16
UTiimoti akuvhalandata avha Paavhuli nu Siila
1 Pisinda uPaavhuli ahafiha ku Deelibe suuti, havhili ahafiha ku Lisitila. Ku Lisitila ukwo ahatendamaga nu umulandati wumo uwa Yeesu, we izina lyakwe vhahatinji uTiimoti. Unyina waakwe áamile Muyuuda, we ámwitisile uYeesu, ileelo uyise waakwe áamile Muyunaani. 2 AVhachilisiti avha ku Lisitila na ku Ikooniya vhahamuyanjilaga uTiimoti kuuti, áamile nu lujendo ulwinza. 3 UPaavhuli ahanzaga kuuti uTiimoti amulandate, ahamunyatula nu kumutahiili. Ahavhomba vhwevhulo mwe pe aVhayuuda vhonti vhe vhahatendamaga ukwo vhámanyile kuuti, uyise waakwe atáamile Muyuuda. 4 Pe uPaavhuli na vhamwavho vhahatuuha mu nkaaya izya kuula, vhahavhapanga aVhachilisiti indajizyo zye zyávhisiilwe na vhatumwa na vhasongo avha shivhanza ku Yelusaleemu kuuti vhazishindihaje. 5 Ivivhanza vihagomaga mu lwitiho na Vhachilisiti vhahonjelaga amanda gonti.
UPaavhuli akulola injozi iya pa minso amazelu
6 UMupepo uMufinjile ávhahaanile avha Paavhuli na vhamwavho kuuti, vhatahalumbiilile izwi ilya Mwene uYeesu mu mukowa uwa Aasiya. Pe vhahatuuha mu nsi iya Fuligiya, ni ya Galaatiya. 7 Lwe vhaafiha mu nshinji iya nsi iya Miisiya, vhahanzaga kwinjila mu mukowa uwa Betiniya, ileelo uMupepo uwa Yeesu ahavhahaana. 8 Pe vhahatuuha mu Miisiya, vhahasogola mu nkaaya iya Tolowa. 9 Uvhusiku, uPaavhuli ahalola injozi iya pa minso amazelu. Mu njozi iyo, umuntu wumo uwa ku mukowa uwa Makedooniya áyimiliiye, ahalambilizyaga ahatinji, “Lamba ku Makedooniya, uyinze utwavwe.” 10 Lwe uPaavhuli aalola injozi iyo, tuhamanya kuuti uMulungu atwisite kuuti, tuvhalumbiilile avhantu ivho Izwi iLyinza. Pe tuhayisengaanya naluvhiilo kusogola ku Makedooniya.
ULiidiya akumwitiha uYeesu
11 Pe tuhafuma ni meeli ku Tolowa, tuhafiha mu nsi inyuumu ye yili pahati pa sumbi ye vhakuti iSamotilaake. Indaavhi yaakwe tuhajendeelela kushuula, tuhafiha mu nkaaya iya mu Neyapooli. 12 Ipo tuhayileha imeeli, tuheepa ulwa pa nsi, tuhafiha mu Fiilipi, inkaaya ye yákumusile nkaani mu wilaaya ye yili mu mukowa uwa Makedooniya. Mu nkaaya iyo aVhaluumi vhahatendamaga nu kukonzya. Tuhatendama umwo ku havhaliilizyo aha nsiku nyinsi.
13 Isiku ilya Sabaato tuhafuma kunzi ku nkaaya, tuhasogola pa luvhazu pi jenje, twásuvhiiye kuuti tungapaaga apa kumupuutila uMulungu. Lwe twapaaga tuhatendama, tuhanda kuyanga na vhantanda vhe vhávhungiine penepo. 14 Mu vhe vhahatutejelezyaga, áliipo umwantanda wumo we vhahatinji uLiidiya, áali wa mu nkaaya iya mu Tiyatiila. Uyo atáali Muyuuda ileelo áyinjiiye mu shipuuto isha Vhuyuuda. Ahavhombaga imbombo iya kukazya amenda aga muhoola uwa mafwomfwo. UMwene uYeesu ahawiigula umwoyo waakwe, ahagaposheela amazwi ge uPaavhuli ahayangaga. 15 Ahoozelwa uweene pooka na vhantu avha mu nyumba yaakwe, ahatulambiilizya kuuti tusogole ku kwakwe, ahati, “Inga mwandola kuuti nalyoli namwitiha uMwene uYeesu, mwinjile mu nyumba yaane, mutendame.” Pe ahatusinjiilizya kuuti, tusogole nawo.
Avha Paavhuli nu Siila vhakukungwa mu jeela
16 Isiku limo, lwe tukusogola apa kumupuutila uMulungu, tuhahomaana nu mulindu wumo we áamile ni mpepo inkandamanu izya kulagulila. Umulindu uyo ahavhinjizizyaga avhapiti vhaakwe ilonka ipiti ku mbombo yaakwe iya kulagula. 17 Uweene ahanda kuvhalandata avha Paavhuli niiswe, ahahoolaga kwi izwi ipiti ahatinji, “Avhantu ivha vhavhomvi avha Mulungu umupiti uwa ku mwanya, vhakuvhalumbiilila imwe idala ilya vhuposhi!” 18 Ahavhombaga vhwevhulo insiku inyinji. Ileelo isiku limo uPaavhuli ahaviitwa nkaani, ahamushevhela nu kuyivhuuzya impepo iyo kuuti, “Nkukulajizya kwi zina ilya Yeesu Chilisiti kuuti, fuma mwa mulindu uno!” Naluvhiilo impepo yiheepa.
