9
USaavhuli akupinduha
1 Ahavhaliilizyo iho, uSaavhuli ahajendelelaga kuvhoogofwa avhalandati avha Mwene uYeesu, kuuti kwe avhagoje. Isiku limo ahasogola kwa mupuuti umupiti, 2 ahamulaavha kuuti amupe avhakalaata avha kumumanyisya ku vhasongo avha masinagoogi mu nkaaya iya mu Damaasiki. Avhakalaata ivho vhahamwitishizyaga kuuti, inga avhaaga avhalandati avha Yeesu, avhanaavuli poosye avhantanda, avhakunje nu kuvhaleeta ku Yelusaleemu.
3 Pe uSaavhuli ahalongola idala ilya kusogola ku Damaasiki. Lwe apalamila, naluvhiilo uvhuzelu uvhuhali kufuma ku mwanya vhuhamuhozya imbazu zyonti. 4 Ahagwa pansi, ahiivwa izwi likumuvhuziilizya kuuti, “Saavhuli! Saavhuli! Shooni she ukunjimvwa?” 5 USaavhuli ahavhuziilizya ahati, “We naanu iwe Mwene?” Lyope lihamwamula lihati, “Ine ne Yeesu, ne iwe ukunjimvwa. 6 Ishi yimiliila! Usogole mu nkaaya, umwo muli umuntu we kuuti akuvhuuzye zye ukwanzilwa kuvhomba.”
7 Avhantu vhe vháshuuye pooka nu Saavhuli vhahimiilila. Vhahapuuma mwaa, mwe pe vhoope vhahivwaga izwi liila, ileelo vhatahamulolaga umuntu nuumo. 8 Pe uSaavhuli ahimiilila, ahadaamula, ileelo atahalola. Avhamwavho vhahamulema inyoovhe nu kumuteteesya, kumutwala mu Damaasiki. 9 Ahamala insiku zitatu she atakulola poosye kulya, poosye kumwela.
10 Mu Damaasiki mwámile umulandati wumo uwa Mwene uYeesu, izina lyakwe vhahatinji uAnaniiya. UMwene uYeesu ahamwita mu njozi iya pa minso amazelua ahati, “We Ananiiya!” Woope ahati, “Ine indi ipa Mwene.” 11 UMwene ahamuvhuuzya ahati, “Sogoola mu nyumba iya Yuuda, inyumba iyo yili mwi dala lye vhakuti Igolosu, uvhuziilizye umwo umuntu uwa mu nkaaya iya mu Taaso, we izina lyakwe wu Saavhuli. Ishi akumulaavha uMulungu. 12 Aavhwenyi injozi, mu njozi iyo aamuvhwenyi umuntu we vhakuti uAnaniiya, akwinjila mu nyumba ye ali kumuvhiishila inyoovhe inga atalishe kulola havhili.”
13 UAnaniiya ahamwamula ahati, “We Mwene, nivuuye ku vhantu avhinji vwe uSaavhuli uyo avhavhombeeye imbiivhi avhantu vhaaho mu Yelusaleemu! 14 Ishi ali ipa, avhapiti avha vhapuuti vhamupiiye amaha aga kuvhakunga vhonti vhe vhakulyitiha izina lyaho.” 15 Ileelo uMwene ahamuvhuuzya uAnaniiya ahati, “Sogoola vhweleele! Umuntu uyo, musavhuuye kuuti avhe muvhomvi waane, akumusye izina lyane ku vhe te Vhayuuda, ku vhamwene, havhili na ku Vhayuuda vhweleele. 16 Ine kuuti mulanje vwe yikwanzilwa kuuti ayimbe nkaani kuzya izina lyane.”
17 Pe uAnaniiya ahasogola, ahinjila mu nyumba ye uSaavhuli áamile. Ahamuvhiishila inyoovhe, ahamuvhuuzya ahati, “Wamwitu Saavhuli, uMwene uYeesu ansonteleziizye kuli iwe, kuuti utalishe kulola havhili, umuposheele uMupepo uMufinjile. UYeesu uyo we akulolesheeye mwi dala mu havhaliilizyo he winzaga ipa.” 18 Naluvhiilo utuntu twe tuli ngati tubabazula tuhagwa kufuma mu minso aga Saavhuli, ahataliha kulola havhili. Pe ahimiilila, ahoozelwa. 19 Ahalya ishaakulya, pe ahavha na maha havhili.
USaavhuli akulumbiilila mu Damaasiki
USaavhuli ahatendama insiku nyinsi mu nkaaya iyo iya mu Damaasiki, áamile pooka na vhalandati avha Mwene uYeesu. 20 Pe ahanda kusogola mu masinagoogi, ahavhalumbililaga intumi izya Yeesu, ahatinji “Uyo we Mwana wa Mulungu.” 21 Avhantu vhonti vhe vhahatejelezyaga insambiilizyo zyakwe izyo, vhahasukumilaga nkaani. Vhahavhuzilizanyaaga vhahatinji, “Vhuli, umuntu uno, te we wula we avhayimvwaga avhantu vhe vhamwitisile uYeesu ku Yelusaleemu? Vhuli, wunuuno atinzile kuuti avhakunje avhantu inza ivho mu Damaasiki umu nu kuvhatwala ku vhapiti avha vhapuuti?” 22 Ileelo uSaavhuli ahonjezya kuvha na maha aga kuyanga, ahasimishizyaga kuuti uYeesu wu Chilisiti. Pe aVhayuuda avha ku Damaasiki vhahatetemaga nkaani.
