19
UPaavhuli akulumbiilila mu nkaaya iya Hefeeso
1 Ahavhaliilizyo he uApoolo áali mu nsi iya Akaaya, mu nkaaya iya Kolinto, uPaavhuli ahashuula kutuushila ku lutala mu mukowa uwa Aasiya, ahafiha mu nkaaya iya Hefeeso. Lwe ali mu Hefeeso, ahahomaana na vhalandati vhamo avha Mwene uYeesu. 2 Ahavhavhuziilizya ahati, “Vhuli, lwe mwamwitiha uYeesu mwámuposheleeye uMupepo uMufinjile?” Vhahamwamula vhahati, “Haa, poosye nu kwivwa kuuti aliipo, tutahiivwa naalumo.” 3 Pe ahavhavhuziilizya ahati, “Ishi pe mwózeliilwe lwozyo vhuli?” Vhahamwamula vhahati, “Twózeliilwe ulwozyo ulwa Yoohani.”
4 UPaavhuli ahavhavhuuzya ahati, “UYoohani ahavhozyaga avhantu kulolesya kuuti vhatonsite uvhutalamalandu vhwavho. Uweene ahavhavhuzyaga kuuti vhamwitishe wuula we kwe ayinze inga uweene atuuha, we wu Yeesu.” 5 Avhantu ivho, lwe vhiivwa izyo, vhahoozelwa kwi zina ilya Mwene uYeesu. 6 Pe uPaavhuli ahavhavhiishila inyoovhe kuvhaloota, uMupepo uMufinjile ahavhiishila, vhahanda kuyanga ku njango injeni nu kufumwa uvhukuvhwi. 7 Uvhwinji vhwavho vháamile avhanaavuli kumi na mbiili ishi.
8 Ku havhaliilizyo aha meezi gatatu, uPaavhuli ahinjilaga mwi sinagoogi, ahapanzanyaaga na vhantu ku vhudandamazu nu kuvhasinjiilizya kuuti vhiitishe izya vhumwene uvhwa Mulungu. 9 Ileelo vhamo vhahadindila amakutwi gaavho, vhahahaana kuwiitiha, vhahanda kuzisaamula insambiilizyo izya idala ilya Mwene uYeesu pilongolela ilya vhantu. Pe uPaavhuli ahavhaleha, ahavhanyatula avhalandati avha Yeesu, ahavhasambilizyaga insiku zyonti mu nyumba iya kusambilizizya iya muntu we vhahatinji uTiilaani. 10 Ahajendeelela kuvhomba vhwevhulo ku havhaliilizyo aha maaha gavhili, pe vhonti vhe vhahatendamaga mu mukowa uwa Aasiya, aVhayuuda na vhe te Vhayuuda, vhahiivwa izwi ilya Mwene uYeesu.
Avhaana avha Sikeewa
11 Ahavhaliilizyo iho, uMulungu ahavhombaga amafindango aga kusukumizya kutuushila kwa Paavhuli. 12 Avhantu vhahanyatulaga utwenda utwa kusyumulila amatwinsi na menda aganji ge uPaavhuli ahapalamansyaga, vhahavitwalaga ku vhavhinu, vhoope vhahaponaga amavhinu gaavho, havhili vhe vháamile ni mpepo inkandamanu zihafumaga.
13 Páamile aVhayuuda vhamo vhe vhahajendangaga uku nuukwo kwefwa impepo inkandamanu mu vhantu. Vhoope vhahalingaga kulitaha izina ilya Mwene uYeesu ku vhantu vhaala. Vhahazivhuzyaga impepo izyo kuuti, “Kwi zina ilya Yeesu we uPaavhuli akumulumbiilila, nkuvhavhuuzya kuuti fumi.” 14 Muli ivho vhe vhahavhombaga izyo, vháliipo avhaana avhanaavuli saba avha Sikeewa, umupiti uwa vhapuuti avha Vhayuuda. 15 Isiku limo, lwe vhakumwefwa umuntu wumo impepo inkandamanu, impepo iyo yihavhaamula yihati, “UYeesu imumanyile! UPaavhuli woope imumanyile! Ileelo imwe mwe vha naanu?” 16 Pe umuntu ula we áamile ni mpepo inkandamanu ahavhadomoshela vhonti ku maha nu kuvhapoota. Pe vhahashimbila kufuma mu nyumba iya muntu uyo she vhali ishitali, na malonda mu mavhili gaavho.
17 Inongwa izyo zihakumuha ku Vhayuuda na vhe te Vhayuuda vhonti vhe vhahatendamaga mu Hefeeso. Vhonti ilyoga lihavhalema, vhahalitiimaga izina ilya Mwene uYeesu. 18 Avhantu avhinji vhe vhámwitisile uYeesu vhahatonta apazelu imbiivhi zyavho zye vhahavhombaga. 19 Muli ivho vháliipo avhinji vhe vhahavhombaga amayele aga vhuganga. Vhahavhungaaniha amakalaata gaavho ge vhahavhombelaga amayele, vhahagapemba she avhantu vhonti vhakulola. Lwe vhavhaazya amakalaata igo, vhahaaga gakufisya impiiya inyinji nkaani, insavhaazya elufu hamusiini ku mpiiya zyavho.a 20 Kwi dala ilyo, izwi ilya Mwene uYeesu lihajendeelela kukumuha nu kwonjela amaha.
