5
Inkomeelezyo ku vhantu vha shivhanza
1 Utamuhalapilaje umwanaavuli usongo, nkandi umusohaje ngati wuso waaho. Uvhasohaje avhalumendo ngati vhajenzi vhaaho, 2 avhantanda avhasongo ngati vhe vhamaayi vhaaho. Avhalindu uvhasohaje ngati vhajenzi vhaaho ku mwoyo umwinza.
UTiimoti ahomelezyaje avhantu vhavhavwaje avhaziishe
3 Avhazishe vhe vhatali na vha kuvhaavwa, vhe uvhavwaje. 4 Ileelo inga umuziishe ali na vhaana, pamo avhizikulu, vhanaavho vhasambililaje kuvhaavwa isuuti avhaziishe avha mu nyumba zyavho. Vhwevhulo vwe kwe vhavhanje ngati vhakugalusya vwe avhapaafi vhaavho vhávhavhombeeye, igo ge minza ku minso ga Mulungu. 5 Ileelo umuziishe wonti we atali na vha kumwavwa, uweene avhiisile ulusuuvhilo lwakwe kwa Mulungu weeka, akulaavha kuuti amwavwaje umusanya nu vhusiku. 6 Nalyoli umuziishe we akukumbwa izya mu nsi, uweene akuvha afuuye, na she mupuuma. 7 Uvhalajizyaje avhantu inkomeelezyo ziniizyo, kuuti vhatayangwaje imbiivhi naazimo. 8 Ileelo umuntu we atakuvhaavwa avhajenzi avha luho lwakwe inkaani avha mu nyumba yaakwe, wunuuyo akuvha aluhaanile ulwitiho lwakwe, nu kuvha muvhiivhi kuluusya avhantu vhe vhatitisile.
9 Umwantanda umuziishe we ahondeeye kusimbwa mwi kalaata ilya vhafwile we akwanzilwa kumwavwa, avhanje afisiizye amaaha sitiini, we átendiime nu mulume waakwe amanda gonti. 10 Avhanje amanyisile kuuti avhombaga imbombo inyinza, inza she kusunjiilila avhaana vhaakwe ahinza, kuposheela avhajeni, kuvhaavwa avhantu vha Mulungu ku vhutonsu,a kuvhaavwa vhe vhali mu mayimba nu kuyifumwa ku mbombo izinji zyonti inyinza.
11 Nkandi avhalindu avhaziishe utahavhasimbaje mwi kalaata ilyo. Mwe, kuliivha ahavhaliilizyo he vhangalemwa ni mpapilo izya mu mavhili gaavho, vhanganda kusungwa kusendwa havhili, kuluusya kuyifumwa kwa Chilisiti. 12 Vhangayileteelela kulongwa lwe vhakuzileha zye vhafinzile, kuuti vhaliyifumwaga nu kumuvhombela uChilisiti shisita kusendwa havhili. 13 Pooka ni zyo, vhanganda kujendanga mu nyumba zya vhantu kuzya vhuhata. Te ziniizyo zyeka haa, nkandi nu kukwakwasya, nu kuyanga zye zitahondeeye, nu kuyanga zye te nyinza. 14 Ziniizyo zye zikuleha injanje kuuti avhaziishe vhe vhalindu vhasendwaje. Vhapaapaje avhaana, nu kusunga inyumba zyavho, vhatahinze vhamupe umulugub idala ilya kutusaamula. 15 Mwe kuli avhaziishe vhamo vhateezile nu kumulandata uMukwalanzi.
16 Inga umwantanda wonti we amwitisile uChilisiti, ali na vhafwile mu nyumba yaakwe, uyo ahondeeye kuvhaavwa, kuuti vhatashisuvhalilaje ishivhanza. Pe ishivhanza shivhavwaje avhaziishe vhe vhatali na vha kuvhaavwa.
Zye zihondeeye ku vhasongo vha shivhanza
17 Avhasongo vhe vhakulongozya ishivhanza ahinza, yihondeeye kuuti avha shivhanza vhavhashindihaje nu kuuvhapa amalipilo aminza ku mbombo zyavho. Vhavhombaje vhwevhulo, inkaani ku vhaala vhe vhakuyifumwa kuvhalumbiilila avhantu Izwi lya Mulungu nu kuvhasambiilizya. 18 Mwe lisimviilwe mu Mazwi aMafinjile kuuti, “Utayipinyaje ingʼombe kwi lomu lwe yikuhanyanjila ingana kuvhulula insanga.”c Havhili, lisimviilwe lye likuti, “Umuvhomvi ahondeeye amalipilo gaakwe.”d
19 Inga usongo wa shivhanza akuyangwa kunongwa zimo, utazyitihaje lwe vhashiili kusimishizya avhantu vhavhili, poosye vhatatu. 20 Vhaala avhasongo vhe vhakuvhomba uvhutalamalandu, uvhahalapilaje pa minso ga vhantu vhonti, inga avhanji vhogopaje kuzivhomba. 21 Nkukulajizya ku minso ga Mulungu, na ku minso ga Yeesu Chilisiti, na pa minso ga vhahavhizya vhaakwe avhasavhulwa kuuti uzilandataje ziniizyo shisita kupagulanya avhantu.
22 Utahalambanaje kumuvhiishila umuntu inyoovhe kuvha wu songo. Inga umuntu uyo ali nu lujendo uluvhiivhi, pe niiwe ungavha uli pooka mu vhutalamalandu vhwakwe. Utayinjizyaje mu vhutalamalandu, nkandi uvhombaje izya nalyoli. 23 Utamwelaje aminzi geeka nkandi umwelaje ni divaayi nyinsi, mwe uli nu vhuvhinu uvhwa muhati vhwe vhukugalushila shiima.e 24 Uvhutalamalandu vhwa vhantu vhamo vhuli apazelu, vhuliloleha lwe vhashiili kufiha mwi lonjelwi, ileelo uvhutalamalandu vhwa vhanji vhuzyihiime, pe vhulivhoneha pisinda. 25 Vhwevhulo imbombo inyinza zikuloleha apazelu, na zyope zye zitali apazelu zitangazyihama.