5
Ilenga ilya Ananiiya nu Saafila
1 Ileelo páamile umuntu wumo, we izina lyakwe vhahatinji uAnaniiya, pooka nu mushi waakwe uSaafila. Vhoope vhahakazya umugunda waavho. 2 Impiiya zye vháposheleeye ku mugunda uwo, uAnaniiya ahazyiha zimo ku kwilu, umushi waakwe woope ámanyile. Impiiya zye zyásyaye, uAnaniiya ahazitwala ku vhatumwa avha Yeesu uku akuti zye ziniizyo vhweleele.
3 Ileelo uPeeteli ahamuvhuuzya ahati, “Ananiiya! Shooni she waaleha uSeetano ayinjila mu mwoyo waaho? Wafishila kumulumila ilenga uMupepo uMufinjile, wazyiha impiiya zimo zye uposheleeye mu mugunda waaho. 4 Lwe ushiili kukazya, waamile mugunda waaho! Poosye lwe waakazya, waamile nu vhwamuzi kuvhombela impiiya izyo zye uposheleeye vwe ukwanza weneewe! Shooni she uhasiivha nu kuvhomba ilyo mu mwoyo waaho? Utamulumiiye ilenga muntu, nkandi umulumiiye wu Mulungu!”
5 UAnaniiya lwe ayiivwa amazwi igo, ahagwa pansi, ahafwa. Avhantu vhonti vhe vhívuuye inongwa izyo, vhahoogopa nkaani. 6 Pe avhajaaha vhahimiilila, vhahawugwinkanizya umuvhili waakwe nu mwenda, vhahawufumwa panzi, vhahasogola kuwusyila.
7 Lwe isaala zitatu ishi zyatuuha, umushi uwa Ananiiya woope ahinjila mu nyumba yiila, ishisita kumanya zye zivhombesile. 8 UPeeteli ahamuvhuziilizya ahati, “Mbuuzya, impiiya zye mwakaziizye umugunda wiinyu, vhuli zye ziniizi?” Ahamwamula ahati, “Nalyoli, zye ziniizyo.” 9 UPeeteli ahamuvhuuzya ahati, “Shooni she mwitinkiine nu mulume waaho kulinga kumulumila ilenga uMupepo uMufinjile uwa MWENE uMulungu? Tejeelezya! Vhe vhamusyila umulume waaho, ivho vhali panzi pa mulyango, niiwe vhakuwutwala umuvhili waaho panzi nu kusogola kuwusyila.”
10 Panaapo, uSaafila woope ahagwa pa vinama vwa Peeteli, ahafwa. Avhajaaha vhaala lwe vhinjila, vhahaaga uSaafila woope afuuye. Vhahawufumwa umuvhili waakwe panzi, vhahawusyila pa luvhazu pa mulume waakwe. 11 Ilyoga ipiti lihavhalema avhantu vhonti avha shivhanza, pooka na vhanji vhonti vhe vhívuuye izyo.
Avhatumwa avha Yeesu vhakuvhomba amafindango
12 Ku maha aga Mulungu, avhatumwa avha Yeesu vhahavhombaga ivilolesyo na mafindango ku vhwinji mu vhantu. Avhantu vhe vhámwitisile uYeesu vhonti, vhahavhungaanaga pa Nyumba iMfinjile, mwi Idala iLyilishe ilya Solomooni.a 13 Avhantu vhe vhatámwitisile uYeesu vhahavhatiimaga nkaani. Poosye shiniisho, naawumo we álinzile kuvhalandata ku nongwa iya kwogopa. 14 Ileelo vhe vhahamwitihaga uMwene uYeesu vhahonjelaga nkaani, avhanaavuli na vhantanda.
15 Pe kufumililana niizyo, avhantu vhahavhavhiihaga avhavhinu mu madala mu mazagala, na mu vilili, kuuti uPeeteli lwe akutuuha, poosye nga shinzyunguuli shaakwe shivhafishile vhamo vhapone. 16 Avhantu avhinji vhahafumaga mu nkaaya izya mu luvhazu mu Yelusaleemu, vhahavhaleetaga avhavhinu, na vhaala vhe vhálemiilwe ni mpepo inkandamanu, vhonti ivho vhahaponaga.
Avhatumwa avha Yeesu vhakuyimba
17 Pe umupuuti umupiti, pooka na vhamwavho vhonti avha mpuga iya Vhasadukaayi, umwone wuhavhalema nkaani kuzya vhatumwa avha Yeesu. 18 Pe vhahavhalema, vhahavhakunga mu jeela. 19 Ileelo uvhusiku vhuula uhavhizya uwa MWENE uMulungu ahinza, ahiigula inyiiji izya mu jeela, ahavhafumwa panzi, ahavhavhuuzya ahati, 20 “Sogooli mwimiilile ku Nyumba iMfinjile, muvhavhuuzye avhantu amazwi gonti aga vhulanzi uvhwa shiima.” 21 Pe avhatumwa ivho lwe vhiivwa amazwi igo, vhahasogola ku Nyumba iMfinjile inzanshi nkaani, vhahataliha kuvhasambiilizya avhantu.
