27
Vhakumutwala uPaavhuli mu nkaaya iya ku Luumi
1 Indajizyo zihafuma kuuti tushuule ni meeli kusogola mu nsi iya Itaaliya. Pe vhahamuvhiiha uPaavhuli na vhakungwa avhanji kwa mwimiilizi wumo uwa vhasikaali. Umwimiilizi uyo izina lyakwe vhahatinji uYuuliyo. Uweene áali mupiti uwa mpuga iya vhasikaali iya mupiti uKayisaali. 2 Pe tuhinjila mu meeli yimo ye yikufuma ku Adalamitiyo. Avhantu avha meeli iyo vhásivhiliiye kushuula nu kwimiilila mu nkaaya zimo izya mu luvhazu mwa sumbi mu mukowa uwa Aasiya. Tuhanda kushuula, twámile pooka nu Alisitaaliko uwa mu nkaaya iya Tesaloniiki mu mukowa uwa Makedooniya.
3 Lwe kwasha, tuhafiha pa nkaaya iya mu luvhazu mwa sumbi mu Siidoni. UYuuliyo ahamuvhombela ahinza uPaavhuli, ahamwitishizya kuuti alolane na vhamanyani vhaakwe, inga vhamwavwe vwe asovheliilwe. 4 Lwe tukwepa ipo, inkungu yihavugulaga ku maha kwilongolela lyitu. Pe tuhatuuha ku vhutukulo mu nsi iya Kiipulo ye yáamile pahati pa sumbi, inga insi yitudinde tutahabunshilwe ni nkungu inyinji iyo. 5 Tuhalamba usumbi uyo kutuushila ku luvhazu ulwa mukowa uwa Kiliikiya nu wa Pamufiiliya, tuhafiha mu nkaaya iya Miila mu nsi iya Liikiya. 6 Ipo, umupiti uwa vhasikaali ahayaaga imeeli ye yikufuma mu nkaaya iya Alekizandeliya. Imeeli iyo yihasogolaga ku nsi iya Itaaliya, tuhalimbila twenti muumwo.
7 Tuhadiila insiku inyinji mu meeli iyo she tukushuula hansi hansi, tuhapalamila mu nkaaya iya Niido ku mayimba. Ipo yihafumila inkungu inyinji, yihatudinda kutuuha pe páhondeeye kuuti tungatuuha. Pe tuhatuuha uluvhazu ulwa ku vhutukulo mu nsi iya Kileete. Insi iyo yihayidinda inkungu iyo ye yihavugulaga. Tuhalungamana ni nsi inyuumu iya mu Kileete ye vhahatinji iSaalumooni. Insi iyo yásonsosheeye mwa sumbi. 8 Tuhatuuha mwa sumbi mu luvhazu ulwa nsi iyo ku mayimba, tuhafiha pe vhakuti “Pa Nkaaya iNyinza iya mu Luvhazu mwa Sumbi.” Inkaaya iyo yáali papiipi ni nkaaya iya Laseeya.
9 Kufishila ipo, twápezile twashuula insiku inyinji, poosye ni Shikulukuulu isha Kuyiima Kulyaa shápezile shatuuha. Pe yihaloleha kuuti inga twajendeelela nu vhulendo, kwe tuyimbe nkaani, mwe pe háamile havhaliilizyo aha nkungu inyinji kwanda kuvugula. Pe uPaavhuli ahavhasoha avhamwavho ahati, 10 “Vhamwitu, naalola kuuti uvhulendo vhwitu uvhu kuuti vhuvhe vhwa mayimba nu kuteezya ivintu ivwinji. Imeeli ino pooka na mazigo gaakwe iga, kwe visilile mwa sumbi. Havhili na muli iswe, vhaliipo vhamo vhe vhangaafwa.” 11 Ileelo umwimiilizi uwa vhasikaali ahagasuufwa amasunde aga Paavhuli, ahagashindiha amazwi aga wuula we ahajenzyaga imeeli, na ga muhaata meeli. 12 Sháali shigomu kutendama pa nkaaya yiila ahavhaliilizyo aha lupepu. Pe avhantu avhinji mu meeli iyo vhahitinkana kuuti vheepe paala. Vhahasiivha kufiha mu nkaaya iya mu luvhazu mwa sumbi ye vhahatinji iFoyiniika. Inkaaya iyo yáamile mu Kileete. Ukwo vhahanzaga tutendame ahavhaliilizyo aha lupepu iho. Inkaaya iyo iya Foyiniika yényiizye uluvhazu ulwa ku vhuswelo.
