4
1 Indi ni zwi ilya kukulajizya ku minso ga Mulungu, na ku minso ga Yeesu Chilisiti we aligaluha kuvhalonga avhapuuma na vhafwe, havhili mwe kuloleha kwakwe kuliivha kwimiiliha uvhumwene vhwakwe. 2 Nkukuhomeelezya vhwevhulo, kuuti uyifumwaje kulumbiilila avhantu Izwi lya Mulungu, yivhe ku havhaliilizyo he hahondeeye na he hatahondeeye. Uvhasohaje, uvhahalapilaje ku vhupuvi vhwavho, havhili uhavhagomwaje amooyo gaavho. Izyo zyonti uzivhombaje ku vhujimbiilizu vhwonti na ku nsambiilizyo inyinza.
3 Mwe ku havhaliilizyo he hakwinza, avhantu te vhahitihaje kutejeelezya insambiilizyo izya nalyoli. Ileelo vhalisungwaga kulandata impapilo zyavho, mwe pe vhalivhavhungaaniha avhasambiilizi avhinji vhweleele, vhe vhalivhavhuzyaga amazwi aga kuvhahondezya lwe vhakutejeelezya. 4 Vhalileha kutejeelezya amazwi aga vhwanalyoli, vhaliyinjizya mu vwili ivwi lenga. 5 Ileelo iwe uvhe minso muli zyonti. Mu havhaliilizyo ha mu mayimba, ujimbaje. Ulumbililaje avhantu Izwi iLyinza, uvhombaje zyonti izinji zye zihondeeye mu mbombo yaaho.
6 Nkukuvhuuzya ziniizyo mwe ine vhakwanza kungoga imbe ngati mpuutile ya divaayia ye vhakufumwa kwa Mulungu, mwe ahavhaliilizyo haane ha kufwa hafisile. 7 Nayigomwaga kulwila amazwi aga lwitiho lwitu. Ulutumvanyo ulwa luvhilo lwe nashimbilaga, ishi naamala, nasengula insambiilizyo izya lwitiho.b 8 Ishi uMwene ambishiiye ishipambwi isha vhupooti uvhwa nalyoli. Uweene, umulonzi uwa nalyoli, alimpa ziniizyo pi siku liila lye alivhalonga avhantu vhonti ku vhwanalyoli. Te neene neeka ndaali ne ndiposheela ishipambwi, nalyoli alivhapa na vhanji vhonti vhe vhasamvile nkaani kulola kugaluha kwakwe.
Amazwi aga kulagana
9 Tiimoti, uhalambane ku mute kwinza ku kwane naluvhiilo. 10 Mwe uDema andesile mwe akuzisungwa izya mu nsi, asogooye mu nkaaya iya ku Tesaloniiki. UKilesike asogooye ku nsi iya Galaatiya, nu Tiiti asogooye ku nsi iya Dalimatiya. 11 ULuuka weeka we asyaye pooka niine ipa. Ahavhaliilizyo he ukwinza, uhinze pooka nu Maaliko, mwe ahondeeye ku mbombo yaane. 12 Námusonteleziizye uTikiiko mu nkaaya iya mu Hefeeso. 13 Lwe ukwinza, uhandeetele inkanzu yiila ye náyilesile kwa Kalipo mu nkaaya iya mu Toloa. Havhili uhandeetele na vhakalaata vhaala, inkaani avha makwembe.
14 UAlekizanda, ula we akusyana ishaaba, ámbombeeye ahavhiivhi nkaani. UMwene alimulonga ku mbombo zyakwe zye ámbombeeye.c 15 Uvhe minso nawo, vwe áamile muhali nkaani kuuti adindanjizye amazwi giitu.
16 Ku havhaliilizyo he náyimvile kwi lonjelwi ulwa kwanda, ataliipo umuntu naawumo we ánavwizye, nalyoli vhonti vhándesile. UMulungu avhaswile ku ziniizyo. 17 Ileelo uMwene áamile pooka niine, ahampa amaha. Nkalumbiilila Izwi iLyinza mu vhantu vhe te Vhayuuda, zihavhafishila vhonti vhahiivwa. Pooka na ziniizyo, ahampoha ku vhe vhánsitasile kuuti vhangoje inza kufwula ishintu mwi lomu lya nsama.d 18 Alijendeelela kumpoha mu mbiivhi zyonti zye kwe mbombelwe, kuuti amfisye kumwanya ku vhumwene vhwakwe ku vhutehamu. Aposheelaje uvhushindamu shiima shiima. Amina!
Indamuho ku Vhachilisiti avha ku Hefeeso
19 Undamushile uPulisikila nu Aakila, na vhantu avha mu nyumba ya Nesifolo. 20 UElaasito ásyaye mu nkaaya iya mu Kolinto. UTolofiimo námulesile avhinile mu nkaaya iya ku Mileeto. 21 Uvhombe ku mute kwinza uku naluvhiilo, lwe ahavhaliilizyo aha lupepu hashiili kwanda. UEbulo, pooka nu Pude, uLino, uKilaudiya, na vhamwitu avhanji vhonti mwa Yeesu vhakukulamuha.
22 UMwene uYeesu avhe pooka niiwe. Uvhwila waakwe vhuvhe pooka niimwe mwenti.