17
Ivho mu nkaaya iya Tesaloniiki
1 Avha Paavhuli nu Siila lwe vheepa ku Fiilipi, vhahatuuha mu nkaaya iya Amufipooli ni ya Apoloniya, vhahafiha mu nkaaya iya Tesaloniiki. Pa Tesaloniiki ipo páamile isinagoogi ilya Vhayuuda. 2 UPaavhuli ahinjilaga mwi sinagoogi inza vwe wáamile umwata waakwe. Ku havhaliilizyo aha Sabaato zitatu ahavhalumbililaga kutuushila mu Vhusimbe uVhufinjile. 3 Ahalovhosyaga nu kuvhasimishizya kuuti uChilisiti akwanzilwa kuyimba nu kuzyuha. Ahavhavhuzyaga ahatinji, “UYeesu we nkumulumbiilila kuli imwe wu Chilisiti.” 4 AVhayuuda vhamo vhahagiitiha amazwi igo. Vhoope vhe te Vhayuuda avhinji vhe vhahamushindihaga uMulungu, pooka na vhantanda avhinji avhashindamu, vhahiitiha. Vhonti vhahavha pooka nu Paavhuli nu Siila.
5 Ileelo aVhayuuda vhe vhatítisile, umwone wuhavhalema, vhahavhasonjeelezya avhantu avhavhiivhi kufuma mu nsokoni, pe vhahavhavhungaaniha avhantu avhinji nu kwanda kupela ivho ipiti mu nkaaya yonti. Vhahayigoma inyumba iya Yaasoni, vhahavhalondola avha Paavhuli nu Siila, inga vhavhatwale pi vhungaana ilya nkaaya. 6 Lwe vhatavhaaga, vhahamulema uYaasoni pooka na Vhachilisiti vhamo, vhahavhatwala ku maha ku vhapiti avha nkaaya, uku vhakuzuma ahalanga kuuti, “Avhantu ivha vhe vhakupela ivho ipiti mu nsi zyonti. Ishi vhinzile mu nkaaya yiitu. 7 UYaasoni we avhaposheleeye ku kwakwe. Vhonti vhakusuufwa indajizyo zye uKayisaalia azivhiisile, vhakuti, aliipo umwene uwunji we vhakuti uYeesu.” 8 Avhapiti avha nkaaya iyo pooka ni mpuga iya vhantu, lwe vhiivwa inongwa izyo, vhahasaaga nkaani. 9 Avhapiti ivho vhahavhavhuuzya avha Yaasoni na vhamwavho kuuti vhafumwe ivwa kuyipinjiha, pe vhahavhitishizya kuuti vhasogole ku kwavho.
Avha Paavhuli nu Siila mu nkaaya iya Belooya
10 Uvhusiku, aVhachilisiti vhahavhavhuuzya avha Paavhuli nu Siila kuuti vhasogole ku nkaaya iya Belooya. Lwe vhaafiha kuula, vhahinjila mwi sinagoogi ilya Vhayuuda. 11 Avhantu avha ku Belooya vháamile vhatehamu kuluusya avha ku Tesaloniiki. Avheene vhahalyitiha izwi ilya Mwene uYeesu ku mwoyo wonti, vhahenyelezyaga aMazwi aMafinjile amanda gonti, inga vhasimishizye inga zye avha Paavhuli nu Siila vhakuyanga zya nalyoli. 12 AVhayuuda avhinji pooka na vhanaavuli na vhantanda avha Shiyunaani avhashindamu, vhahamwitiha uYeesu.
13 Ileelo aVhayuuda avha ku Tesaloniiki, lwe vhaamanya kuuti uPaavhuli akulumbiilila Izwi ilya Mulungu ku Belooya, kwope vhahasogola, vhahapela ivho ipiti nu kuyisonjeelezya impuga iya vhantu. 14 Pe avhamwavho avha ku Belooya vhahamunyatula uPaavhuli naluvhiilo, vhahamuvhuuzya kuuti asogole na vhamo ku luvhazu kwa sumbi, ileelo uSiila nu Tiimoti vhahasyala ku Belooya. 15 Vhaala vhe vhámusindishiiye uPaavhuli vhahamufisya mu nkaaya iya mu Aseene. Lwe vhakugaluha, uPaavhuli ahavhalajizya vhavhavhuuzye avha Siila nu Tiimoti kuuti, vhamulandate naluvhiilo.
UPaavhuli akuyanga na vhantu avha ku Aseene
16 UPaavhuli lwe akuvhaguliilila avha Tiimoti nu Siila mu Aseene, ahalola inkaaya iyo yili ni viholanyo ivwinji ivwa vhalungu. Pe umwoyo waakwe wuhaviitwa nkaani. 17 Kuli izyo ahayangaga mwi sinagoogi na Vhayuuda na vhantu avhanji vhe vhínjiiye mu shipuuto isha Vhuyuuda. Havhili amanda gonti, ahayangaga na vhantu vhe ahahomaanaga navho ku nsokoni.