Umuyuvhayuvha mwa sumbi
13 Inkungu yihataliha kuvugula hansi hansi kufuma uluvhazu ulwa ku ntende, vhahasiivha kuuti zye vhítinkiine zyalunjiha. Pe vhahazuvwa ishintu ishimwamu isha kwimilisizya imeeli,b vhaheepa paala, vhahashuula kutuushila mu luvhazu mu Kileete. 14 Lwe ahavhaliilizyo hansi vhweleele hatuuha, kuhafumila inkungu impiti nkaani, ye vhahatinji iEwulakilo. 15 Yihayihoma imeeli ku maha. Tuhapootwa kuyilongola kuyitwala kwe inkungu yihafumaga, pe tuhaleha kutumvanya ni nkungu iyo, yoope yihatubunshila kututwala pahati pa sumbi.
16 Tuhatuuha ku luvhazu ulwa ku ntende ku nsi inyinsi ye yáamile pahati pa sumbi ye vhahatinji iKawuda. Insi iyo yihayidinda inkungu inyinji ye yihavugulaga. Pe yihatwavwa, tuhavhwezya kulyinjizya nu kulipinya mu meeli ivhooti lye imeeli yihalikwesaga kwisinda. Ileelo twávhomvile vhwevhulo ku mayimba nkaani. 17 Lwe twalyinjizya ivhooti mu meeli, avhavhomba mbombo avha mu minzi vhahapinyiila imeeli ni nkusa, inga yitahavunzishe. Vhógofile kuuti kuli ahavhaliilizyo he vhangalimbiila mu lusenga ulwa mwa sumbi uwa ku nsi iya Liibiya. Pe vhahiisya ishintu ishimwamu isha kuyivhiiha imeeli yitashimbilaje nkaani, vhahayileha yijendaje ni nkungu. 18 Lwe kwasha, avhavhomba mbombo ivho vhahanda kusumbila amazigo mwa sumbi, mwe pe amavhilingwa gahabunshilaga nkaani imeeli yiitu. 19 Isiku ilya vhutatu vhahanda kusumba vhuuvho iviliilo vimo ivwa mu meeli. 20 Zihatuuha insiku inyinji, she izuvha ni nzota vitakuloleha, inkungu yihajendeelela kuvugula nkaani, pe tuhasiivha kuuti te tupone.
21 Ahavhaliilizyo iho, vhápezile vhaamala insiku inyinji mwa sumbi muula ishisita kulya naashimo. Pe uPaavhuli ahimiilila pahati yaavho, ahavhavhuuzya ahati, “Mwe vhanaavuli, ahavhaliilizyo he nkavhasohaga kuuti tutaheepe ku Kileete, mwánziwiilwe kuntejeelezya. Inga muntejelezyaje, amayimba iga gataamile gatwagaje, poosye ivintu vwinyu vitaamile vinanjihaje inza vhwevhulo. 22 Ileelo ishi, nkuvhalaavha kuuti muyigomwe amooyo. Ataliipo inga wooka muli imwe we kuuti afwe, nkandi ye meeli yeeka ye kwe yidwivhe. 23 Ine ne muntu wa Mulungu, havhili ne muvhomvi waakwe. Ileelo uvhusiku uhavhizya waakwe amfumiiye. 24 Ambuziizye atili, ‘Utogopaje Paavhuli! Ukwanzilwa kwimiilila pilongolela ilya Kayisaali. Umanye ahinza kuuti vhonti ivha vhe mukushuula pooka navho, ku zyaho, uMulungu kwe avhaposhe ku vhwila vhwakwe.’ 25 Ishi vhanaavuli, muyigomwe amooyo, ine nkumwitiha uMulungu, kuuti kwe zivhombeshe inza vwe ambuziizye. 26 Ileelo, inkungu kwe yitusumbile pa nkaaya yimo ye yili pahati pa sumbi.”
