21
UPaavhuli akusogola ku Yelusaleemu
1 Lwe twalagana navho, tuhinjila imeeli, tuhapitiilila nayo, tuhafiha mu nsi inyuumu iya pahati pa sumbi ye vhakuti iKoosi. Lwe kwasha, tuhasogola mu nsi inyuumu iyamwavho ye vhakuti iLoodo. Tuhafuma ipo, tuhasogola mu nkaaya iya Pataala. 2 Ku Pataala tuhayaaga imeeli iyinji ye yikusogola mu nsi iya Foyiniikesi, pe tuhashuula nayo. 3 Tuhafiha pamo, tuhayilola insi inyuumu iya pahati pa sumbi ye vhakuti iKiipulo, tuhayileha uluvhazu ulwa kumongo, tuhajendeelela tuhafiha mu nkaaya iya Tiilo mu mukowa uwa Siiliya. Ipo pe imeeli yihanzilwaga kwisya amazigo. 4 Tuhiiha, tuhavhaaga avhalandati avha paala, tuhamala insiku saba navho. UMupepo uMufinjile ahavhalongola avhalandati ivho, vhahamuvhuzyaga uPaavhuli kuuti atahasogole ku Yelusaleemu. 5 Ileelo lwe ahavhaliilizyo iho haasila, tuheepa. Avhalandati ivho, pooka na vhashi vhaavho na vhaana vhaavho, vhahatusindishila kunzi ku nkaaya, vhahatufisya pa luvhazu pa sumbi. Ipo tuhasugamila tuhamulaavha uMulungu. 6 Pe tuhalagana, tuhalimbila imeeli yiila, vhoope vhahavhwela kumwavho.
7 Kufuma ku Tiilo, tuhajendeelela nu vhulendo, tuhafiha mu nkaaya iya Tolemaayi. Umwo tuhavhalamuha aVhachilisiti avhamwitu, tuhatendama navho isiku lyoka. 8 Indaavhi yaakwe tuhasogola mu nkaaya iya Kayisaaliya, tuhatendama mu nyumba iya Fiilipo. UFiilipo áamile mulumbiilizi. Havhili áamile wooka mu vhatuuli saba vhe vhávhasevile ku Yelusaleemu.a 9 Umuntu uyo áamile na vhaana vhane avhalindu vhe vhátimaliilwe. Avhaana ivho, vháamile ni shikunjilwa isha kufumwa uvhukuvhwi.
10 Lwe twatendama ukwo, ku havhaliilizyo hamo, ahinza umukuvhwi wumo kufuma ku Yudeeya, we izina lyakwe vhahatinji uAgaabo.b 11 Ahatwinzila, ahanyatula ilamba ilya Paavhuli. Ahayipinya mu vinama na mu nyoovhe, ahati, “UMupepo uMufinjile akuti, ‘Umuntu uwa ilamba ili, aVhayuuda avha ku Yelusaleemu, kwe vhamukunje inza vhwevhulo nu kumutwala ku vhantu vhe te Vhayuuda.’”
12 Lwe twivwa izyo, iswe pooka na vhamwitu avha ipo, tuhamulambiilizya nkaani uPaavhuli kuuti atahasogole ku Yelusaleemu. 13 Ileelo uweene ahatwamula ahati, “Mukuhonzya vhuli kukuuta nu kumvunza umwoyo? Ine nitisile zyonti, te kwe kukungwa kweka vhweleele, nkandi nu kufwa ku Yelusaleemu kuzya izina ilya Mwene uYeesu.” 14 Lwe twalola kuuti uPaavhuli atakwitiha, tutahayanga nkaani, tuhati, “Zye uMwene uYeesu akasiime zye zivhombeshe.”
15 Pisinda tuhasengaanya amazigo giitu, tuhanda kusogola ku Yelusaleemu. 16 Avhalandati vhamo avha mu Kayisaaliya vhahatusindishila, vhahatutwala mu nyumba iya muntu wumo we vhahatinji uMunaasoni. Umwo tuhatendama ku havhaliilizyo hansi. UMunaasoni áamile muntu uwa mu Kiipulo. Áamile wooka mu vhalandati avhatanzi.
UPaavhuli akufiha ku Yelusaleemu
17 Lwe twafiha ku Yelusaleemu, aVhachilisiti avhamwitu vhahatuposheela ku luseshelo. 18 Indaavhi yaakwe, iswe pooka nu Paavhuli tuhasogola kumulamuha umulongozi uwa shivhanza uYaakobu. Vhoope avhasongo vhonti avha shivhanza vháliipo lwe tukulamunkana. 19 Lwe uPaavhuli avhalamuha, ahavhavhuuzya zyonti zye uMulungu ávhomvile ku vhantu vhe te Vhayuuda kutuushila mu mbombo zyakwe.
