwa papiipi inza she umwana waakwe (1:2-5; 2:1). UPaavhuli ásimvile ukalaata uno mwe ali mu jeela ulwa vhuvhili ku Luumi (1:16-17). Ákunziilwe lwe umwene uNelo átemile. Ahavhaliilizyo iho aVhachilisiti vhahayimvilwaga nkaani kuzya lwitiho lwavho. Havhili, uPaavhuli ahasiivhaga kuuti, ahavhaliilizyo hanaaho vhangamugoga (4:6-8). UTiimoti áamile mu nkaaya iya mu Hefeeso mu nsi iya mu Aasiya (1:18; 4:12, 19). Yikulolesya kuuti ukalaata uno ásimviilwe mu maaha aga 64-67 kufuma kupaapwa kwa Chilisiti.
Insiivho zya kusimba ukalaata uno, zyámile zya kumugomwa uTiimoti kuuti avhanje ayisengiinye kulumbiilila Izwi iLyinza ilya Yeesu Chilisiti, ayigomwaje nu kujimbiilila mu ntazyo zyonti (1:6-8, 2:3-10,24; 4:2-5). UPaavhuli ámulajiziizye uTiimoti kuuti avhavhuuzye aVhachilisiti avha ku Hefeeso vhavhe nu lujendo ulwinza. Vhalandataje ahinza insambiilizyo zye vhásambiliiye (2:14-15). Ilyamwavho, akumulajizya uTiimoti kuuti ahaanaje ku maha gonti insambiilizyo izya malenga, asambilizyaje vhwe vhwanalyoli (1:13; 4:2-5). Havhili, uPaavhuli ásungwilwe nkaani kumulola uTiimoti (1:3-4; 4:9, 21), mwe muumwo ukalaata uno akumulaavha uTiimoti asogole naluvhiilo, amutwalile inkanzu nu kalaata waakwe (4:13).