2
Kuyigomwa mwa Yeesu Chilisiti
1 Ishi leelo, we mwana waane, uvhe na maha mu vhwila vhwe tukuvhwaga mwa Yeesu Chilisiti. 2 Amazwi ge nkagayangaga pilongolela lya vhahoome avhinji, niiwe wágivuuye. Amazwi igo uvhasambiilizye avhantu avha nalyoli vhe vhahondeeye kuvhasambiilizya avhanji. 3 Ujimbililaje mu mayimba amapiti pooka niiswe, inza she umusikaali umwinza uwa Yeesu Chilisiti. 4 Ataliipo umusikaali we akuvha mu mbombo, havhili akuyinjizya mu ganji ge te ga vhusikaali. Nalyoli ahondeeye kumuhondezya usongo waakwe. 5 Havhili, umuntu we akupootana ku lutumvanyo ulwa luvhilo, inga atakulandata inkomeelezyo zye vhazivhiisile, vhatangamuzwalizya ishipambwi isha vhupooti. 6 Umulimi woope we akulima ku mute, ahondeeye kuuti avhanje wa kutaliha kutomola ivwa mu magunda. 7 Ziniizyo zye nkukuvhuuzya, uzisivhililaje kuuti uMwene akupe injeele izya kuzimanya zyonti.
8 Umukumbuhaje uYeesu Chilisiti, inza vwe ápafiilwe mu luho lwa Daavhudi,a na vwe ázyusile mu vhafwe. Ili lye Lizwi iLyinza lye nkulumbiilila, 9 lye likumbiiha kuuti njimbaje kukungwa na manyoloolo ngati ne mupuvi. Ileelo poosye, Izwi lya Mulungu litakukungwa! 10 Pe, nkujimbiilila kuli zyonti, kuuti vhe vhasavhuliilwe nu Mulungu, vhoope vhavhwaje uvhuposhi mwa Yeesu Chilisiti, nu vhushindamu vhwakwe uvhwa shiima. 11 Kuli izwi ilya nalyoli, likuti:
“Inga twafwa pooka nu Chilisiti,
tulitendama pooka nawo.
12 Inga tukujimbiilila,
tulitema pooka nawo.
Ileelo inga twamuhaana,
pe woope alituhaana.
13 Inga poosye te swe vha nalyoli,
uweene ali she wa nalyoli kuliswe,
atangayihaana.”
Umuvhomvi umwinza ku minso ga Mulungu
14 Uvhakumbusyaje avhantu igo na kuvhasoha ku minso ga Mulungu kuuti vhaleshe kudalinkana ku mazwi ge gatahondeeye. Amadali ganaago gatali nu vhwinza naavhumo, gakuvhananganya vhweleele vhe vhakugatejeelezya. 15 Iwe uyifumwaje ku mute kuyilolesya kwa Mulungu kuuti we muvhomvi umwinza. Usambilizyaje izwi ilya nalyoli vwe uMulungu akwanza, uvhe we muvhomvi we atakuvha ni nsoni.
16 Useguhaje mu mazwi aga shaaha ge gatakufuma kwa Mulungu. Lwe avhantu vhakuyinjizya umwo, zikuvhatwala ukutali nkaani nu Mulungu. 17 Insambiilizyo zyavho zikuvha ngati nkonko. Mu vhanaavho aliipo uHimenayo nu Fileto. 18 Vhanaavho vhapuvile uvhwanalyoli, vhakusambiilizya kuuti kuzyuha ku vhafwe kuhatuuha, vhakunanganya ulwitiho lwa vhanji. 19 Ileelo ulwalo ulwa Mulungu ulwa lwitiho lwe lugomu lwimiliiye, havhili lusimviilwe uvhwanalyoli vhwe vhukuti:
“UMwene avhamanyile vhe vhaakwe”b
havhili vhukuti,
“Umuntu wonti we akuyanga kuuti muntu wa Mwene,
akwanzilwa azileshe imbiivhi.”
20 Mu nyumba impiti muli iviliilo ivwa mavhiila mu mavhiila. Vimo vhagomvile ni sahaabu na vimo vwa mpiiya, havhili visugiine ku vhuvhombezi vhwa mbombo izya mushinzi. Nkandi vimo vwe vhavhinzile ku makwi, na vwe vhamasite ni vhumba, nalyoli ivwo vikuvhombelwa ku mbombo zye te zya mushinzi. 21 Vhwevhulo, inga umuntu akuyizelufwa mu vhutalamalandu uvhwo, pe aliivha shiliilo she uwa nyumba alishivhombela mu mbombo izya mushinzi. Aliivha asavhuliilwe nu Mwene na aliivha nu vhwinza ku kwakwe, kuvhomba imbombo zyonti inyinza zye zikwanzilwa.
22 Ushimbilaje impapilo imbiivhi izya vhulumendo. Uyifumwaje kulandata zye zihondeeye ku minso ga Mulungu. Havhili, uyifumwaje kuvha nu lwitiho, ishikunzi, nu vhutehamu na vhanji vhonti vhe vhakupuuta kwa Mwene ku mwoyo umwinza.c 23 Useguhaje mu madali ge gatahondeeye na ga vhwalangani, mwe pe umanyile kuuti ganaago ge gakuleeta ivho ku vhantu. 24 Umuvhomvi wa Mwene atahondeeye kuvha muntu wiivho. Ileelo avhanje mutonsu ku vhantu vhonti, amanye kusambiilizya Izwi lya Mulungu, nu kuvha mujimvi. 25 Inga avhantu vhakudalinkana nawo, avhasohaje ku vhutonsu. Lumo kuliivha ahavhaliilizyo he uMulungu alivhapa kuvhuleha uvhutalamalandu vhwavho vhwonti, vhavhumanye uvhwanalyoli. 26 Ipo pe uvhumanyi vhwavho vhulivhagalushila havhili, vhalipulumuha mu shipingo sha Mukwalanzi. Mwe vhanaavho, uMukwalanzi avhalemile nu kuvhakonzya, kumuvhombela vwe akwanza wuuyo.