19 Avhapiti avha mulindu uyo, lwe vhaalola kuuti, idala ilya kulyajila ilonka lyananjiha, vhahavhalema avha Paavhuli nu Siila, vhahavhadendemulila ku nsokoni, pilongolela ilya vhapiti. 20 Vhahavhalonjeela vhahati, “Avhantu ivha Vhayuuda. Vhakuleeta ulwisi mu nkaaya yiitu ino, 21 vhakusambiilizya amaata, ge iswe tu Vhaluumi tutakwanzilwa kugiitiha poosye kugalandata.”
22 Impuga iya vhantu yihavha pooka nu kuvhavhuushila avha Paavhuli nu Siila. Pe avhapiti vhahavhazuula amenda, vhahalajizya kuuti vhahomwe ni ndiisa. 23 Lwe vhaahomwa nkaani, vhahavhakunga mu jeela. Pe avhapiti vhahamulajizya umuguliilizi uwa jeela kuuti avhagulililaje ahinza. 24 Kufumiilana ni ndajizyo izyo, umuguliilizi uyo ahavhavhiiha kwi ziiho nu kuvhakunga ivinama vwavho ni pampa.
25 Lwe yaafiha pa vhusiku pahati, avha Paavhuli nu Siila vhahamulaavhaga uMulungu, nu kwimba inyimbo izya kumutiima. Vhoope avhakungwa avhamwavho vhahatejelezyaga. 26 Naluvhiilo kuhavha ishisumbi ishipiti, shihayinzaanya ulwalo ulwa ijeela. Inyiiji zyonti zihiiguha na manyoloolo ge vhávhakunjiiye avhakungwa gahasatuha. 27 Umuguliilizi ahavhuuha. Lwe aalola kuuti inyiiji zyigusile, ahasiivha kuuti avhakungwa vhonti vhashimbiiye. Ahakuula ipanga lyakwe inga ayigoje. 28 Ileelo uPaavhuli ahamuvhilishila kwi izwi ipiti, ahati, “Utahayigoje! Swenti tuliipo umu.”
29 Umuguliilizi ula ahalajizya kuuti vhaleete inyaale. Lwe vhamuleetela, ahinjila naluvhiilo muhati, ahayisumba pa vinama ivwa vha Paavhuli nu Siila uku akutetema. 30 Ahavhafumwa kunzi, ahavhavhuziilizya ahati, “Mwe vhamwene! Inkonzye vhuli, inga imbwaje uvhuposhi?” 31 Vhahamwamula vhahati, “Umwitishe uMwene uYeesu, niiwe kwe upokwe pooka na vhantu avha mu nyumba yaaho.” 32 Vhahamusambiilizya izwi ilya Mwene pooka na vhantu vhonti avha mu nyumba yaakwe. 33 Ahavhaliilizyo he haala aha vhusiku, ahavhanyatula, ahavhoozya amalonda gaavho, pe uweene na vha mu nyumba yaakwe vhahoozelwa ishisita kuhaavha. 34 Pe ahavhanyatula avha Paavhuli nu Siila, ahasogola navho ku kwakwe, ahaavhapa ishaakulya. Uweene pooka na vhantu vhonti avha mu nyumba yaakwe vhahaseshela nkaani mwe pe vhámwitisile uMulungu.
35 Lwe kwasha, avhapiti avha nkaaya vhahasonteelezya avhapiti avha vhasikaali kwa muguliilizi uwa jeela, vhahati, “Vhasatule avhantu ivho.” 36 Umuguliilizi uyo ahamuvhuuzya uPaavhuli ahati, “Avhapiti avha nkaaya vhafumwizye indajizyo kuuti imbasatule, ishi fumi kunzi, uMulungu avhateteesye.”
37 Ileelo uPaavhuli ahavhavhuuzya avhapiti avha vhasikaali ahati, “Vhaatuhomile nkaani pilongolela pa vhantu nu kutukunga mu jeela ishisita kutuvhuziilizya, niiswe swe Vhaluumi.a Ishi shooni she vhakwanza kutusatula ku kwilu? Zitangavha vhwevhulo haa! Vhinze vhuuvho vhatufumwe.” 38 Avhapiti avha vhasikaali vhahavhavhuuzya izyo avhapiti avha nkaaya. Vhoope lwe vhiivwa kuuti avha Paavhuli nu Siila Vhaluumi, vhahoogopa nkaani. 39 Vhahinza kuvhalambiilizya, vhahavhafumwa mu jeela, vhahavhalaavha kuuti, vheepe mu nkaaya yiila. 40 Avha Paavhuli nu Siila, lwe vhaafuma mu jeela, vhahasogola kwa Liidiya. Vhahahomaana na Vhachilisiti avhamwavho, vhahavhasuvhaalizya, pe vhaheepa.