UPaavhuli na vhamwavho vhakupokwa mwa sumbi
27 Ahavhaliilizyo iho, twápezile twadiila insiku kumi na ine she tukubunshilwa ni nkungu inyinji iyo ye yihavugulaga uku nuukwo mwa sumbi uwa Adiliya. Lwe pavha pe pa vhusiku pahati isiku liniilyo ilya kumi na ine, avhavhomba mbombo avha mu minzi vhahasiivha kuuti pamo vhapalamila mu luvhazu mu nsi inyuumu. 28 Pe vhahiisya ishilinjilo mu minzi, vhahaaga kufiha pansi kuli uvhwivhizu uwa miita alubaayini. Lwe vhasejeelela pilongolela hansi, vhahiisya havhili ishilinjilo shiila, vhahaaga kufiha pansi kuli imiita selasiini. 29 Vhahoogopa kuuti imeeli kwe yikuntile mu mavhwe, vhahiisya ivwa kwimilisizya vine mu minzi vwe vwámile kwisinda ku meeli. Vhahalaavhaga kuuti kushe luvhilo.
30 Avhavhomba mbombo avha mu minzi vhahanzaga kuvhembeeluha mu meeli. Vhahanda kwisya ivhooti ilya kuvhapoha avhantu mu minzi, vhahavha ngati vhakwanza kwisya ivwa kwimilisizya imeeli ku luvhazu ulwa kwilongolela. 31 Ileelo uPaavhuli ahamuvhuuzya umupiti uwa vhasikaali, pooka na vhasikaali vhaakwe ahati, “Avhavhomba mbombo ivha, inga vhatakusyala pooka niiswe mu meeli ino, imwe te mupone.” 32 Pe avhasikaali vhaala vhahadumula inkusa zye zyálemeleeye ivhooti liila, vhahalileha kuuti ligwile mwa sumbi.
33 Lwe kwapalamila kusha, uPaavhuli ahavhalambiilizya avhantu vhonti kuuti vhalye ishaakulya. Ahati, “Ileelo ili mwamala insiku kumi na ine she mukwogopa, havhili she mutaliiye naashimo. 34 Ishi nkuvhalaavha kuuti mulye, inga mujendeelele kuvha mwe vhapuuma. Ataliipo inga wooka we kwe afwe poosye kuvwalala.”
35 Lwe uPaavhuli aamala kuyanga izyo, ahanyatula ikaati, ahamusalifwa uMulungu pilongolela ilya vhantu vhonti vhaala, ahamensula, ahataliha kulya. 36 Pe vhonti vhahayigomwa amooyo, vhahataliha kulya. 37 Uvhwinji vhwitu twenti mu meeli yiila, twámile miya mbiili sabiini na sita. 38 Lwe vhonti vhaalya ishaakulya isha kuvhakwila, vhahasumba ingana mwa sumbi, inga imeeli yipupuushe.
39 Lwe kwasha, avhavhomba mbombo avha mu minzi vhahayilola insi, ileelo vhatámanyile kuuti insi vhuli. Insi iyo yáamile nu lusenga mu luvhazu mwa sumbi. Havhili vhahalola pamo pe aminzi aga mwa sumbi gasonsosheeye mu nsi iyo. Vhahasiivha kuuti inga vhangavhwezya, vhayileshe imeeli yinjile mu nsi inyuumu umwo. 40 Pe vhahadumula inkusa zye zyálemeleeye ivwa kwimilisizya imeeli, vhahavidwivwa mu minzi. Vhahasatula inkusa zye zyápinyile ahasyetulilo aha kuyilongozya. Pe vhahazuvwa umwenda umunsi uwa kujenzezyac uwa kwilongolela, inga inkungu yiyibunshiilile imeeli pa nsi inyuumu. 41 Ileelo imeeli yihafiha pilongolela pe avhasumbi vhavhili vhahomiine. Ishipulo shaakwe isha kwilongolela shihinjila ku maha mu lusenga lwe lwámile mu minzi, shihalimbiila muumwo. Ishipulo shaakwe isha kwisinda shihahomwa ku maha na mavhilingwa, shihavunzinkana.
42 Pe avhasikaali vhe vháamile mu meeli vhahapanzanya kuuti, vhavhagoje avhakungwa vhonti, inga patahaavhe inga wooka we angavhembeeluha kwi dala ilya kusavha. 43 Ileelo mwe pe umwimiilizi uwa vhasikaali ahanzaga kumupoha uPaavhuli, ahavhahaana. Ahavhalajizya ahati vhonti vhe vhamanyile kusavha vhadomoshele mu minzi, inga vhalambiile ku nsi inyuumu. 44 Vhe vhasyala vhanyatule imbaavho, poosye ivintu ivinji ivwa meeli, vwe vhalambile. Shiniisho vwe swenti tuhafumiila she twe vhapuuma.