26
1 Pe uAgiliipa ahamuvhuuzya uPaavhuli ahati, “Ishi yangaaga leelo izya kuyipoha.” Pe uPaavhuli ahavhuusya inyoovhe yaakwe inga vhamutejeelezye, ahanda kuyanga izya kuyipoha. Ahati, 2 “We mwene Agiliipa, nkuyilola kuuti indi nu vhulootwe, mwe pe ileelo ili inimiliiye pilongolela lyaho kuyanga izya kuyipoha ku zyonti zye aVhayuuda vhandonjeleeye. 3 Nkuyanga vhwevhulo, inkaani mwe pe imanyile kuuti iwe ugamanyile ahinza amaata gonti aga Vhayuuda na zyonti zye vhakudalinkana. Ishi nalamba nkaani untejeelezye ku vhujimbiilizu zye nkuyanga.
4 AVhayuuda vhonti vhamanyile ahinza nkaani vwe nkatendamaga kufuma ku vhwana waane mu vhantu avha mu nsi yaane mu nkaaya iya Yelusaleemu. 5 Vhamanyile imbombo yaane ku havhaliilizyo ahatali. Inga vhakwanza, vhangasimishizya kuuti, nalyoli náamile mu mpuga iya Vhafalisaayi. Avhantu avha mu mpuga ino vhakulandata indajizyo izya Mulungu kuluusya avhanji vhonti. 6 Ishi ine inimiliiye ipa kulongwa, mwe pe nkusuuvhila kuuti uMulungu alilunjisya ulufingwi lwe áfinzile ku vhasookulu vhiitu kuuti alivhazyusya avhafwe. 7 Ulufingwi ulwo lwe avhantu vhonti avha nsi yiitu, inkolo kumi na mbiili, vhakusuuvhila kuuti vhalilufishila. Pe vhakumupuuta uMulungu uvhusiku nu musanya. We mwene, ulusuuvhilo ulwo lwe aVhayuuda vhakundonjeela ileelo ili! 8 Shooni she imwe mukulola shigomu kwitiha kuuti uMulungu alivhazyusya avhafwe?
9 Poosye ine neneene nkalolaga kuuti nkwanzilwa kuvhomba lyonti kumudinda uYeesu uwa ku Nazaleeti. 10 Izyo zye nkavhombaga ku Yelusaleemu. Ukwo avhapiti avha vhapuuti vhámpiiye amaha aga kuvhakunga avhalandati avha Yeesu mu jeela. Nkavhakunga avhafinjile avhinji mu jeela. Havhili vhamo lwe vhakulongwa, niine nkahomaga ikuula iya kwitiha kuuvhapa isunde ilya kuvhagoga. 11 Ulwinji vhuulo nkavhavhiihaga kuuti vhasundwe mu masinagoogi, inga vhamuhaane uYeesu. Umulaha waane wáamile mupiti, nkavhayimvwaga nkaani, poosye na vha mu nkaaya izya kutali.”
UPaavhuli akulovhoosya vwe ámwitisile uYeesu
12 UPaavhuli ahajendeelela kuyanga kuuti, “Isiku limo náamile mwi dala, nkasogolaga kuvhayimvwa avhalandati avha Yeesu mu nkaaya iya Damaasiki. Avhapiti avha vhapuuti vhámpiiye indajizyo na maha aga kuvhomba vhwevhulo. 13 We mwene, lwe indi mwi dala ilyo, mu havhaliilizyo aha vhushenzelo, nkalola uvhuzelu uvhupiti kufuma ku mwanya. Vhwálamile kuluusya uvhuzelu uvhwa izuvha, vhuhatulamila imbazu zyonti, ine na vhamwitu vhe tuhashuulaga pooka navho. 14 Swenti tuhagwa pansi. Ine nkiivwa izwi likumbuuzya mu njango yiitu iya Shihebuuli kuuti, ‘Saavhuli! Saavhuli! Shooni she ukunjimvwa? Ukuyivwalazya umwenzo vhuulo inza indogomi ye yikupana indiisa iya mudiimi waakwe.’
