8
1 Isiku liila lye vhámugozile uSiteefani, amayimba amapiti gahataliha mu shivhanza isha ku Yelusaleemu. Avhantu vhonti avha mu shivhanza vhahasataana mu nsi iya mu Yudeeya ni ya mu Samaliya. Ileelo avhatumwa vheeka vhe vhahasyala. 2 Avhantu vhe vhahamushindihaga uMulungu vhahamusyila uSiteefani, nu kuloosya amaloosyo amapiti nkaani. 3 Ahavhaliilizyo iho aha mayimba, woope uSaavhuli ahavhavwalanganyaaga avhantu avha mu shivhanza. Ahinjilaga mu nyumba zyavho, ahavhadendemulaga avhanaavuli na vhantanda nu kuvhakunga mu jeela.
UFiilipo akulumbiilila mu Samaliya
4 Avhantu ivho vhe vhásatiine vhahanda kulumbiilila Izwi iLyinza ponti pe vhahasogolaga. 5 UFiilipoa woope ahasogola mu nkaaya iya mu Samaliya, ahanda kulumbiilila aMazwi aga Chilisiti. 6 Avhantu avhinji lwe vhiivwa amazwi ge uFiilipo ahalumbililaga nu kulola ivilolesyo vwe ahavhombaga, pe vhahamutejeelezya ku mwoyo wooka. 7 Ahazihalipilaga impepo inkandamanu mu vhantu avhinji, lwe zikufuma zihazumaga ahalanga. Ahavhaponiaga avhinji vhe vháhataliiye, na vhantendya. 8 Pe kuhavha uluseshelo nkaani mu nkaaya iyo.
USiimoni umulozi
9 Mu nkaaya iyo iya Samaliya, mwámile umuntu wumo we áali mulozi, izina lyakwe vhahatinji uSiimoni. Ahavhasukumizyaga avhantu vhonti mu nsi iya Samaliya ku mayele aga vhulozi vhwe ahavhombaga, havhili ahayibaadaga kuuti uweene muntu umupiti. 10 Avhantu vhonti, avhapiti na vhansi, vhahamutejelezyaga, vhahatinji, “Umuntu uno we maha aga Mulungu ge vhakuti aMaha aMapiti.” 11 Avhantu vhahamutejelezyaga, mwe pe insiku inyinji ahavhasukumizyaga ku mbombo zyakwe izya vhulozi.
12 Ileelo uFiilipo lwe alumbiilila Izwi iLyinza ilya vhumwene uvhwa Mulungu ni zya izina ilya Yeesu Chilisiti, vhahazyitiha, vhahoozelwa avhanaavuli na vhantanda. 13 USiimoni woope ahamwitiha uYeesu, ahoozelwa, ahanda kumulandata uFiilipo kwonti. Ahasukumilaga lwe akulola ivilolesyo na mafindango amapiti ge uFiilipo ahavhombaga.
14 Ku Yelusaleemu, avhatumwa avha Yeesu vhahiivwa kuuti avhantu avha mu Samaliya vhoope vhalyitisile Izwi ilya Mulungu. Pe vhahavhasonteelezya avha Peeteli nu Yoohani kuukwo. 15 Vhoope lwe vhaafiha, vhahavhalaavhila avhantu ivho kuuti vhamuposheele uMupepo uMufinjile, 16 mwe pe atáliipo umuntu inga wooka muli ivho we uMupepo uMufinjile ámwishiiye. Nkandi vhózeliilwe kwi zina ilya Mwene uYeesu vhweleele. 17 Pe avha Peeteli nu Yoohani vhahavhavhiishila inyoovhe izya shipuuto, vhoope vhahamuposheela uMupepo uMufinjile.
18 USiimoni lwe aalola kuuti avhantu ivho vhamuposheela uMupepo uMufinjile kwi dala ilya kuvhavhiishila inyoovhe izya vhatumwa, ahaavhapa impiiya avha Peeteli nu Yoohani, ahavhalaavha ahati, 19 “Mumpe amaha igo niine, kuuti, inga umuntu wonti we namuvhiishila inyoovhe, woope aposheelaje uMupepo uMufinjile.”
20 UPeeteli ahamwamula ahati, “Uteejele ukutali, iwe pooka ni mpiiya zyaho! Ukusiivha kuuti ungaakala ishikunjilwa isha Mulungu! 21 Iwe utali pooka niiswe mu mbombo ino, mwe pe umwoyo waaho muvhiivhi ku minso aga Mulungu. 22 Ishi, utonte imbiivhi zyaho izyo, umulaavhe uMwene uYeesu, kuuti akuswile ku nsiivho zyaho imbiivhi izyo. 23 Nkuvhwenyi kuuti uli nu mwone nkaani, havhili imbiivhi zyaho zikulemeleeye.” 24 USiimoni ahamwamula ahati, “Imwe mundaavhile kwa Mwene, inga zitahanaaje naazimo muli izyo zye mwayanga!”
