10
UKolineeliyo akumwita uPeeteli
1 Mu nkaaya iya mu Kayisaaliya mwámile umuntu wumo we atáamile Muyuuda, izina lyakwe vhahatinji uKolineeliyo. Áamile mupiti wa vhasikaali avha Shiluumi, ahalongozyaga avhasikaali miya mooja, kufuma mu mpuga impiti iya vhasikaali ye vhahatinji iMpuga iya Vhayitaaliya. 2 Havhili áamile muntu umugolosu, uweene pooka na vhantu vhonti avha mu nyumba yaakwe vhahamupuutaga uMulungu. Ahamulaavhaga uMulungu amanda gonti nu kuvhaavwa nkaani avhapiina.
3 Isiku limo mu havhaliilizyo aha saa tisa iya musanya ishi, uKolineeliyo ahalola injozi iya pa minso amazelu. Mu njozi iyo, uhavhizya uwa Mulungu ámulolesheeye. Uhavhizya uyo ahamuvhuuzya ahati, “We Kolineeliyo!” 4 UKolineeliyo ahamutontomela uhavhizya ula kwi lyoga, ahamuvhuziilizya ahati, “We mwene, kuli shooni?” Uhavhizya ahamuvhuuzya ahati, “UMulungu ayiivwa kulaavha kwaho, havhili azyitiha impuutile zyaho zye ukuvhaavwa avhapiina. Zyonti izyo azimanyile, akuzikumbuha ku mwanya. 5 Pe ileelo ishi, usonteelezye avhantu ku Yaafa, vhamwite umuntu we vhakuti uSiimoni, izina ilyamwavho vhakuti uPeeteli. 6 Uweene mujeni uwa muntu we vhakuti uSiimoni, we akugomba amakwembe, we inyumba yaakwe yili pa luvhazu pa sumbi.”
7 Lwe uhavhizya aamala kumuvhuuzya uKolineeliyo, aheepa. Pe uKolineeliyo ahavhiita vhavhili mu vhavhomvi vhaakwe, pooka nu musikaali wooka mu vhatuuli vhaakwe. Woope umusikaali uyo ahamupuutaga uMulungu. 8 UKolineeliyo ahavhavhuuzya zyonti zye uhavhizya ámulajiziizye, ahavhasonteelezya ku Yaafa.
UPeeteli akulola injozi iya pa minso amazelu
9 Isiku ilya vhuvhili mu havhaliilizyo aha saa sita umusanya ishi, avhantu vhe uKolineeliyo ávhasonteleziizye, vhahapalamila kufiha ku Yaafa. Mu havhaliilizyo hanaaho, uPeeteli woope ahazuvha kwi daale mu nyumba,a inga amulaavhe uMulungu. 10 Inzala yihamuluma, ahanzaga kulya. Lwe vhali kuteleha ishaakulya, ahalola injozi iya pa minso amazelu. 11 Mu njozi iyo, ahalola ku mwanya kwigusile, havhili ishintu she sháali ngati ligolole ipiti lye lilemiilwe imbazu zyonti zine, shikwiha pansi. 12 Muhati yaakwe mwámile ivihanu ivwa nkolo zyonti. Mwámile ivihanu ivwa vinama vine na vwe vikukwesuha ni nyunyi.b
13 Pe uPeeteli ahiivwa izwi, likumuvhuuzya kuuti, “We Peeteli, vhuuha! Vhoola ulye!” 14 UPeeteli ahalyamula ahati, “Haa, ndaali Mwene! Ntahalya naalumo ishintu shonti she shikuhombezya!” 15 Pe izwi ilyo lihamuvhuuzya havhili uPeeteli lihati, “Ivintu vwonti vwe uMulungu avizelufwizye, iwe utatinji vikuhombezya.” 16 Izwi ilyo lihavhuyiizya lutatu lwonti, pe naluvhiilo igolole liila lihagaluha ku mwanya.