18 Mu nsokoni umwo, mwámile avhasambiilile vhamo vhe vhahatinji aVhaepikulewob na Vhasitoyiiki.c Ivho vhahanda kuvhuzilizanya nu Paavhuli. Vhamo vhahati, “Umuntu we akuyangaana uno akwanza kuuti vhuli?” Vhamo vhahati, “Yikuloleha kuuti akulumbiilila izya vhalungu avhajeni.” Vháyanzile isho mwe pe uPaavhuli ahalumbililaga Izwi iLyinza kuzya Yeesu nu kuzyuha. 19 Pe avhasambiilile ivho, vhahamutwala uPaavhuli pa lukuvhato lwavho lwe vhahatinji Alewopaago. Pe vhahamuvhuuzya vhahati, “Insambiilizyo injeni izyo zye ukuvhasambiilizya avhantu, tuvhuuzye niiswe tuzimanye. 20 Twivuuye kuuti, waleeta insambiilizyo injeni, tukwanza kumanya vwe zili.” 21 Vhahamuvhuuzya vhwevhulo, mwe pe aVhaseene na vhanji vhonti vhe vhahatendamaga umwo vhatahavhombaga ishinji naashimo, nkandi lye lipangwi ilya kuyanga nu kutejeelezya inongwa injeni.
22 Pe uPaavhuli ahimiilila pahati pa lukuvhato ulwo, ahati, “Mwe vhantu vha mu Aseene! Nkulola kuuti mulemeleeye nkaani inongwa izya shipuuto. 23 Lwe nkutuuha mu nkaaya ino, imvivhwenyi iviholanyo vwe mukuvipuuta. Havhili inshivhwenyi ishifinjilo isha kufumwizya impuutile she shisimviilwe amazwi ge gakuti: KWA MULUNGU WE ATAMANYISILE. Ishi, uMulungu uyo, we mukumupuuta ishisita kumumanya, we nkwanza kuvhalumbiilila.
24 UMulungu uyo, we ahapela insi na vwonti vwe vili muumwo, havhili wu Mwene uwa ku mwanya na pa nsi. Uweene atakutendama mu nyumba imfinjile zye zikuzengwa na vhantu. 25 Atakuvhombelwa na vhantu fwe akwanza shimo ku kwavho, mwe pe uweene we akuuvhapa avhantu uvhulanzi nu mwuyu ni vintu vwonti. 26 Kufuma kwa muntu wooka, ahapela inkolo izya vhantu vhonti, kuuti vhatendame mu nsi yonti. Kufuma hali ahavhavhiishila amanda na pa kutendama. 27 UMulungu ahavhomba vhwevhulo, inga avhantu vhamulondole, lumo vhangamwaga kwi dala ilya kupulumba. Ileelo uweene atali ukutali nu muntu wonti, 28 inza vwe umuntu wumo áyanzile kuuti, ‘Iswe muhati yaakwe mwe tukutendama nu kujenda nu kuvha swe vhapuuma.’ Havhili vhamo mu vhasimvi vhiinyu avha nyimbo vhátili, ‘Iswe swe vhaana vhaakwe.’”
29 UPaavhuli ahajendeelela kuyanga kuuti, “Mwe pe iswe swe vhaana vha Mulungu, tutakwanzilwa kusiivha kuuti, uMulungu aholiine ni shiholanyo she vhagomvile ku sahaabu poosye ku mpiiya, poosye ku mavhwe. Iviholanyo ivwo vikugombwa ku vhumanyi ni njeele izya vhantu. 30 Amanda aga hali, ge avhantu vhahavhombaga uvhupukupuuku uvhwo, uMulungu áyivhiisile fwe atahalolaga. Ileelo ishi akuvhalajizya avhantu vhonti kwonti kuuti vhapindushe. 31 Akuvhalajizya isho, mwe pe avhiisile isiku lye alivhalonga avhantu vhonti mu vhwanalyoli, kwi dala ilya muntu we amusavhuuye. UMulungu avhasimishiziizye avhantu vhonti izyo, kwi dala ilya kumuzyusya umuntu uyo.”
32 Avhantu avha mu lukuvhato ulwo, lwe vhiivwa vwe uPaavhuli ayanga izya kuzyuha, vhamo vhahanda kumujevhula. Ileelo vhamo vhahamuvhuuzya vhahati, “Tukwanza kutejeelezya havhili inongwa izyo.” 33 Pe uPaavhuli ahavhaleha, aheepa pa lukuvhato. 34 Avhantu vhamo vhahamwitiha uYeesu, vhahanda kumulandata uPaavhuli. Muli ivho áliipo uDiyoniisiyo we áali mu lukuvhato ulwa Alewopaago nu mwantanda wumo, we izina lyakwe áali wu Damaali, pooka na vhanji.