20
UPaavhuli akusogola havhili ku Makedooniya na ku Vhuyunaani
1 Lwe ivho lyasila ku Hefeeso, uPaavhuli ahavhiita avhalandati vhonti. Ahavhagomwa umwoyo nu kuvhalaga, pe ahashuula kusogola ku Makedooniya. 2 Ukwo ahatuuha mwonti, ahavhagomwa avhalandati amooyo ku mazwi aminji. Pe ahasogola mu nsi iya Vhuyunaani.a 3 Ukwo ahatendama ku havhaliilizyo aha meezi gatatu. Pe ahasiivha kulimbila imeeli kusogola ku Siiliya. Lwe akuyisengaanya, ahiivwa kuuti aVhayuuda vhakusivhiilila kumugoga, pe ahaamula kusogola kutuushila idala ilya ku Makedooniya. 4 Mu vhulendo uvhwo uvhwa ku Siiliya, uPaavhuli áali pooka nu Sopaatulo umwana wa Piilo uwa ku Belooya, na vha Alisitaaliko nu Sekundo avha ku Tesaloniiki, nu Gaayo uwa ku Deelibe, nu Tiimoti, na vha Tikiiko nu Tolofiimo avha ku Aasiya. 5 Vhonti ivho vhahatulongolela, vhahatuguliilila mu nkaaya iya Tolowa. 6 Iswe tuhafiha ku Fiilipi. Lwe ishikulukuulu isha makaati ge vhataluziizye shatuuha, tuhalimbila imeeli ukwo. Tuhashuula ku havhaliilizyo aha nsiku zisaano, kusogola ku Tolowa. Ukwo tuhahomaana na vhamwitu vhe vhátulongoleeye. Tuhatendama kuukwo ku havhaliilizyo aha nsiku saba.
UPaavhuli akumuzyusya uEwutiko
7 Isiku ilya pa Mulungub lwe lyafiha, tuhavhungaana, inga tumensulane ikaati nu kulya pooka. UPaavhuli ahavhalumbiilila avhantu kufishila pa vhusiku pahati, mwe pe ásivhiliiye kushuula indaavhi yaakwe. 8 Mwe twávhungiine mu shumba isha pamwanya isha nyumba injelenkanu, mwámile ilyoto mwe pe inyaale inyinji zihaahaga. 9 Umujaaha wumo we izina lyakwe vhahatinji uEwutiko átendiime pi diliisha. Lwe uPaavhuli akujendeelela kulumbiilila, umujaaha uyo ahavha nu tulo nkaani. Lwe ali mu tulo, ahagwa kufuma pi diliisha ilyo, lye lyáli pa nyumba injelenkanu iya vhutatu. Avhantu lwe vhakumuvhuusya vhahaaga afuuye. 10 UPaavhuli ahiiha pansi, ahamugwila umujaaha ula, ahamufuhatila, ahati, “Mutogopaje, uno mupuuma vhweleele!” 11 Pe uPaavhuli ahazuvha havhili mu shumba shiila, vhahamensula ikaati, vhaahalya. Ahajendeelela kulumbiilila ku havhaliilizyo ahatali kufishila inzanshi, pe aheepa. 12 Avhantu vhaala vhahamusindishila umujaaha uyo, vhahamutwala kuhaaya she mupuuma, amooyo gaavho gahaseshela nkaani.
UPaavhuli akuvhalaga avhasongo avha shivhanza isha ku Hefeeso
13 UPaavhuli ahanzaga kusogola ku Aaso ulwa pansi. Ahanzaga kuuti tumunyatule ukwo. Pe iswe tuhalimbila imeeli, tuhafiha kwenekwo. 14 Lwe twamwaga, tuhamulimbizya mu meeli, tuhasogola pooka nawo mu nkaaya iya ku Mitileeni. 15 Isiku ilya vhuvhili tuhajendeelela kushuula ni meeli, tuhalungamana ni Kiiyo, insi inyuumu iya pahati pa sumbi. Isiku ilya vhutatu tuhafiha mu nsi inyuumu iya pahati pa sumbi ye vhakuti iSaamo. Isiku ilya vhune tuhafiha mu nkaaya iya Mileeto. 16 UPaavhuli ásivhiliiye kushuula ishisita kutuushila ku Hefeeso, inga atahahaavhe mu mukowa uwa Aasiya. Áhalambiine, kuuti inga angavhwezya, ayandane kufiha ku Yelusaleemu, lwe isiku ilya Pentekoositi lishiili kufiha.
