28
UPaavhuli ku Meliita
1 Lwe twapokwa mwa sumbi, tuhamanyinsanya kuuti, insi inyuumu iyo vhakuti iMeliita. Insi iyo yáamile pahati pa sumbi. 2 Avhahaaya avha pa Meliita vhahatwavwa nkaani. Vhahatupembela umwoto uwa kwota, mwe pe kwámile impepo, havhili imvula yihatimaga. 3 UPaavhuli ahateenya inkwi, ahazivhiiha mu mwoto. Kufumiilana ni lunguula, injoha yihafuma mu nkwi izyo, yihamulumiila uPaavhuli inyoovhe. 4 Avhahaaya avha mu nsi iyo, lwe vhayilola injoha yiila yikulembeela ku nyoovhe iya Paavhuli, vhahavhuuzanya vhahati, “Yikulolesya kuuti umuntu uno mugozi! She poosye aponile mwa sumbi, umulungu wiitu ‘Uwa Nalyoli’a atamwitisile kuuti ajendeelele kulandila!” 5 Ileelo uPaavhuli ahayisanyantila injoha iyo mu mwoto, atávwalaaye naapamo. 6 Avhantu vhaala vhahasiivhaga kuuti, uPaavhuli kwe avimbe, poosye kwe agalagaate pa nsi nu kufwa. Lwe vhenyeelezya ku havhaliilizyo ahatali, vhataalola ivhiivhi naalimo lye likumwaga, vhahagalulanya insiivho zyavho, vhahanda kuuti uPaavhuli wu mulungu.
UPaavhuli akumuponia uyise uwa mupiti uwa ku Meliita
7 Pe twámile ipo, páali pe papiipi na magunda aga mupiti uwa nsi iyo, ye yáamile pahati pa sumbi. Izina lyakwe umupiti uyo vhahatinji uPabuliyo. Ahatuposheela ahinza, tuhadiila insiku zitatu ku kwakwe. 8 Ahavhaliilizyo iho, uyise uwa Pabuliyo ákaasite pa shilili, mwe pe ávhinile inzegema nu kuhaalisya amavhanda. UPaavhuli ahinjila muhati mwe umuvhinu áamile. Ahamulaavhila kwa Mulungu, ahamuvhiishila inyoovhe pamwanya pa kwakwe, ahamuponia. 9 Lwe amuponia umuntu uyo, pe avhavhinu avhanji vhonti mu nkaaya iyo, vhahinza kwa Paavhuli, woope ahavhaponia. 10 Avhantu avha paala vhahatushindiha nkaani. Lwe tukuyisengaanya kwepa ni meeli iyinji, vhahatupashiilila ivintu vwonti vwe twásovheliilwe.
UPaavhuli akufiha ku nkaaya iya Luumi
11 Lwe twamala ameezi gatatu mu nkaaya iyo, tuheepa ni meeli yimo iya mu nkaaya iya Alekizandeliya. Imeeli iyo yihagulililaga kuuti ahavhaliilizyo aha lupepu hasile. Izina lyakwe vhahatinji, aVhalungu vhe Mapasa. 12 Pisinda, tuhafiha mu nkaaya iya Silakuusa. Tuhadiila insiku zitatu muumwo. 13 Kufuma ipo tuhazyunguulab tuhafiha mu nkaaya iya Leegiyo. Lwe kwasha, inkungu yihavugula kufuma ku luvhazu ulwa ku ntende. Inkungu iyo yihatwavwa, indaavhi yaakwe tuhafiha mu nkaaya iya Puteyooli. 14 Umwo tuhahomaana na Vhachilisiti avhamwitu, vhahatulambiilizya kuuti tutendame navho insiku saba. Isho, vwe twáfisile mu nkaaya iya Luumi. 15 AVhachilisiti avhamwitu avha ku Luumi vhahiivwa kuuti tuli mwi dala kusogola ku kwavho. Pe vhahinza kutuposheela, vhamo vhahatuguliilila pa nsokoni ye vhahatinji iAapiyo, avhamwavho pe vhahatinji iNyumba Zitatu izya Vhajeni. Lwe uPaavhuli avhalola, ahamusalifwa uMulungu, ahagoma umwoyo.
16 Lwe twafiha mu nkaaya iya Luumi, uPaavhuli ahitishilwa kuuti atendamaje weeka, vhahavhiiha umusikaali uwa kumuguliilila.
