6
Zye zihondeeye ku vhazya vhe vhali mu shivhanza
1 Avhazya vhonti, vhahondeeye kuuti vhavhashindihaje avhapiti vhaavho ku mushinzi wonti, kuuti izina lya Mulungu litahinze lisaamulwe pooka ni nsambiilizyo zye tukusambiilizya. 2 Inga avhapiti vhaavho Vhachilisiti, avhazya vhatavhasufwaje, mwe pe vhajenzi vhaavho mwa Chilisiti. Nalyoli vhahondeeye kuuti vhonjezyaje kuvhavhombela ahinza, mwe vhanaavho vhe vhakulonka mu mbombo yaavho vhakuvha Vhachilisiti vhamwavho, havhili vhe vhankundwa vhaavho.
Uvhasambilizyaje avhantu vhonti mu shivhanza amazwi ganaago nu kuvhahomeelezya.
Insambiilizyo izyi lenga nu vhudumbwe uvhwa nalyoli
3 Kuli avhantu vhe vhakusambiilizya amazwi agi lenga, ge gatakwitinkana na mazwi aga vhulanzi uvhwa Mwene wiitu uYeesu Chilisiti, ni nsambiilizyo zye zikuvhalongozya avhantu kumulandata uMulungu. 4 Avhantu inza vhanaavho vhakuyibaada vhweleele, vhatazimanyile naazimo, vhakwanza kudalinkana shaaha ku mazwi aga mabaado. Uvhwo vhwe vhwandilo vhwa vhantu kuvha nu mwone, ivho, indigo, kuvhasivhiilila ahavhiivhi avhamwavho 5 nu kudalinkana na vhamwavho shiima. Avhantu inza ivho, zye vhakusiivha mbiivhi, vhatali nu vhwanalyoli. Vhakusiivha kuuti kumulandata uMulungu lye lidala lya kulyaga ilonka.
6 Nalyoli, vhonti vhe vhakumulandata uMulungu nu kutontolokwa mu mooyo gaavho ku vwe vhali navwo, vhalilyaga ilonka ipiti. 7 Lwe tuhapapwaga mu nsi umu, tutínzile nasho naashimo. Havhili, hataliipo naahamo he tulinyatula lwe tukwepa mu nsi umu. 8 Inga twavha ni vwakulya na menda, tuhatontolokwaje na viniivwo mu mooyo giitu. 9 Ileelo avhantu vhe vhakwanza kulonka ishuuma kuvha vhe vhadumbwe, vhakuyinjizya mu ndingo nu kulemwa mu mahonde na mu mpapilo inyinji izya kuvwalazya. Impapilo ziniizyo zikuvhakwesela mu vhunanjisu, vhakusilila muumwo. 10 She kusungwa impiiya, vhwe vhwandilo vhwa mbiivhi zyonti. Vhaliipo avhantu vhamo vhe vhazisungwilwe nkaani impiiya, zivhapeleeye kuuti vhaluleshe ulwitiho lwavho, vhavwalaziizye amooyo gaavho ku vhuswimiilizu nkaani.
UPaavhuli akumusoha uTiimoti
11 Ileelo we, muntu wa Mulungu, uzishimbile ziniizyo zyonti. Uzilandate ku mute zyonti izi ipa: uvhwanalyoli, ulujendo lwe luhondeeye ku minso ga Mulungu, ulwitiho, ishikunzi, uvhujimbiilizu nu vhutonsu. 12 Uyikungulaje nkaani ku vhulugu uvhwinza uvhwa kulwila ulwitiho lwitu, kuuti uhavhwaje uvhulanzi uvhwa shiima shiima. Uvhulanzi uvhwo vhwe uhiitilwa nu Mulungu, lwe wítisile ulwitiho lwaho kwa Yeesu pa minso ga vhasimishizi avhinji.
13 Nkukuhomeelezya ku minso ga Mulungu we akuvipa vwonti uvhulanzi, na ku minso ga Yeesu Chilisiti, we áfumiizye uvhwahoome uvhwinza pa minso ga Pontiyo Pilaatoa shisita lyoga, 14 uzishindihaje indajizyo ziniizyo shisita kupuvha, pe uhafishile ku manda ge uMwene wiitu uYeesu Chilisiti aliyinza havhili. 15 Kukwinza kwakwe kuliivha mu havhaliilizyo he uMulungu wuuyo ámuvhishiiye.
UMulungu uwa vhushindamu we akukonzya wuuyo weeka!
Wu Mwene wa vhamwene, havhili wu Mwene wa vhapiti.
16 Wuuyo weeka we atakufwa,
akutendama mu vhuzelu vhwe naawumo atangavhupalamila.
Ataliipo umuntu we ahamwenya, ataliipo we ahondeeye kumwenya.
Wa mushinzi, na maha aga shiima shiima! Amina!
Amasunde aga Paavhuli ku vhadumbwe
17 Uvhahomeelezye avhadumbwe mu nsi umu kuuti vhatayibaadaje, nu kuuti vhatavhiihaje ulusuuvhilo lwavho mu vintu vwe vhali navwo, she ivwa mu nsi umu vikuvha vwavho ku havhaliilizyo hansi vhweleele. Uvhahomeelezye kuuti vhavhiihaje ulusuuvhilo lwavho kwa Mulungu, we akuutupa ivintu vwonti ku vhwinji kuuti tuseshelaje navwo. 18 Havhili, uvhavhuzyaje kuuti vhavhombaje inyinza, vhavhanje vhe vhadumbwe ku nyinza. Vhavhanje nu vhwila uvhwa kuvhaavwa avhanji ku shuuma shaavho ku mwoyo wa luseshelo. 19 Vhwevhulo pe vhaliivha vhayisenguliiye ivwa havhaliilizyo he hakwinza, vwe viliivha lwalo ulwa kuvhagomwa, inga vhahavhwaje uvhulanzi uvhwa nalyoli.
Amazwi aga kulagana
20 Iwe Tiimoti, imbombo iya kuvhasambiilizya avhantu uvhwanalyoli, ye uMulungu akupiiye, uyivhombe ahinza. Utagitihaje amazwi aga mabaado ge gatakufuma kwa Mulungu. Mwe gakuyangwa kuuti ga vhusambiilile, ileelo te ga nalyoli haa, nkandi ga kunanganya uvhwanalyoli. 21 Vhaliipo avhantu vhamo vhe vhakuyibaada kuuti vhasambiilile, ileelo vhuvhateziizye, vhalesile ulwitiho ulwa nalyoli.
UMulungu avhafwilaje uvhwila imwe mwenti. Amina.