20 Lwe vhiivwa izyo, vhahamutiima uMulungu. Vhahamuvhuuzya uPaavhuli vhahati, “Wamwitu, waalola amaeelufu na maeelufu aga Vhayuuda vhe vhamwitisile uYeesu. Vhonti ivho, vhali nu mute kuzilandata indajizyo izya Moose. 21 Ishi vhivuuye kuuti, ukuvhasambiilizya aVhayuuda vhonti vhe vhakutendama mu nsi izinji izya vhe te Vhayuuda kuuti, vhatasajilaje indajizyo izya Moose. Vhivuuye kuuti, ukuvhavhuuzya kuuti vhatavhatahiilaje avhaana vhaavho,c havhili vhatalandataje amaata aga Vhayuuda. 22 Ishi, tuti vhuli? Vhonti kwe vhiivwe kuuti uyinzile ipa. 23 Ishi, uvhombe zye kwe tukuvhuuzye. Muli iswe, vhaliipo avhantu vhane vhe vhavhiisile ulufingwi kwa Mulungu. 24 Uvhe pooka navho, mu shipuuto isha kuyizelufwa. Ufumwe amalipilo ge gakwanzilwa, inga vhavhegule insisi zyavho.d Pe avhantu vhonti kwe vhamanye kuuti, inongwa zye vhakuyanzile, te zya nalyoli. Nkandi kwe vhamanye kuuti iwe ukuzishindiha indajizyo izya Moose. 25 Ileelo ku vhantu avhanji vhe te Vhayuuda, vhe vhamwitisile uYeesu, tuvhasimbiiye ukalaata kuuti, vhatalyanje ivwakulya vwe vhafumwizye ku shipuuto isha viholanyo ivwa vhalungu, vhafupuhaje mu vhulugusu, vhatalyanje inyama zye vhabuzite, poosye amavhanda.”
26 Indaavhi yaakwe uPaavhuli ahavhanyatula avhantu vhaala, ahapuuta pooka navho ishipuuto isha kuyizelufwa. Pe ahinjila pa luvhungaano ulwa Nyumba iMfinjile, ahamuvhuuzya umupuuti isiku lye vhaliimala kuyizelufwa, pe vhonti vhafumwe impuutile zyavho.
Vhakumulema uPaavhuli
27 Insiku saba izya kuyizelufwa lwe zyapalamila kusila, aVhayuuda vhamo vhe vháfumile ku Aasiya vhahamulola uPaavhuli pa luvhungaano ulwa Nyumba iMfinjile. Vhahayisonjeelezya impuga yonti iya vhantu vhe vháamile paala, vhahamulema uPaavhuli. 28 Vhahanda kuzuma ahalanga kuuti, “Mwe vhantu vha mu Isilayeeli, mutwavwe! Umuntu uno we wula we akusambiilizya avhantu vhonti ponti kuuti vhatusufwaje tuVhaisilayeeli ni ndajizyo izya Moose ni Nyumba iMfinjile ino. Havhili avhinjiziizye vhe te Vhayuuda pa luvhungaano lwitu ulwa Nyumba iMfinjile nu kuyihandamania.” 29 Vháyanzile izyo, mwe pe vhámuvhwenyi uTolofiimo, umuhaaya uwa ku Hefeeso ali pooka nu Paavhuli mu Yelusaleemu. Vhahasiivha kuuti, uPaavhuli ámwinjiziizye pa luvhungaano ulwa Nyumba iMfinjile.
30 Pe muhavha ivho mu nkaaya yonti iya Yelusaleemu. Avhantu vhahinza kufuma imbazu zyonti, vhahamulema uPaavhuli nu kumudendemula kumufumwa pa luvhungaano ulwa Nyumba iMfinjile. Naluvhiilo avhaguliilizi avha Nyumba iyo vhahagalila inyiiji. 31 Lwe vhakwanza kumugoga uPaavhuli, intumi zihamufishila umupiti uwa vhasikaali avha Shiluumi kuuti, mu nkaaya yonti iya Yelusaleemu muli ivho. 32 Naluvhiilo umupiti uwa vhasikaali ahavhanyatula avhimiilizi na vhasikaali avhanji, vhahavhashimbiilila avhantu vhaala. Vhoope lwe vhamulola umupiti pooka na vhasikaali, vhahaleha kumuhoma uPaavhuli.
33 Pe umupiti uwa vhasikaali ahamupalamila uPaavhuli, ahamulema nu kuvhalajizya kuuti vhamukunje na manyoloolo gavhili. Ahavhuziilizya ahati, “Uno wu naanu? Avhomvile ishooni?” 34 Avhantu vhamo mu mpuga yiila vhahanda kuzuma ahalanga. Vhamo vhahayangaga izinji vhoope avhamwavho izinji. Pe umupiti uwa vhasikaali ahapootwa kumanya zye zyáfumiiye. Ahalajizya kuuti vhamutwale uPaavhuli mwi linga ilya vhasikaali. 35 Lwe uPaavhuli aafiha pa ntanda apa kuzuvhila, avhasikaali vhahamuvhuusya, mwe pe kwámile ivho nkaani. 36 Avhantu vhaala vhahamulandataga uPaavhuli uku vhakuzuma ahalanga kuuti, “Mugoji!”
UPaavhuli akuyanga izya kuyipoha pilongolela ilya Vhayuuda
37 Lwe avhasikaali vhakumwinjizya uPaavhuli mwi linga, ahamuvhuziilizya umupiti waavho ahati, “Vhuli, nkwitishilwa kukuvhuuzya izwi lyonti?” Woope ahamwamula ahati, “Fwandi niiwe umanyile kuyanga iShiyunaani! 38 Vhuli, iwe te we Mumiisili ula we ásambusile nu kuvhalongozya mwi laala avhantu elufu ine vhe vhahatinji avhabude, kuuti vhayipindule nsi?” 39 UPaavhuli ahamwamula ahati, “Ine ne Muyuuda, impafiilwe mu nkaaya impiti iya Taaso, mu mukowa uwa Kiliikiya. Nkulaavha unitishizye injanje na vhantu ivha.” 40 Lwe umupiti uwa vhasikaali amwitishizya, pe ahimiilila apa kuzuvhila paala, ahavhavhuusizya avhantu vhaala inyoovhe kuuti vhapuume. Lwe vhonti vhapuuma, ahavhavhuuzya mu njango yaavho.