Ahavhaliilizyo hanaaho umupuuti umupiti, pooka na vhamwavho, vhahavhiiha ulukuvhato ulwa vhalongozi, pooka na vhasongo vhonti avha Vhayuuda. Vhahavhasonteelezya avhaguliilizi ku jeela, kuuti vhavhaleete avhatumwa vhaala. 22 Ileelo lwe vhinjila mu jeela, vhahaaga avhatumwa ivho naavhamo mwenemwo. Vhahagaluha ku vhapiti, vhahavhavhuuzya vhahati, 23 “Lwe twafiha mu jeela muula, twazile inyiiji nyigalile vhweleele, avhaguliilizi vhimiliiye mu malyango vhakuguliilila. Ileelo, lwe twigula inyiiji, tutamwazile umuntu nuumo muumwo!” 24 Umupiti uwa vhaguliilizi avha Nyumba iMfinjile pooka na vhapiti avha vhapuuti ivho, lwe vhiivwa izyo, vhahasaaga nkaani, vhahavhuzilizanya vhahati, “Inongwa izi kuuti zivhe vhuli?”
25 Pe ahinza umuntu wumo, ahavhavhuuzya ahati, “Yeenyi, avhantu vhaala vhe mwavhakunzile mu jeela, vhali ku Nyumba iMfinjile vhakusambiilizya avhantu.” 26 Pe umupiti uwa vhaguliilizi na vhaguliilizi avhamwavho, vhahasogola kuvhaleeta avhatumwa vhaala. Ileelo vhatávhalemile ku maha, mwe pe vhógofile kuuti avhantu vhangavhahoma na mavhwe.
27 Lwe vhavhaleeta vhahavhimiilisya pilongolela pa lukuvhato ulwa vhalongozi, umupuuti umupiti ahataliha kuvhavhuziilizya ahati, 28 “Twavhahaanile ku maha kuuti, mutasambilizyaje avhantu izya Yeesu! Ileelo mukujendeelela kukumusya insambiilizyo zyinyu mu nkaaya yonti iya mu Yelusaleemu, mukwanza yiloleshe kuuti niiswe tuli nu mulandu uwa kumugoga!”
29 UPeeteli na vhatumwa avhamwavho vhahamwamula vhahati, “Tukwanzilwa kumushindiha uMulungu, kuluusya kuvhashindiha avhantu! 30 Imwe mwámugozile uYeesu kwi dala ilya kumuhomeela pa shihovhenkanyo, ileelo uMulungu uwa vhasookulu vhiitu ahamuzyusya. 31 Ahamuzuvwa nu kumuvhiiha ku nyoovhe yaakwe iya kundiilo, kuvha Wusongo, havhili kuvha Muposhi, inga uMulungu atwavwe tu Vhaisilayeeli tuvhe ni dala ilya kupinduha nu kuswilwa uvhutalamalandu vhwitu. 32 Niiswe twe vhasimishizi avha zyonti izyo, pooka nu Mupepo uMufinjile, we uMulungu avhapiiye vhonti vhe vhakumushindiha.”
33 Avhapiti vhaala lwe vhiivwa izyo, zihaavhasya amooyo gaavho, vhahanzaga kuvhagoga. 34 Ileelo, áliipo uMufalisaayi wumo, izina lyakwe vhahatinji uGamaliyeeli. Uyo áamile musambiilizi uwa ndajizyo izya Moose, we avhantu vhonti vhahamushindihaga. Pe uweene ahimiilila pa lukuvhato luula ulwa vhalongozi, ahalajizya kuuti, vhavhafumwe panzi avhatumwa vhaala ku havhaliilizyo hansi. 35 Pe ahavhavhuuzya avhapiti avhamwavho ahati, “Imwe mu vhanaavhuli vha Isilayeeli, ili lye mukwanza kuvhomba ku vhantu ivha, muvhe minso nalyo. 36 Mukumbushe amanda aga pisinda, áfumiiye umuntu wumo izina lyakwe vhahatinji uTewuda, ahayibaadaga kuuti muntu mupiti, áamile na vhalandati vhaakwe miya ine ishi. Ileelo ku mpeleela, vhahamugoga, na vhaala vhonti vhe vhahamulandataga vhahasataana. Imbombo yaakwe yonti yihasilila pe paala. 37 Havhili pisinda, ahavhaliilizyo he isilikaali yihavhavhazyaga avhantu, áfumiiye uYuuda uMugalilaaya, uno woope ahavhalongozya avhantu kuuti avhe ni mpuga yaakwe nu kupindula insi. Ileelo woope vhahamugoga, vhaala vhonti vhe vhahamulandataga vhoope vhahasataana. 38 Ishi nkuvhavhuuzya kuuti, muyeefwe mu vhantu ivha. Vhaleshe vhasogolaje, mwe pe inga insiivho zyavho, na zyonti zye vhakuvhomba zikufuma ku vhantu, zikusila zyeka. 39 Ileelo, inga zikufuma kwa Mulungu, te muhole kuvhadinda, nkandi mukuvha mukumudinda wu Mulungu wuuyo.”
40 Pe vhahiitiha amazwi aga Gamaliyeeli, vhahavhiita avhatumwa vhaala, vhahalajizya kuuti vhahomwe. Vhahavhahaana kuuti vhatasambilizyaje havhili ku maha aga izina ilya Yeesu, vhahavhitishizya kuuti vhasogolaje kumwavho.
41 Avhatumwa vhoope vhahafuma pa lukuvhato ulwa vhalongozi, uku vhashiiye, mwe pe uMulungu avhwenyi kuuti vhahondeeye kusaamulwa kuzya izina ilya Yeesu. 42 Vhatahaleha kusambiilizya avhantu nu kuvhalumbiilila Izwi iLyinza kuuti uYeesu wu Chilisiti, vhahajendeelela kusambiilizya nu kulumbiilila insiku zyonti ku Nyumba iMfinjile, na mu nyumba izya vhantu.