22
1 Ahati, “Mwe vhamwitu pooka na vhataata vhaane, tejeelezyi! Ishi nkuyanga izya kuyipoha pilongolela lyinyu.” 2 Lwe vhiivwa uPaavhuli akuyanga ku njango yaavho iya Shihebuuli, vhahapuuma nkaani kuluusya ulwa kwanda. Woope ahajendeelela kuyanga kuuti, 3 “Ine ne Muyuuda, nápafiilwe mu Taaso, mu mukowa uwa Kiliikiya. Ileelo nkuliiye pa Yelusaleemu panaapa. UGamaliyeeli we ansambiliziizye indajizyo zyonti zye avhasookulu vhiitu vhátulesheeye. Nkayikungulaga kwa Mulungu ku mute wonti, inza imwe vwe mukuyikungula ileelo ili.
4 Nkavhayimvwaga nu kuvhagoga avhalandati avha Mwene uYeesu, nkavhalemaga avhanaavuli na vhantanda nu kuvhakunga mu jeela. 5 Umupuuti umupiti pooka na vhasongo avhamwavho vhonti avha mu lukuvhato lwinyu ulwa vhalongozi, vhangasimishizya kuuti zye nkuvhavhuuzya zya nalyoli. Avheene vhámpiiye avhakalaata inga imbatwalile aVhayuuda avhamwitu vhe vhakutendama mu nkaaya iya mu Damaasiki. Nkasogola ukwo, inga imbakunje avhantu vhe vhakumulandata uMwene uYeesu, nu kuvhaleeta ku Yelusaleemu, inga vhavhape isunde.
6 Lwe indi mwi dalaa napalamila kufiha mu Damaasiki, mu saala sita iya musanya ishi, naluvhiilo uvhuzelu uvhuhali kufuma ku mwanya vhuhahozya nkaani imbazu zyonti. 7 Nkagwa pansi, nkiivwa izwi likumbuziilizya likuti, ‘Saavhuli! Saavhuli! Shooni she ukunjimvwa?’ 8 Nkavhuziilizya nkati, ‘We naanu iwe Mwene?’ Lyope lihamwamula lihati, ‘Ine ne Yeesu uwa ku Nazaleeti, ne iwe ukunjimvwa.’ 9 Avhamwitu vhe twáli pooka navho vhávhuvhwenyi uvhuzelu vhuula, ileelo vhatályivuuye izwi ilya wuula we ahayangaga niine. 10 Pe nkavhuziilizya nkati, ‘Inkonzye vhuli Mwene?’ Ahanaamula ahati, ‘Ishi yimiliila! Usogole mu Damaasiki, umwo muli umuntu we kuuti akuvhuuzye zyonti zye ukwanzilwa kuvhomba.’ 11 Kulandatana nu vhuhali uvhwa vhuzelu vhuula, aminso gatahalolaga. Pe avhamwitu vhahandema inyoovhe nu kundongola mu Damaasiki.
12 Mu nkaaya iyo mwámile umuntu wumo, we izina lyakwe vhahatinji uAnaniiya. Uweene ahamushindihaga uMulungu, havhili ázilemile nkaani indajizyo zyitu. AVhayuuda vhonti vhe vhahatendamaga umwo vhahamuyanjilaga inyinza. 13 Ahinza ahimiilila pa luvhazu papiipi niine, ahambuuzya ahati, ‘Wamwitu Saavhuli, taliiha kulola havhili!’ Panaapo vhweleele nkataliha kulola.
14 Pe ahambuuzya ahati, ‘UMulungu uwa vhataata vhiitu akusavhuuye iwe, inga umanye ulukasamo lwakwe nu kumulola umuvhomvi waakwe uwa nalyolib nu kumwivwa lwe akuyanga wuuyo. 15 Kwe uvhe we hoome waakwe ku vhantu vhonti, kuvhavhuuzya ziila zye uzivhwenyi nu kuzyivwa. 16 Ishi, ukuhavhiilila ishooni? Lyitishe izina lyakwe! Yimiliila! Uyoozelwe, uvhutalamalandu vhwaho vhwepe.’”