17 Lwe twamala insiku zitatu, uPaavhuli ahavhiita avhapiti avha Vhayuuda avha paala. Lwe vhavhungaana, ahavhavhuuzya ahati, “Mwe vhamwitu, pooka nu kuuti ntávhomvile ivhiivhi naalimo ku vhajenzi vhiitu, poosye kuzya maata ge avhasookulu vhiitu vhátulesheeye, aVhayuuda vhándemile mu Yelusaleemu nu kumbiiha mu nyoovhe izya Vhaluumi. 18 AVhaluumi ivho lwe vhambuziilizya ahinza, vhahanza kunsatula, mwe pe vhatahalola ivhiivhi naalimo lye návhomvile, lye nkanzilwaga kufwa. 19 Ileelo aVhayuuda vhamo vhahahaana kuuti insatulwe. Pe nkapootwa ilya kuvhomba, nkalaavha kuuti umulandu waane wulongwe nu Kayisaali, pooka nu kuuti ntáali naalimo ilya kuvhalonjeela aVhayuuda avhamwitu. 20 Pe ishi, imbiisite mwinze tulolane nu kuyanga niimwe. Inkunziilwe na manyoloolo iga, kuzya lusuuvhilo luula lwe aVhaisilayeeli vhonti vhakulusuuvhila.”c
21 Pe avhapiti ivho, vhahamwamula uPaavhuli vhahati, “Iswe tutali nu kalaata we tuposheleeye kufuma ku Yudeeya we akupanga inongwa zyaho. Havhili ataliipo uwamwitu nuumo we ayinzile ipa kufuma ukwo, nu kuyanga imbiivhi zimo ku zyaho. 22 Ileelo tukwanza kwivwa kuli iwe zye ukusiivha, mwe pe kuzya mpuga ye ukuyilandata, tumanyile kuuti yikuyangwa havhiivhi kwonti.”
23 Pe vhahitinkana nu Paavhuli isiku ilya kuvhungaana mu nyumba ye ahatendamaga. Isiku ilyo lwe lyafiha, aVhayuuda vhahavhungaana ku vhwinji kuluusya isiku ilya pisinda. UPaavhuli ahavhapanjila inongwa inyinji kufuma inzanshi kufishila hamazuuvha. Ahavhalumbililaga inongwa izya vhumwene uvhwa Mulungu. Ahavhasinjilizyaga kuuti vhoope vhamwitishe uYeesu, ahavhombaga vhwevhulo kwi dala ilya kuvhalolesya amazwi ge gakupanga inongwa zyakwe mu ndajizyo izya Moose, na mu makalaata aga vhakuvhwi. 24 Vhamo vhahiitiha kuuti amazwi ge uPaavhuli akuyanga ga nalyoli, ileelo vhamo vhahahaana. 25 Lwe aVhayuuda vhaaga vhatakwivwana vhuuvho vheeka ku mazwi ge uPaavhuli ahayangaga, vhaheepa. Lwe vhashiili kwepa, uPaavhuli ahavhavhuuzya ahati, “UMupepo uMufinjile áyanzile izya nalyoli, kuvhavhuuzya avhasookulu vhiinyu kutuushila kwa mukuvhwi uYisaayi kuuti,
26 ‘Sogoola ku vhantu ivha, uvhavhuuzye uti,
“Nalyoli muliyiivwaga, ileelo te muhamanyinsanyaaje.
Nalyoli mulilolaga, ileelo te muhazisinkamizyaje.
27 Avhantu ivha amooyo gaavho magomu,
na makutwi gaavho gatakwivwa,
na minso gaavho vhasinziliiye.
Inga te she shiyo, aminso gaavho nkandi gakulola,
na makutwi gaavho nkandi gakwivwa,
havhili nkandi vhakumanyinsanya ku nsiivho zyavho,
pe vhagalulanye insiivho izyo inga imbaponie.”’d”
28 UPaavhuli ahajendeelela kuyanga, ahati, “Ishi, mumanye ahinza kuuti, uvhuposhi uvhu we wufumile kwa Mulungu, avhutwaye na ku vhantu avha nsi izinji, vhoope kwe vhavhuposheele.” 29 Lwe uPaavhuli aamala kuyanga amazwi igo, aVhayuuda vhaala vhaheepa uku vhakudalinkana nkaani vhuuvho vheeka.e