Ukalaata uwa vhuvhili uwa Paavhuli kwa
Tiimoti
1
UPaavhuli akumulamuha uTiimoti
1 Ukalaata uno nsimvile neene ne Paavhuli, umutumwa wa Yeesu Chilisiti, inza vwe uMulungu akwanza. Ansonteleziizye kuuti ndumbililaje avhantu izya lufingwi ulwa vhulanzi mwa Yeesu Chilisiti. 2 Ine nkukusimbila iwe Tiimoti, mwana waane we nkukunzite. Uvhwila, ulupepeelezyo, nu vhutehamu vikufuma kwa Taata uMulungu nu Mwene wiitu uYeesu Chilisiti.
Kumulandata uChilisiti shisita nsoni
3 Nkumusalifwa uMulungu we nkumuvhombela ku mwoyo umwinza, inza vwe avhataata vhaane vhoope vhahavhombaga. Nkumusalifwa ku mbombo yaaho mwe muumwo nkukukumbuha mu mpuuto zyane umusanya nu vhusiku. 4 Nkukumbuha amansozi gaaho lwe tuhalehaanaga. Nsamvile kukulola, inga imbe nu luseshelo. 5 Nkukumbuha vwe umwitisile uMulungu ku mwoyo wonti, inza vwe unyinakulu waaho uLoyisi, nu maayi waaho uEunike vhoope vhamwitisile. Ishi indi nu vhwanalyoli kuuti vhwevhulo vwe niiwe uli.
6 Kwi izwi ilyo nkukukumbusya kuuti usonchelezyaje ishikunjilwa isho she uMulungu akupiiye, ku havhaliilizyo he nákuvhishiiye inyoovhe. 7 Mwe pe uMulungu atatupiiye umwoyo uwi lyoga, ileelo atupiiye uMupepo uwa kuutupa amaha, ishikunzi, nu kuyishindiha. 8 Pe utahaalole insoni kusimishizya kuzya Mwene wiitu uYeesu Chilisiti, havhili utalolaje insoni ku kwane mwe pe nkunziilwe ku mbombo ya kukumusya uvhwanalyoli vhwakwe. Pe niiwe ujimbiilile amayimba pooka niine kunongwa yi Zwi iLyinza, ku maha ge uMulungu ákupiiye. 9 Uweene átuposile, ahatwita kuuti tuvhe twe vhantu vhaakwe avhafinjile. Uvhuposhi vhwitu vhunuuvhwo vhutakufumiilila ni mbombo zyitu, ileelo vhukufumiilila inza vwe ahanza uMulungu wuuyo ku vhwila vhwakwe. Uvhwila vhunuuvhwo, vhwe átufwiliiye mwa Yeesu Chilisiti ku havhaliilizyo he insi yáshiili kupelwa. 10 Ishi atulanzile apazelu uvhwila vhwakwe uvhwa kwinza kwa Yeesu Chilisiti, uMuposhi wiitu. Uweene ahavhupoota uvhufwe, kwi dala lyi Zwi iLyinza, ahalolesya vwe avhantu vhalitendama shiima shiima.
11 Kunongwa iya Izwi iLyinza ilyo uMulungu anisite ine kuuti imbe ne mulumbiilizi, umutumwa nu musambiilizi. 12 Izwi ilyo lye lihambiiha kuuti amayimba aga ganaaje.a Ileelo ine ntakulola insoni, mwe imumanyile ahinza ula we nkamwitiha. Havhili indi nu vhwanalyoli kuuti ahondeeye kusunjiilila Izwi iLyinza kufiha pi siku ilya ku mpeleela. Izwi ili ampiiye inga imbasambiilizye avhantu.
13 Amazwi gonti ge ugivuuye ku kwane ga nalyoli, ugaleme. Usambiilile ganaago, shivhe shiholanyo mu lwitiho ni shikunzi she shili mwa Yeesu Chilisiti. 14 Izwi iLyinza lye uMulungu akupiiye, ulisunjililaje ku maha aga Mupepo uMufinjile, we akutendama muhati yiitu.
15 Iwe umanyile kuuti avhamwitu avha mu nsi iya Aasiya vhandesile. Mu vhanaavho aliipo uFugelo nu Helimogene. 16 Ileelo uMwene uYeesu avhafwilaje uvhwila avhantu avha mu nyumba ya Nesifolo. Mwe uNesifolo ahanavwaga ulwinji mu mayimba gaane amapiti, havhili atahalolaga insoni izya kuuti nkunziilwe na manyoloolo iga. 17 Pe lwe aafiha mu nkaaya ino iya Luumi, ákanyiiye kundondola, ahanaaga. 18 Umanyile ahinza vwe ahanavwaga mu nkaaya ya mu Hefeeso. UMwene uYeesu ahamufwile uvhwila pi siku ilya kulonga insi!