17 Lwe uPeeteli akuyivhuziilizya kuuti injozi iyo kwe kuuti vhuli, avhantu vhaala vhe uKolineeliyo ávhasonteleziizye vhahafiha ku Yaafa, vhahavhuziilizya inyumba iya Siimoni. Lwe vhapamanya, vhahimiilila pa mulyango. 18 Vhahiiguzya nu kuvhuziilizya kuuti, “Vhuli, ipa pe akudiila uSiimoni we vhakuti uPeeteli?” 19 Lwe uPeeteli akusiivha izya njozi iyo, uMupepo uMufinjile ahamuvhuuzya ahati, “Siimoni, pansi ipo pali avhantu vhatatu vhe vhakukwanza. 20 Yiiha, usogole pooka navho, utahasingaane, mwe pe neene imbasonteleziizye.”
21 UPeeteli lwe ayiiha pansi, ahavhavhuuzya avhantu vhaala ahati, “Ine ne neene ne mukundondola. Ishi, mwinzile kuuti vhuli?” 22 Vhahamwamula vhahati, “Umupiti wumo uwa vhasikaali atusonteleziizye. Izina lyakwe wu Kolineeliyo, muntu we akuvhomba inyinza, akumupuuta uMulungu, havhili aVhayuuda vhonti vhakumutiima. Ishi, uhavhizya umufinjile amulajiziizye kuuti akwite, usogole mu nyumba yaakwe, inga atejeelezye amazwi ge kwe umuvhuuzye.” 23 Pe uPeeteli ahinjila navho mu nyumba, vhahavha vhajeni vhaakwe.
Lwe kwasha, uPeeteli na vhantu avha Kolineeliyo vhahasogola, vhamo mu vhalandati avha Yeesu avha ku Yaafa, vhahalandatana nawo.
UPeeteli mu nyumba iya Kolineeliyo
24 Lwe kwasha havhili, vhahafiha mu Kayisaaliya. Ukwo uKolineeliyo ahavhaguliilaga, ávhavhunganisile avhajenzi vhaakwe, pooka na vhamanyani vhaakwe.
25 Lwe uPeeteli aafiha, uKolineeliyo ahamuposheela, ahasugamila pansi pa vinama vwakwe nu kumupuuta. 26 Ileelo uPeeteli ahamuvhuusya, ahamuvhuuzya ahati, “Yimiliila! Niine ne muntu inza weneewe!” 27 Pe uPeeteli ahinjila pooka nu Kolineeliyo mu nyumba she vhakuyanga, ahaaga avhantu avhinji vhavhungiine. 28 UPeeteli ahavhavhuuzya ahati, “Imwe mumanyile ahinza kuuti iswe twe Vhayuuda, indajizyo zyitu zikuhaana kusangaana na vhantu vhe te Vhayuuda. Poosye kutandalilana navho, tutakwitishilwa. Ileelo uMulungu andanzile kuuti ntamuvhuzyaje umuntu wonti kuuti muhandamanu. 29 Kufumililana niizyo, lwe mwaniita ninzile ishisita kusingaana. Ishi nkuvhavhuziilizya kuuti, shooni she muniisite?”
30 UKolineeliyo ahamwamula ahati, “Zyatuuha insiku zitatu kufuma ahavhaliilizyo he namulaavhaga uMulungu mu nyumba yaane ino, ahavhaliilizyo inza hanaaha aha mu saa tisa iya musanya. Naluvhiilo nkalola umuntu ayimiliiye pilongolela lyane azwaye amenda ge gakunyengʼenyela. 31 Ahambuuzya ahati, ‘We Kolineeliyo! UMulungu ayiivwa kulaavha kwaho nu kuzyitishila impuutile zyaho zye ukuvhaavwa avhapiina. 32 Pe ileelo, uvhasonteelezye avhantu vhasogole vhamwite uSiimoni we vhakuti uPeeteli. Akutendama ku Yaafa, kwa muntu we izina lyakwe vhakuti uSiimoni we akugomba amakwembe. Inyumba yaakwe yili pa luvhazu pa sumbi.’ 33 Izyo zye zimbiisile kuuti inkalambane kusonteelezya avhantu inga vhakwite, niiwe wavhomba ahinza kwinza. Ishi swenti tuli ku minso aga Mulungu, inga tutejeelezye amazwi gonti ge akulajiziizye kuuti utuvhuuzye.”
