IMbombo izya Vhatumwa 2

Avhantu vhakumuposheela uMupepo uMufinjile

¹ Lwe isiku ilya Pentekoositi lyafiha, avhantu vhonti vhe vhámwitisile uYeesu, vhávhungiine pooka. ² Naluvhiilo izwi lihivwiha kufuma ku mwanya. Izwi ilyo lyáli ngati nkungu impiti ye yikuvugula, lihiizula mu nyumba yonti mwe vhátendiime. ³ Vhahalola ivintu vwe vili ngati mwoto we wukulilimuha, vihatapunkana nu kumugwila wooka wooka. ⁴ Avhantu vhonti vhahiizula uMupepo uMufinjile, vhahataliha kuyanga ku njango izinji, inza vwe uMupepo uMufinjile ávhaloosite.

⁵ Mu Yelusaleemu umwo, vháliipo aVhayuuda vhe vhahamushindihaga uMulungu. Ivho vháfumile mu nsi zyonti. ⁶ Lwe vhiivwa izwi ilyo, vhahavhungaana pooka avhantu avhinji, vhahasukumila, mwe pe ivho vhonti vhahivwaga vhakuyanga ku njango zyavho. ⁷ Vhahahasamala nu kusukumila vhahati, “Vhuli, avhantu ivha vhe vhakuyanga isho, te vha mu Galilaaya? ⁸ Vhulivhuli iswe swenti tukwivwa zye vhakuyanga mu njango zye twápafiilwe nazyo? ⁹ Muli iswe, vhamo vhafumile mu nsi iya Vhapaliiti ni ya Vhameedi ni ya Vhayelaami ni ya Vhamesopotaamiya. Vhamo vhafumile mu mukowa uwa Yudeeya nu wa Kapadokiya nu wa Ponto nu wa Aasiya ¹⁰ nu wa Fuligiya nu wa Pamufiiliya na mu nsi iya Miisili. Vhamo vhakufuma imbazu izya nsi iya Liibiya zye zipalamiine ni nkaaya iya Kileene, avhanji vhinzile kufuma mu nkaaya iya Luumi. ¹¹ Vhamo vhafumile mu nsi inyuumu iya pahati pa sumbi ye vhakuti iKileete, na mu mukowa uwa Alaabiya. Muli iswe, vhaliipo aVhayuuda na vhantu avhanji vhe vhinjiiye mu shipuuto isha Vhuyuuda. Swenti tukwivwa vwe vhakuyanga mu njango zyitu, vhakumutiima uMulungu ku mbombo zyakwe impiti!”

¹² Avhantu vhonti vhahasukumila nkaani nu kusaaga, vhahavhuzilizanya vhahati, “Ishi she shooni?” ¹³ Ileelo vhamo munuumwo vhahataliha kuvhajevhula vhe vhámwitisile uYeesu, vhahayanga vhahati, “Ivha vhahoziilwe lipele.”

UPeeteli akuvhila

¹⁴ Pe uPeeteli ahimiilila pooka na vhatumwa avhamwavho vhaala kumi na mooja, ahataliha kuvhavhilila avhantu vhaala kwi izwi ipiti kuuti, “Mwe Vhayuuda vhamwitu, na muvhanji mwenti mwe mukutendama pa Yelusaleemu, mutejeelezye hinza amazwi ge nkuvhavhuuzya. ¹⁵ Avhantu ivha vhatahoziilwe inza vwe mukusiivha, mwe isaala izi saa taatu inzanshi! ¹⁶ Izi zye uMulungu áyanzile kutuushila kwa mukuvhwi uYooweli kuuti,

¹⁷ ‘Ku manda aga ku mpeleela,

ndiivhapa avhantu vhonti uMupepo waane ku vhwinji.

Avhaana vhiinyu avhanaavuli na vhalindu vhalifumwaga uvhukuvhwi,

avhaana vhiinyu avhajaaha vhalilolaga injozi izya pa minso amazelu,

vhoope avhasongo vhiinyu vhalilootaga injozi.

¹⁸ Mu manda igo ndiyiita uMupepo waane ku vhwinji

poosye ku vhavhomvi vhaane avhanaavuli na vhantanda,

vhoope vhalifumwaga uvhukuvhwi.

¹⁹ Ndivhombaga amafindango ni vilolesyo ku mwanya na pa nsi.

Ipo paliivha amavhanda nu mwoto

ni lyosi ilyinji nkaani.

²⁰ Izuvha liligalunkana kuvha hiisi,

nu mwezi wuliivha mushemamu inza amavhanda.

Zyonti izyo zililoleha

lwe uvhushindamu uvhwa Mwene vhushiili kuloleha

pi siku liila ipiti ilya kwinza kwakwe.

²¹ Ahavhaliilizyo iho, umuntu wonti

we alilyitiha nu kulisuuvhila izina ilya Mwene aliipokwa.’”

²² UPeeteli ahajendeelela kuyanga kuuti, “Mwe vhanaavuli vha mu Isilayeeli, tejeelezyi amazwi iga! UMulungu avhalolesiizye imwe kuuti akuvhomba imbombo kutuushila kwa Yeesu uwa ku Nazaleeti. Mweneemwe mumanyile hinza kuuti kwa Yeesu wunuuyo kwe avhomvile amafindango ni vilolesyo ivwa mavhiila mu mavhiila kuli imwe. ²³ Inza vwe uMulungu ámanyile nu kusivhiilila kuvhomba kufuma hali, ahamuleeta uYeesu kuli imwe. Niimwe muhamugoga kwi dala ilya kuvhasonjeelezya avhantu avhavhiivhi kuuti vhamuhomeele pa shihovhenkanyo. ²⁴ Ileelo uMulungu ahamuzyusya, ahamusatula mu mayimba aga vhufwe, mwe pe vhutáali na maha aga kumumeneelezya. ²⁵ Usookulu wiitu uDaavhudi áyanzile izya Yeesu átili,

‘Nkamulolaga uMWENE uMulungu kwilongolela lyane insiku zyonti,

havhili ali pooka niine ku luvhazu lwane ulwa ku ndiilo kunaavwa,

kuli izyo ntangoogopa.