Ivho ipiti mu Hefeeso
21 Lwe zyatuuha zyonti izyo, uPaavhuli ahaamula kusogola ku Yelusaleemu kutuushila mu mukowa uwa Makedooniya nu wa Akaaya. Ahayanga ahati, “Inga naafiha ku Yelusaleemu, nkwanzilwa kufiha na ku Luumi.” 22 Pe ahavhasonteelezya vhavhili mu vhatuuli vhaakwe, uTiimoti nu Elaasito, kuuti vhalongolele kusogola ku Makedooniya. Uweene ahasyala mu Aasiya ku havhaliilizyo hansi.
23 Ahavhaliilizyo hanaaho, kuhafumila ivho ipiti mu Hefeeso kuzya nsambiilizyo izya idala ilya Mwene Yeesu. 24 Ku Hefeeso ukwo kwámile umuntu wumo we izina lyakwe vhahatinji uDemetiiyo. Uweene ahasyanaga iviholanyo ivwa mpiiya vwe vwáholiine ni nyumba iya mulungu uwa shantanda we vhahatinji uAliteemi. Imbombo iyo yihavhapanga avhasyani vhonti ilonka ipiti nkaani. 25 Isiku limo uDemetiiyo ahavhavhungaaniha avhasyani ivho, pooka na vhanji vhe vhahavhombaga imbombo inza iyo. Ahavhavhuuzya ahati, “Mwe vhamwitu, mumanyile kuuti ilonka lyitu ipiti likufumiilana ni mbombo ino. 26 Ileelo ishi mwalola nu kwivwa mweneemwe zyonti zye uPaavhuli uyo akuzivhomba. Akuvhasonganya nu kuvhagalulanya avhantu insiivho zyavho, inga vhiitishe kuuti iviholanyo vwe avhantu vhakugomba te vhalungu inga hansi. Havhili atakuzivhomba pe pa Hefeeso peeka vhweleele, nkandi na mu Aasiya yonti. 27 Te kuuti ye mbombo yiitu yeeka vhweleele ye kwe vhayisuufwe, nkandi ni nyumba iya mulungu wiitu umwantanda uAliteemi yoope kwe vhayisuufwe. Havhili uvhushindamu uvhwa mulungu uyo we iAasiya ni nsi yonti yikumupuuta kwe wusile.”
28 Lwe avhamwavho vhiivwa inongwa izyo, vhahaviitwa nkaani, vhahanda kuzuma ahalanga kuuti, “UAliteemi uwa Vhahefeeso mupiti!” 29 Kuhavha ivho mu nkaaya yonti iya Hefeeso. Vhahavhalema avha Gaayo nu Alisitaaliko, avhahaaya avha ku Makedooniya, vhe vhahashuulaga pooka nu Paavhuli, vhahashimbila navho kusogola ku luvhungaano ulupiti lwe avhantu vhakwizizya. 30 UPaavhuli ahanzaga kusogola pilongolela ilya vhantu vhaala inga ayanje navho, ileelo avhalandati avhamwavho vhahamuhaana. 31 Vhoope avhamanyani vhaakwe vhamo avhapiti avha ku Aasiya ukwo, vhahasonteelezya intumi iya kumusoha uPaavhuli kuuti, atahinjile pe avhantu vhahavhungaanaga ipo.
32 Mu vhantu vhe vhavhungiine ipo, vhamo vhahaholelaga izinji, avhamwavho vhoope izinji, mwe pe ivhungaana lye lyámile paala lyávwalangiine. Avhantu avhinji vhatámanyile zye vhavhunganiiye pooka. 33 AVhayuuda vhahamwimiilisya umuntu wumo we vhahatinji uAlekizanda pilongolela pa vhantu. Avhantu vhamo pa mpuga yiila vhahamunongʼonela izya kuyanga. Pe uAlekizanda ahavhavhuusizya inyoovhe kuuti atalishe kuyanga kuvhapoha aVhayuuda. 34 Ileelo lwe vhaamanya kuuti Muyuuda, vhonti vhahanda kuzuma ahalanga ku havhaliilizyo aha saala zivhili. Vhahahoolaga pooka vhahatinji, “UAliteemi uwa Vhahefeeso mupiti!”
35 Pisinda, umusimvi umupiti uwa nkaaya iyo ahavhapumiilizya avhantu vhaala, ahati, “Mwe vhanaavuli vha mu Hefeeso, wu naanu we atamanyile kuuti inkaaya ino iya Hefeeso ye yikusunga inyumba iya Aliteemi umulungu umupiti? Poosye wu naanu we atamanyile kuuti yikusunga ishiholanyo shaakwe she sháguuye kufuma kumwanya? 36 Nuumo we angahaana inongwa izi. Ishi imwe puumi, mutahavhombe lyonti liila naluvhiilo. 37 Muvhaleesite avhantu ivha, she vhatiivile ivintu naavimo mu nyumba iya mulungu wiitu umwantanda, havhili vhatamulizile uweene. 38 Inga uDemetiiyo na vhasyani avhamwavho vhali ni nongwa zimo na vhantu ivha, vhakwanzilwa kuvhalonjeela pi lonjelwi poosye kwa mupiti uwa mukowa! 39 Inga muli ni zinji, muzitwale pi vhungaana lye indajizyo zyitu zikutwitishizya. 40 Vwe twavhomba ishi kuzya ivho lye lyafumiila ileelo ili, tungalongwa, havhili tutali ni izwi ilya kuvhaamula avhapiti kuzya ivho ili.” 41 Lwe aamala kuvhavhuuzya avhantu izyo, ahati vhonti vhasataane.