6
Vhakuvhasevha avhatuuli saba avha vhatumwa
1 Insiku izyo, uvhwinji uvhwa vhalandati avha Yeesu vhuhonjelaga nkaani. Muli ivho, vháliipo aVhayuuda vhe vhahayangaga injango iya Shiyunaania na vhe vhahayangaga injango iya Shihebuuli. Isiku limo kuhafumila kuyivhuna. AVhayuuda vhe vhahayangaga iShiyunaani vhahayivhunaga kuuti avhafwile vhaavho vhahavhaluvwaga kuvhagavhila ivwakulya insiku zyonti. 2 Pe avhatumwa vhaala kumi na mbiili vhahavhavhungaaniha avhalandati vhonti, vhahavhavhuuzya vhahati, “Te hinza kuuti iswe tuleshe kusambiilizya izwi ilya Mulungu, inga tuvhagavhilaje avhantu ivwakulya. 3 Ishi vhamwitu, kuli imwe musevhe avhantu saba vhe vhali nu lujendo ulwinza, vhe vhizuuye uMupepo uMufinjile nu kuvha nu vhushindamu uvhwa njeele nkaani. Ivho vhe tuvhavhiishe mu mbombo ino iya kugavhanya ivwakulya, 4 niiswe tujendeelele kumulaavha uMulungu, nu kusambiilizya avhantu izwi lyakwe.”
5 Izwi ilyo lihahondela nkaani pilongolela lyavho. Pe vhahamusevha uSiteefani, umuntu we áyizuuye ulwitiho nu Mupepo uMufinjile. Havhili vhahamusevha uFiilipo nu Pulokolo nu Nikanooli nu Tiimoni nu Palimeena nu Nikolaawo uwa ku Antiyookiya, we atáamile Muyuuda, ileelo áyinjiiye mu shipuuto isha Vhuyuuda. 6 Vhahavhavhiiha pilongolela ilya vhatumwa. Pe avhatumwa ivho vhahavhapuutila, nu kuvhavhiishila inyoovhe pamwanya yaavho kuvhaloota.
7 Izwi ilya Mulungu lihajendeelela kukumuha mu vhantu, avhalandati avha Yeesu vhahonjelaga kuvha avhinji mu Yelusaleemu, na vhapuuti avhinji vhoope vhahamwitihaga uYeesu.
Vhakumulema uSiteefani
8 UMulungu ámupiiye uSiteefani uvhwila na maha aminji, ahavhombaga amafindango ni vilolesyo ivipiti ku vhantu. 9 Ileelo aVhayuuda vhamo vhahalinga kudalinkana nu Siteefani. Ivho vháfumile mwi sinagoogib lye vhahatinji ilya Vhantu aVhasatulwe. Vhamo muli ivho vháfumile mu nkaaya iya ku Kileene, na ku Alekizandeliya, vhamo vháfumile mu mukowa uwa Kiliikiya nu wa Aasiya. 10 Ileelo ahavhapootaga mwe pe ahayangaga amazwi aga njeele ku maha aga Mupepo uMufinjile.
11 Pe vhahavhavhiiha avhantu vhamo, inga vhayanje ilenga kuuti, “Twivuuye uSiteefani akuyanga amazwi aga kumusaamula uMoosec nu Mulungu!” 12 AVhayuuda ivho, vhahavhaviisya nkaani avhasongo vhaavho na vhasambiilizi avha ndajizyo izya Moose,d pooka na vhantu avhanji. Pe vhahamulema uSiteefani, vhahamutwala pa lukuvhato ulupiti ulwa vhalongozi avha Vhayuuda. 13 Vhahavhaleeta avhasimishizi avha ilenga pa lukuvhato ulwo, pe avhasimishizi ivho vhahati, “Umuntu uno, atakuleha kuyanga amazwi aga kuliga iNyumba iMfinjile ni ndajizyo izya Moose! 14 Twamwivuuye akuyanga kuuti, uYeesu uwa ku Nazaleeti aliyinanganya iNyumba iMfinjile ino, havhili aligalulanya amaata ge uMoose átulesheeye.”
15 Avhantu vhonti vhe vhátendiime mu lukuvhato ulwo, vhahamutontomela uSiteefani ku minso, vhahalola ku minso gaakwe kwavha ngati wu havhizya.