34 Pe uPeeteli ahavhavhuuzya ahati, “Ishi pe naamanya kuuti, nalyoli uMulungu atakusevhanya! 35 Ileelo akuvhiitiha avhantu avha mu nsi zyonti, vhe vhakumupuuta nu kuvhomba zye zihondeeye ku minso gaakwe. 36 Imwe mumanyile kuuti uMulungu ásonteleziizye avhantu vhaakwe kuvhavhuuzya aVhaisilayeeli Izwi iLyinza kuuti, vhaliivha nu vhutehamu nu weene kwi dala ilya Yeesu Chilisiti, we wu Mwene uwa vhantu vhonti. 37 Mumanyile zye zivhombesile mu nsi yonti iya Vhayuuda, kwandila ku Galilaaya, kufuma lwe ahavhaliilizyo hatuuha he uYoohani ahavhalumbililaga avhantu kuuti vhoozelwe. 38 Kwe kuuti mumanyile vwe uMulungu ámusavhuuye uYeesu uwa ku Nazaleeti kwi dala ilya kuumupa uMupepo uMufinjile na maha. Ahavha pooka nawo, ahamuvhiiha kuuti avhombaje inyinza mu vhantu ponti, ahaponia vhonti vhe vhahayimvilwaga na maha aga Mukwalanzi.
39 Zyonti izyo zye uYeesu ávhomvile mu nsi iya Vhayuuda, na mu nkaaya iya mu Yelusaleemu, iswe swe vhahoome. Pisinda vhahamugoga kwi dala ilya kumuhomeela pa shihovhenkanyo. 40 Ileelo isiku ilya vhutatu, uMulungu ahamuzyusya, ahamulolesya ku vhantu. 41 Atálolesile ku vhantu vhonti, nkandi kuli iswe twe twásavhuliilwe nu Mulungu kuvha twe vhahoome. Iswe twe twáliiye nu kumwela nawo lwe azyuha. 42 Ahatulajizya kuuti tulumbililaje avhantu amazwi aminza, nu kufumwa uvhusimishizi kuuti uweene we uMulungu amuvhiisile kuuti avhe mulonzi uwa vhapuuma na vhafwe. 43 UYeesu uyo we avhakuvhwi vhonti vháyanzile kuuti, wonti we alimwitiha, aliswilwa uvhutalamalandu vhwakwe kwi zina lyakwe.”
Vhe te Vhayuuda vhakumuposheela uMupepo uMufinjile
44 UPeeteli lwe akuyanga amazwi igo, uMupepo uMufinjile ahavhiishila vhonti vhe vhahatejelezyaga. 45 AVhayuuda vhe vhámwitisile uYeesu vhe vháali nu Peeteli vhahasukumila lwe vhaalola kuuti, avhantu vhe te Vhayuuda vhoope ishikunjilwa isha Mupepo uMufinjile shavhiishila. 46 Havhili vhásukumiiye mwe pe vhívuuye vhakuyanga ku njango injeni kumutiima uMulungu.
Pe uPeeteli ahati, 47 “Avhantu ivha vhoope vhamuposheela uMupepo uMufinjile inza vwe niiswe twámuposheleeye. Wu naanu we angahaana kuuti vhatahoozelwe na minzi?” 48 Pe ahalajizya kuuti uKolineeliyo na vhamwavho vhoozelwe kwi zina ilya Yeesu Chilisiti. Pisinda, vhahamulaavha kuuti adiile navho ku nsiku nyinsi.