3
Amanda ga ku mpeleela
1 Iwe umanye ahinza kuuti mu manda ga ku mpeleela, kuliivha amayimba amapiti. 2 Avhantu vhaliyisajilaga vhuuvho vheeka, vhalizisungwa impiiya, vhaliyitiimaga nu kuyibaada, uku vhakuligana. Vhalileha kuvhashindiha avhapaafi vhaavho, vhalileha kusalifwa, havhili te vhahasajilaje izya Mulungu. 3 Vhaliivha shisita shikunzi, shisita kufwilana uvhwila havhili vhaliivha na miivhi. Te vhahayidindilaje, vhaliivha vhahali, te vhahasungwaje aminza, 4 vhalilonjelelanaga, te vhahasajilaje, vhaliivha na madali nkaani. Vhalivhusungwa nkaani uvhutalamalandu uvhwa mu muvhili, kuluusya kumusungwa uMulungu. 5 Vhaliloleha ngati vhakumulandata uMulungu, ileelo mu vhutendamo vhwavho vhalihaanaga amaha gaakwe. Avhantu inza vhanaavho uyefwaje naavho.
6 Vhamo vhanaavho vhalisogola kuvhendeela nu kwinjila mu nyumba zya vhantu, kuvhahopenkanya nu kuvhazyunguula injeele avhantanda avhadedevhazu vhe vhalemiilwe nu vhutalamalandu. Havhili, vhameniilwe nu lupapilo uluvhiivhi ulwa mavhiila mu mavhiila. 7 Avhantanda vhanaavho, vhakusambiilila insambiilizyo izya mavhiila mu mavhiila, ileelo vhakupootwa kuvhwaganya uvhwanalyoli. 8 Avhantu vhanaavho vhe vhakuvhahopenkanya avhantanda, vhakudindanjizya uvhwanalyoli, inza vwe uYane nu Yambule vhámudindanjiiye uMoose.a Injeele zyavho zinanjisile havhili vhaposiitwe mu zya lwitiho. 9 Ileelo vhatangaafiha naapamo, mwe avhantu vhonti vhaliyilolela uvhuwelewele vhwavho, inza vwe avhantu vháyiloleeye uvhuwelewele wa Yane nu Yambule.
UPaavhuli akumulajizya uTiimoti
10 Ileelo iwe, uhalandataga insambiilizyo zyane. Umanyile ahinza sheshiila vwe ine neneene nkutendama, pooka ni nsiivho zyane. Umanyile ni zya lwitiho lwane, uvhujimbiilizu vhwane, ishikunzi shaane, nu kuyigomwa kwane. 11 Umanyile vwe nálavile nu kuyimba, na zyonti zye zyánaazile ku nkaaya iya mu Antiokiya, mu ya Ikonio, na mu ya Lisitila vwe nájimbiliiye kuyimba ku nkaaya izyo. Poosye vhwevhulo, uMwene ahampoha muli zyonti. 12 Nalyoli, vhonti vhe vhakwanza kumusuuvhila nu kumushindiha uMulungu mwa Yeesu Chilisiti, vhoope kwe vhayimbaje. 13 Ileelo avhantu ivho avhavhiivhi na vhe vhakuhopela, kwe vhajendeelele kuvha vhavhiivhi nkaani. Vhalihopelaga, uku vhoope vhalihopelwaga.
14 Ileelo iwe amazwi ge wásambiliiye usimishiziizye kuuti ga nalyoli. Iwe shiima utendame mu mazwi ganaago, nu kugiitiha ahinza, mwe umanyile vhe vhakusambiliziizye. 15 Kufuma ku vhwana vhwaho, wámanyile ahinza uVhusimbe uVhufinjile vhwe vhungakupa kumanyinsanya, inga ufishile kuvhwaga uvhuposhi mu lwitiho lwaho mwa Yeesu Chilisiti. 16 UVhusimbe uVhufinjile vhwonti wusimviilwe mu vhulongozi vhwa Mulungu. Vhuhondeeye kusambiilizya avhantu, kuvhasoha ku vhutalamalandu vhwavho, kuvhalongozya vhaleshe uvhutalamalandu vhwavho nu kuvhalanga zyonti zye zihondeeye ku minso ga Mulungu. 17 Vhwevhulo pe umuntu wa Mulungu aliivha na maha, havhili aliipela ayisengiinye kuvhomba imbombo zyonti inyinza.