17 UPaavhuli lwe ali ku Mileeto, ahasonteelezya avhantu kuvhiita avhasongo avha shivhanza isha ku Hefeeso. 18 Lwe vhaafiha, ahavhavhuuzya ahati, “Imwe mumanyile vwe nkatendamaga niimwe insiku zyonti, kufuma isiku lye náfisile mu Aasiya. 19 Nkamuvhombelega uMwene uYeesu ku vhutonsu vhwonti na ku mansozi. Havhili nkayimbaga mwe pe aVhayuuda vhahasiivhaga kungoga. 20 Mumanyile kuuti ntahavhazyihaga izwi lyonti lye lingavhaavwa, nkandi nkavhasambilizyaga apazelu na mu nyumba zyinyu. 21 Nkavhasohaga aVhayuuda na vhe te Vhayuuda kuuti vhatonte uvhutalamalandu vhwavho, vhamulandate uMulungu, nu kumwitiha uMwene wiitu uYeesu Chilisiti.
22 Ishi tejeelezyi, ine nkumushindiha uMupepo uMufinjile kuuti insogole ku Yelusaleemu, ileelo ntamanyile zye kwe zinaaje ukwo. 23 Nkandi mu nkaaya zyonti zye nkutuuha, uMupepo uMufinjile akunsoha kuuti, ijeela na malavha vinguliliiye. 24 Ileelo ntakusaajila uvhupuuma vhwane kuuti vhwa nsavho kuli ine. Nkandi nkwanza kuuti imale ulwaji ni mbombo ye uMwene uYeesu ampiiye, kuuti indumbiilile Izwi iLyinza ilya vhwila uvhwa Mulungu.
25 Natuuhaga uku nuukwo kuvhalumbiilila imwe mwenti izya vhumwene uvhwa Mulungu. Ileelo ishi tejeelezyi, ine manyile kuuti, te muhandole havhili naalumo. 26 Isiku ilya ileelo ili nkuvhasimishizya kuuti, ine ntali nu vhunanzi naavhumo kwa muntu wonti we ateega, mwe pe imbalumbiliiye mwenti. 27 Ntázyisile inga hansi kuvhalumbiilila zyonti zye uMulungu akasiime. 28 Muyisunjililaje mweneemwe, pooka ni mpuga yiila ye uMupepo uMufinjile avhavhiisile imwe kuvha mwe vhimiilizi. Mushidiimaje ishivhanza isha Mulungu she áshikazile ku mavhanda gaakwe wuuyo. 29 Imanyile kuuti lwe neepa, avhasambiilizi avha ilenga vhe vhahali inza impumpi vhaliyinza kuli imwe, te vhahayifwile uvhwila impuga. 30 Havhili muli imwe vhalifumila avhantu vhe vhaliyangaga inongwa izya ilenga, inga vhavhateezye avhalandati, kuuti vhavhalandataje avheene. 31 Pe ishi muvhe minso! Mukumbushe kuuti, ntálisite kuvhasoha mwenti ku mansozi uvhusiku nu musanya ku havhaliilizyo aha maaha gatatu.
32 Ishi nkuvhavhiiha mu nyoovhe izya Mulungu na mu vhulongozi uvhwa izwi ilya vhwila vhwakwe. Izwi ilyo lye likuvhwezya kuvhazenga, nu kuuvhapa uvhupwano vhwe avhavhishiiye avhafinjile. 33 Ine ntányonyiilwe naalumo impiiya, poosye amenda aga muntu wonti. 34 Imwe mumanyile kuuti, nkavhombaga imbombo zyane, inga ine pooka na vhaala vhe nkatendamaga navho tukalaje vwe twásovheliilwe. 35 Mu zyonti zye nkavhombaga, nkavhalolesyaga imwe kuuti, muvhombaje imbombo ku mute, mwe pe tukwanzilwa kuvhaavwa avhayeyevhazu. Tukumbuhaje amazwi ge uMwene uYeesu wuuyo áyanzile atili, ‘Vhulootwe nkaani kufumwa kuluusya kuposheela.’”
36 Lwe uPaavhuli aamala kuyanga izyo, ahasugamila pooka navho vhonti, ahamulaavha uMulungu. 37 Pe vhonti vhahakuuta nkaani, vhahamwofwa nu kumukuukula uPaavhuli lwe vhakumulaga. 38 Zye zyávhavhiisile kuuti vhasimiililwe nkaani lizwi liila lye ávhavhuziizye kuuti, te vhahamulole havhili naalumo. Pe vhahamusindishila kufishila kwe imeeli yáali.