IMbombo izya Vhatumwa
1
1 Wamwitu Teyofiilo, mwi kalaata lyane liila itanzi,a nákusimbiiye vwe uYeesu ahavhombaga, na vwe ahasambilizyaga, kufuma ku vhwandilo uvhwa mbombo yaakwe, 2 kufishila isiku lye ányatuliilwe kusogola ku mwanya. Lwe áshiili kunyatulwa, uMupepo uMufinjile ahamulongola kuvhalajizya avhatumwa vhaakwe vhe ávhasavhuuye, vwe yikwanzilwa vhavhombaje imbombo. 3 Ku havhaliilizyo aha nsiku alubaayini kufuma pe ázyusile, ahavhaloleshelaga ulwinji avhatumwa vhaala. Ahavhasimishizyaga ulwinji kuuti uweene mupuuma, havhili ahavhasambilizyaga inongwa izya vhumwene uvhwa Mulungu.
4 Isiku limo, lwe uYeesu ahalyanga pooka navho, ahavhalajizya ahati, “Mutaheepe mu nkaaya iya mu Yelusaleemu, nkandi muguliilile munuumu, kufishila ahavhaliilizyo he muliposheela ishikunjilwa, kwe kuuti uMupepo uMufinjile. Isho she shikunjilwa she uTaata uMulungu áfinzile, ulufingwi ulwo lwe nkavhavhuzyaga. 5 UYoohani ahavhozyaga avhantu na minzi, ileelo ku havhaliilizyo aha nsiku nyinsi vhweleele zye zikwinza, imwe muliyoozelwa nu Mupepo uMufinjile.”b
UYeesu akunyatulwa kusogola ku mwanya
6 Lwe avhatumwa vhavhungiine pooka nu Yeesu, vhahamuvhuziilizya vhahati, “Vhuli, Mwene, ahavhaliilizyo iha he ukuvhavhiishila havhili aVhaisilayeeli uvhumwene vhwavho?” 7 UYeesu ahavhavhuuzya ahati, “Amanda na havhaliilizyo aha nongwa, te mbombo yiinyu kumanya, nkandi uTaata wuuyo avhiisile ku maha gaakwe amapiti. 8 Ileelo kwe muposheele amaha lwe uMupepo uMufinjile akuvhiishila imwe. Pe muliivha mwe vhasimishizi vhaane mu Yelusaleemu, na mu mukowa wonti uwa mu Yudeeya nu wa mu Samaliya, nu kufishila ku mpeleela iya nsi.”
9 Lwe uYeesu ayanga izyo, pe ahanyatulwa kusogola ku mwanya, she avhatumwa vhonti vhakulola. Ivhingo lihamudindila, vhatahamulola havhili. 10 Lwe vhakujendeelela kwenya ku mwanya vwe akusogola, naluvhiilo avhahavhizya vhavhili vhe vházwaye amenda amazelu vhahavhaloleshela vhimiliiye papiipi navho, 11 vhahati, “Mwe vhanaavuli vha mu Galilaaya, shooni she mwimiliiye ipa nu kutontomela ku mwanya? UYeesu uno we anyatulwa kufuma kuli imwe, aligaluha havhili vhwevhulo inza vwe mwamulola akusogola ku mwanya.”
Vhakumupwanizya uMatiiya pa Yuuda
12 Pe avhatumwa avha Yeesu vhaheepa pi gamba ilya Mazayituuni, vhahagaluha ku nkaaya iya Yelusaleemu, ye yáali uvhutali uvhwa kilomiita yookac kufuma pi gamba ilyo. 13 Lwe vhinjila mu nkaaya, vhahazuvha mu shumba isha pamwanya mu nyumba injelenkanu, vhahinjila mu shumba isho, mwe vhahatendamaga. Ivho vháamile vhe vhano: uPeeteli nu Yoohani nu Yaakobu nu Andeleeya nu Fiilipo nu Toomasi nu Batolomaayo nu Mataayi nu Yaakobu umwana wa Alufaayo nu Siimoni uZelooted nu Yuuda umwana wa Yaakobu. 14 Ivho vhonti vhahavhungaanaga kulaavha, pooka na vhantanda vhamo nu Maliiya unyina wa Yeesu na vhazuuna avha Yeesu.
15 Isiku limo, avhantu miya mooja na shiliini ishi vhe vhámwitisile uYeesu vhávhungiine pooka. Pe uPeeteli ahimiilila pahati yaavho, 16 ahavhavhuuzya ahati, “Mwe vhamwitu, zye zyásimviilwe mu Vhusimbe uVhufinjile kuzya Yuuda, we ávhalongooye avhantu vhaala vhe vhámulemile uYeesu, zyanzikwilwe zivhombeshe. Izyo zye uMupepo uMufinjile áyanzile kwi lomu ilya sookulu wiitu uDaavhudi. 17 Ku vhwandilo uYuuda áamile pooka niiswe twe vhatumwa, ásavhuliilwe kuuti twavwane kuvhomba imbombo.”
18 Uweene ahaposheela impiiya kuzya kuvhomba imbiivhi, pe impiiya izyo ahakalila umugunda. Mu mugunda uwo mwe ahagwa pansi, ulwanda luhatumbunkana, uvhula vhuhafuma panzi. 19 Inongwa izyo zihamanyiha mu vhantu vhonti avha mu Yelusaleemu. Pe umugunda wuula wuhiitwa ku njango yaavho kuuti Akeludaama, kwe kuuti uMugunda uwa Mavhanda.e
20 UPeeteli ahajendeelela kuyanga kuuti, “Izyo zye uDaavhudi ásimvile mwi kalaata ilya Zabuuli kuuti,
‘Pa vhutendamo vhwakwe pasyale litongo,
patahaavhe umuntu we angatendama puupo.’f
Havhili yisimviilwe kuuti,
‘Imbombo yaakwe iya kulongozya anyatule umuntu uwunji.’g
21 Kuli izyo yikwanzilwa tumusevhe umuntu uwunji wooka we ajendaje pooka niiswe mu mbombo, avhanje akufumwa uvhusimishizi kuuti uMwene uYeesu azyusile. Umuntu uyo, yikwanzilwa tumusevhe kufuma mu vhaala vhe vháamile niiswe ahavhaliilizyo honti lwe uMwene ahatandaalaga kuli iswe. 22 Avhe áliipo kufuma lwe uYoohani ahozyaga avhantu, kufishila amanda gaala ge uYeesu ányatuliilwe kuli iswe kusogola ku mwanya.”
23 Pe avhantu vhe vhámwitisile uYeesu, vhahasaavhula avhantu vhavhili. Wumo áamile wu Yoosefu uBalisaaba we izina ilyamwavho vhahatinji uYuusito, nu wamwavho, vhahatinji uMatiiya. 24 Lwe vhavhasaavhula vhahamulaavha uMulungu vhahati, “We MWENE, iwe umanyile zye zili mu mooyo aga vhantu vhonti. Ishi utulanje ula we umusevile muli ivha, 25 inga apwanile pa mbombo iya vhutumwa ye uYuuda áyilesile, ahafwa, ahasogola pe pamuhondeeye wuuyo kuposheela isunde.” 26 Pe vhahahoma ulutambu,h ulutambu luhamugwila uMatiiya, woope ahonjela ku vhatumwa kumi na mooja.