15 Pe ine nkavhuziilizya nkati, ‘We naanu iwe Mwene?’ Woope ahanaamula ahati, ‘Ine ne Yeesu, ne iwe ukunjimvwa. 16 Ishi vhuuha, yimiliila! Zye zimbiisile kuuti inkuloleshele zye zino: Nkwanza kuuti inkuvhiishe uvhe we muvhomvi havhili we hoome waane. Uvhasimishizyaje avhantu avhanji zye wazilola ileelo ili na ziila zye inshiili kukulolesya. 17 Ndikupohaga mu Vhayuuda avhamwinyu, na mu vhantu vhe te Vhayuuda. Ivho vhe kuuti nkusonteelezye ku kwavho, 18 uvhiigule aminso gaavho, vheepe mu hiisi na mu maha aga Mukwalanzi, vhinjile mu vhuzelu uvhwa Mulungu. Ipo pe vhaliswilwa uvhutalamalandu vhwavho, havhili vhaliivha pooka na vhanji vhonti vhe vhavhisiilwe kuvha vhafinjile kwi dala ilya kuniitiha ine.’”
UPaavhuli akulovhoosya izya kulumbiilila kwakwe
19 UPaavhuli ahajendeelela kuyanga kuuti, “We mwene Agiliipa, lwe naalola injozi izyo izya pa minso amazelu zye zyáfumile ku mwanya, ntahazisuufwa. 20 Nkandi nkanda kulumbiilila avhantu avha mu Damaasiki suuti, kuuti vhatonte imbiivhi zyavho, vhamulandate uMulungu nu kuvhomba zye zikulolesya kuuti vhapindusile mu mooyo gaavho. Pisinda, nkalumbiilila amazwi ganaago na ku vhantu avha mu Yelusaleemu na vha mu nsi yonti iya mu Yudeeya na ku vhantu vhe te Vhayuuda. 21 Izyo zye zihanaazya, aVhayuuda vhahandema lwe vhanaaga mu Nyumba iMfinjile, vhahanza kungoga. 22 Ileelo mwe pe uMulungu anavwizye kufishila isiku ilya ileelo ili, inimiliiye pilongolela ilya vhapiti na vhansi, kufumwa uvhusimishizi. Gataliipo amazwi aganji ge nkuyanga, nkandi ge gaala ge avhakuvhwi nu Moose vháyanzile, kuuti galifumila. 23 Vhonti ivho vháyanzile kuuti uChilisiti aliyimba, havhili aliivha mutanzi kuzyuha, inga amanyisye inongwa izya vhuzelu uvhwa vhuposhi ku Vhayuuda, na ku vhantu vhe te Vhayuuda.”
24 Lwe uPaavhuli akujendeelela kuyanga izya kuyipoha, uFeesito ahayanga kwi izwi ipiti ahati, “We Paavhuli! Uli ni shipena! Kusambiilila kwaho nkaani kwakuteezya injeele!” 25 Ileelo uPaavhuli ahamwamula ahati, “We Feesito, uwa mushinzi nkaani, ine ntali ni shipena. Amazwi ge nkuyanga iga ga nalyoli, havhili ga njeele zyonti. 26 Umwene uAgiliipa woope azimanyile ahinza. Nkusimishizya kuuti zitaliipo naazimo zye zihamutuuha, mwe pe zihavhombehaga apazelu. Ye nongwa nkuyanga nawo izi ku vhudandamazu. 27 Mwene Agiliipa, vhuli, ukwitiha zyonti zye avhakuvhwi vhayanzile? Ine imanyile ahinza kuuti ukuzyitiha.” 28 Pe uAgiliipa ahamuvhuuzya uPaavhuli ahati, “Vhuli, ukusiivha kuuti ungampindula imbe ne Muchilisiti ku mazwi amansi iga?” 29 UPaavhuli ahamwamula ahati, “Yivhe ku mazwi amansi, poosye ku minji, ntakulaavhila weneewe weeka vhweleele, nkandi nkuvhalaavhila na vhanji vhonti vhe vhakuntejeelezya ileelo ili, kuuti vhavhe inza ine vwe indi, ileelo ishisita kukungwa na manyoloolo iga.”
30 Pe umwene uAgiliipa pooka nu mupiti uwa mukowa uFeesito nu Beleniike na vhanji vhe vhátendiime pooka navho vhahimiilila. 31 Lwe vheepa ipo, vhahavhuuzanya vhahati, “Umuntu uno atavhomvile naalimo lye lihondeeye kuumupa isunde ilya kumugoga, poosye ilya kukungwa.” 32 UAgiliipa ahamuvhuuzya uFeesito ahati, “Umuntu uno inga ataalaavile kuuti inongwa yaakwe yivhale yilongwe kwa Kayisaali, aamile asatulwaje.”