25 Avha Peeteli nu Yoohani lwe vhaafumwa uvhusimishizi nu kulumbiilila izwi ilya Mwene uYeesu kuukwo, vhahanda kugaluha mu Yelusaleemu. Lwe vhali mwi dala, vhahalumbililaga izwi ilyinza mu nkaaya inyinji izya mu Samaliya.
UFiilipo akuyanga nu mupiti uwa ku Isyopiya
26 Isiku limo uhavhizya uwa MWENE uMulungu ahamuvhuuzya uFiilipo ahati, “Sogoola ku luvhazu ulwa ku ntende kutuushila idala liila lye likufuma ku Yelusaleemu kusogola ku Gaaza.” (Idala ili lihatuuhaga mwi laala.) 27 Pe uFiilipo ahasogola, ahanda kujenda mwi dala ilyo. Ahavhaliilizyo hanaaho, mwi dala ilyo mwámile uMusyopiya wumo we áamile mu vhulendo uvhwa kuvhwela kuhaaya. Umuntu uyo áamile wu towaashi,b ahasengulaga ivintu ivwa mpiiya impiti ivwa Kandaake (Kandaake kwe kuuti, usamwene uwa nsi iyo iya Isyopiya). Umupiti uyo ápezile asogooye ku Yelusaleemu kumupuuta uMulungu, ishi ahavhwelaga kuhaaya. 28 Lwe akuvhwela, átendiime mwi kokoteeni lyakwe, ahavhazyaga mwi kalaata ilya mukuvhwi uYisaayi.
29 Pe uMupepo uMufinjile ahamuvhuuzya uFiilipo ahati, “Sogoola naluvhiilo halandate ikokoteeni liila, ulifishile.” 30 Pe uFiilipo ahashimbiilila, ahalifishila. Ahiivwa umupiti uyo akuvhaazya mwi kalaata ilya mukuvhwi uYisaayi, ahamuvhuziilizya ahati, “Amazwi igo ge ukuvhaazya, vhuli, ukugamanya?” 31 Ahamwamula ahati, “Ingagamanya vhuli she ataliipo umuntu uwa kunsambiilizya amazwi iga?” Ahamulaavha uFiilipo kuuti ayinjile mwi kokoteeni lyakwe muula, vhatendame pooka. 32 UVhusimbe uVhufinjile uvhwo vhwe umupiti uyo ahavhazyaga, vhukuti,
“Vhámulongoleziizye ngati ngʼonzi ye vhakusogola kuyivhoola,
ápuumile vhweleele, inza ahagonzi vwe hakupuuma lwe vhakuhatenda amasepe.c
33 Vhahamusuupizya nu kumuvhaazya kuuti mutalamalandu, ileelo atávhomvile naashimo.
Umuntu nuumo atangapanga izya mpaapo zyakwe,
mwe pe vhámugozile she atapaafile.”d
34 Umupiti uyo ahamuvhuuzya uFiilipo ahati, “Nkulaavha kuuti umbuuzye, amazwi iga umukuvhwi áyanzile kuzya naanu? Vhuli, ku zyakwe wuuyo, pamo kuzya muntu uwunji?” 35 Pe uFiilipo ahandila mu Vhusimbe uVhufinjile wunuuwo, kumusambiilizya Izwi iLyinza ilya Yeesu.
36 Lwe vhakujenda mwi dala, vhahafiha pe páamile aminzi. Umupiti uyo ahamuvhuuzya uFiilipo ahati, “Yeenya! Aminzi iga ipa. Shooni she shingandinda kuuti intahoozelwe?” 37 UFiilipo ahamwamula ahati, “Inga wamwitiha uYeesu Chilisiti ku mwoyo waaho wonti, ungoozelwa.” Umupiti uyo ahamwamula ahati, “Niitiha kuuti uYeesu Chilisiti Mwana wa Mulungu.”e 38 Pe ahimiilisya ikokoteeni liila, vhahiiha, vhahinjila mu minzi, uFiilipo ahamwozya. 39 Ileelo lwe vhaafuma mu minzi, naluvhiilo uMupepo uwa MWENE uMulungu ahamusompola uFiilipo. Umupiti uyo atahamulola havhili, ileelo ahajendeelela nu vhulendo vhwakwe ku luseshelo nkaani. 40 UFiilipo woope ahaaga kwe ali mu nkaaya iya mu Azooto, aheepa ipo. Lwe ali mu vhulendo, ahatuuhaga mu nkaaya zyonti izya mwi dala kulumbiilila avhantu aMazwi aMinza, pe ahafiha mu nkaaya iya Kayisaaliya.