23 Lwe pa diila, aVhayuuda ivho vhahitinkana kuuti vhamugoje. 24 Vhahamwuvhililaga mu malyango aga nkaaya yiila uvhusiku nu musanya, inga vhamugoje. Ileelo insiivho izyo izya kumugoga, zihavumbuha ku kwakwe. 25 Uvhusiku avhalandati vhaakwe vhahamuvhiiha mu shitundu ishipiti, vhahamutuusya mu lupitu ulwa nkaaya, vhahamwisya pansi.
USaavhuli akusogola ku Yelusaleemu
26 Pe uSaavhuli ahasogola ku Yelusaleemu. Lwe aafiha ukwo, ahalinga kusangaana na vhalandati avha Yeesu. Ileelo vhonti vhahamwogopaga, mwe pe vhatítisile kuuti woope mulandati wa Yeesu. 27 Ileelo uBalinaaba ahamutwala uSaavhuli ku vhatumwa avha Yeesu, ahavhavhuuzya vwe uSaavhuli ámuvhwenyi uMwene uYeesu mwi dala ilya ku Damaasiki, na vwe uMwene ámuvhuziizye uSaavhuli. Ahavhavhuuzya vwe uSaavhuli ávhalumbiliiye avhantu avha ukwo intumi izya Yeesu ku vhudandamazu.
28 Pe uSaavhuli ahasyala pooka na vhatumwa avha Yeesu. Ahazyunguulaga mu Yelusaleemu, kulumbiilila avhantu izya Mwene uYeesu ku vhudandamazu. 29 Ahayangaga nu kudalinkana na Vhayuuda vhamo vhe vhahayangaga injango iya Shiyunaani, ileelo avheene vhahalinga kuuti vhamugoje. 30 Avhantu vhe vhámwitisile uYeesu lwe vhaamanya izyo, vhahamunyatula vhahamutwala mu nkaaya iya Kayisaaliya nu kumuleha asogole kumwavho ku nkaaya iya Taaso.
31 Mu manda igo, ivivhanza ivwa mu Yudeeya vwonti na mu Galilaaya na mu Samaliya, vihasankaanaga ahavhaliilizyo aha vhutehamu. Vihagomaga nu kumushindiha uMwene. UMupepo uMufinjile ahavhagomwaga umwoyo, nu vhwinji vhwavho vhuhonjelaga.
UPeeteli akumuponia uYeneeya
32 Mu havhaliilizyo iho, uPeeteli ahazyunguulaga uku nuukwo. Isiku limo ahafiha mu nkaaya iya mu Liida, inga avhalamushe avhantu avha Mulungu vhe vhahatendamaga muumwo. 33 Mu nkaaya iyo, ahamwaga umuntu we áhataliiye, izina lyakwe vhahatinji uYeneeya. Umuntu uyo ákaasite pa shilili ku havhaliilizyo aha maaha naane. 34 Pe uPeeteli ahamuvhuuzya ahati, “Iwe Yeneeya, uYeesu Chilisiti akukuponia. Ishi yimiliila! Zinga ishilili shaaho.” Naluvhiilo uYeneeya ahimiilila. 35 Pisinda, avhantu vhe vhahatendamaga mu Liida, na mwi hombe ilya Shaloni, vhahamulola uYeneeya akujenda. Lwe vhaalola izyo, vhonti vhahamwitiha uMwene uYeesu.
UPeeteli akumuzyusya uDolikaasi
36 Mu nkaaya iyamwavho ye vhahatinji iYaafa áliipo umwantanda wumo, umulandati uwa Yeesu, izina lyakwe vhahatinji uTaabita. (Mu njango iya Shiyunaani, wu Dolikaasi.b) UDolikaasi ahavhavwaga avhapiina nu kuvhomba imbombo izinji inyinza. 37 Mu manda igo, uDolikaasi ahavhina nu kufwa. Avhantu vhahamwozya, vhahamuvhiiha mu shumba isha pamwanya mu nyumba injelenkanu. 38 Mu havhaliilizyo iho avhalandati avha Yeesu vhahiivwa kuuti uPeeteli ali mu nkaaya iya Liida. Pe vhahavhasonteelezya ku kwakwe avhantu vhavhili, mwe pe inkaaya iyo yáamile papiipi ni nkaaya yaavho iya Yaafa. Avhantu ivho vhe vhávhasonteleziizye vhahamulambiilizya uPeeteli vhahati, “Twalamba uyinze ku kwitu shisita kuhaavha!”
39 Pe uPeeteli ahasogola pooka navho. Lwe vhaafiha mu Yaafa, vhahamutwala mu shumba she shiila she vhámuvhiisile uDolikaasi. Avhafwile vhonti vhahamuvhungatila uku vhakukuuta amansozi. Vhahamusontela inkanzu, na menda aganji ge uDolikaasi ávhasoneeye lwe mupuuma. 40 UPeeteli ahavhafumwa vhonti panzi, ahasugamila, ahamulaavha uMulungu. Pe aheenya ku shaala shiila, ahati, “We Taabita, damuula!” UTaabita ahadaamula. Lwe amulola uPeeteli, ahatendama. 41 UPeeteli ahamulema inyoovhe, ahamwimiilisya. Ahavhiita avhafwile vhaala, na vhantu avhanji vhe vhámwitisile uMwene uYeesu, ahavhalolesya kuuti uTaabita mupuuma. 42 Inongwa izyo zihakumuha mu nkaaya yonti iya Yaafa, avhantu avhinji vhahamwitiha uMwene uYeesu. 43 UPeeteli ahasyala mu Yaafa ku manda aminji, ahatendamaga mu nyumba iya muntu we ahagombaga amakwembe, izina lyakwe vhahatinji uSiimoni.