17 UPaavhuli ahajendeelela kuyanga kuuti, “Pisinda nkagaluha ku Yelusaleemu. Lwe nkumupuuta uMulungu mu Nyumba iMfinjile, nkalola injozi iya pa minso amazelu. 18 Mu njozi iyo, nkalola uMwene uYeesu akumbuuzya akuti, ‘Luvhiilo yeepa mu Yelusaleemu! Avhantu ivha te vhavhwitishe uvhusimishizi vhwaho, vhwe ukuvhavhuuzya izyane.’ 19 Nkati, ‘We Mwene, avheene vhamanyile kuuti ine nkatuuhaga mu masinagoogi, nkavhahomaga nu kuvhakunga mu jeela vhaala vhe vhakukwitiha! 20 Poosye lwe vhakumugoga uhoome waaho uSiteefani, náliipo pe paala. Nítinkiine navho kuuti vhamugoje, havhili amakooti gaavho vhe vhahamugogaga neene násenguuye.’ 21 UMwene ahanaamula ahati, ‘Sogoola! Kuuti nkusonteelezye ukutali, ku vhantu vhe te Vhayuuda.’”
UPaavhuli akuyimanyisya kuuti woope Muluumi
22 Avhantu vhahamutejelezyaga uPaavhuli, ileelo lwe ayanga izyo, pe vhahanda kuzuma ahalanga kuuti, “Mugoji! Umuntu uno akwanzilwa kufwa!” 23 Vhahajendeelela kuzuma ahalanga nu kuvhuusya amenda gaavho nu kunyampa ulusuuto kumwanya kulolesya kuuti vhahalaaye. 24 Pe umupiti uwa vhasikaali ahavhalajizya avhasikaali kuuti vhamwinjizye uPaavhuli mwi linga ilya vhasikaali. Ahati vhamuvhuziilizye uku vhakumuhoma ni ndiisa, inga amanye she shátwaliiye aVhayuuda kumuzumila ahalanga. 25 Lwe avhasikaali vhamukunga uPaavhuli kuuti vhamuhome ni ndiisa, ahamuvhuziilizya umwimiilizi waavho we áyimiliiye pe paala, ahati, “Vhuli, mukwitishilwa ni ndajizyo kumuhoma ni ndiisa uMuluumi, we ashiili kulongwa kuuti munanzi?”
26 Umwimiilizi ula lwe ayiivwa izyo, ahasogola ahamuvhuuzya umupiti waavho ahati, “Ukwanza kuhonzya vhuli? Umuntu uyo Muluumi!” 27 Pe umupiti waavho ahasogola kwa Paavhuli, ahamuvhuziilizya ahati, “Mbuuzya! Iwe we Muluumi?” UPaavhuli ahaamula ahati, “Ii! Ine ne Muluumi.” 28 Umupiti uyo ahamuvhuuzya ahati, “Ine nkavhwaga uvhuhaaya uvhwa kuvha ne Muluumi ku mpiiya inyinji.” UPaavhuli ahati, “Ileelo ine ne Muluumi uwa kupaapwa!”
29 Avhasikaali vhaala vhe vhahasiivhaga kumuvhuziilizya, vhahamuleha uPaavhuli, vhaheepa naluvhiilo. Umupiti waavho woope lwe aamanya kuuti uPaavhuli Muluumi, ahoogopa, mwe pe ámukunzile na manyoloolo.
UPaavhuli pilongolela ilya lukuvhato ulwa vhalongozi
30 Lwe kwasha, umupiti uwa vhasikaali ahanzaga kumanya kuuti shooni she aVhayuuda vhámulonjeleeye uPaavhuli, pe ahamusatula. Ahalajizya kuuti avhapiti avha vhapuuti pooka nu lukuvhato lwonti vhavhungaane. Pe ahamuleeta uPaavhuli, ahamwimiilisya pilongolela lyavho.