²⁶ Umwoyo waane wuhasansamuha,

pe nkaluluuta ku luseshelo.

Havhili umuvhili waane wuliivha nu lusuuvhilo,

²⁷ mwe pe te uhandeshe ku vhuzimu,

poosye kwitishila kuuti umuvhili waane vhufishile kuvhola,

ine ne mufinjile waaho.

²⁸ Undanzile amadala aga vhulanzi.

Ulimpa uluseshelo ulupiti nkaani mwe pe indi pooka niiwe.’

²⁹ Vhamwitu, ntangavhazyiha kuuti usookulu wiitu uDaavhudi áfuuye, avhasookulu vhiitu vhahamusyila, imbiipa yaakwe yili panaapa kufishila ileelo. ³⁰ Ileelo uDaavhudi ámanyile kuuti uMulungu álafile ku lufingwi kuuti alimupwaniha umuntu uwa luho lwakwe mu vhumwene vhwakwe. Havhili mwe pe áali mukuvhwi, ³¹ ávhwenyi zye zilifumila. Pe ahayanga izya kuzyuha kwa Chilisiti kuuti, uMulungu te ahamuleshe ku vhuzimu, poosye kwitishila kuuti umuvhili waakwe vhufishile kuvhola.

³² UMulungu ahamuzyusya uYeesu uyo, swenti tusimishiziizye inongwa izi. ³³ Lwe uMulungu amuzyusya, ahamuzuvwa nu kumuvhiiha ku luvhazu lwakwe ulwa kundiilo. Pe ahaposheela uMupepo uMufinjile kufuma kwa Taata, we áfinzile, ahatwitila weneewo ku vhwinji, izyo zye mukuzilola, nu kuzyivwa. ³⁴ UDaavhudi atázuvile ku mwanya, nkandi uweene áyanzile atili,

‘UMWENE uMulungu ámuvhuziizye uMwene waane átili,

“Tendama ku luvhazu lwane ulwa ku ndiilo,

³⁵ kufishila lwe navhavhiiha avhalugu vhaaho

pansi ya vinama vwaho kuuti vhakushindishe.”’”

³⁶ UPeeteli ahati, “Ishi, aVhaisilayeeli vhonti vhamanye kuuti uYeesu we imwe mwámugozile pa shihovhenkanyo, uMulungu amuvhiisile kuvha wu Mwene havhili wu Chilisiti.”

³⁷ AVhayuuda vhaala, lwe vhiivwa inongwa izyo zihaavhasya nkaani ku mooyo gaavho. Pe vhahavhavhuziilizya avha Peeteli pooka na vhatumwa avhamwavho vhahati, “Vhamwitu, ishi tuhonzye vhuli?” ³⁸ UPeeteli ahavhaamula ahati, “Mwenti mupindushe nu kwozelwa kwi zina ilya Yeesu Chilisiti, inga muswilwe uvhutalamalandu vhwinyu nu kuposheela ishikunjilwa, kwe kuuti uMupepo uMufinjile. ³⁹ Ulufingwi ulwo uMulungu áfinzile kuli imwe na ku vhaana vhiinyu na ku vhantu avha kutali, kwe kuuti ku vhaala vhonti vhe uMWENE uMulungu alivhiita.”

⁴⁰ UPeeteli ahajendeelela kuvhasoha nu kuvhahomeelezya avhantu vhaala ku mazwi aganji aminji, ahati, “Imwe muyiposhe, mutahinze musundwe pooka na vhantu avhavhiivhi avha havhaliilizyo iha!” ⁴¹ Avhantu avhinji vhahagiitiha amazwi gaakwe isiku liila, vhahoozelwa, vhahonjela avhantu vhe vháfishiiye elufu taatu ishi.

Uvhutuulano uvhwa vhantu vhe vhámwitisile uYeesu

⁴² Avhatumwa avha Yeesu vhahasambilizyaga izwi ilya Mulungu ku vhaala vhe vhámwitisile. Vhonti vháamile nu vhutuulano, vhahamensulanaga ikaati nu kulya pooka, nu kumulaavha uMulungu pooka. ⁴³ Avhatumwa vhahavhombaga amafindango aminji ni vilolesyo ivwinji, na vhantu vhonti vhahasukumilaga nkaani nu kumushindiha uMulungu. ⁴⁴ Avhantu vhe vhámwitisile uYeesu, vhonti vháamile pooka, havhili ivintu vwavho vhahagavhanaga vhonti. ⁴⁵ Vhahakazyaga ivintu vwavho ni mpiiya zye vhaposheela, vhahazigavhanyaaga kulandatana na vwe vhásovheliilwe. ⁴⁶ Vhahavhungaanaga pa Nyumba iMfinjile insiku zyonti. Havhili vhahavhungaanaga mu nyumba zyavho kumensulana ikaati nu kulya ishaakulya shaavho pooka ku mwoyo umwinza na ku luseshelo. ⁴⁷ Vhahamutiimaga uMulungu, nu kuvhahondezya avhantu vhonti. Insiku zyonti uMwene uYeesu ahonjezyaga avhantu avhanji vhe vhahapokwaga.