3
UPeeteli akumuponia untendya
1 Isiku limo ahavhaliilizyo aha kulaavha, saa tisa iya musanya, avha Peeteli nu Yoohani vhahasogolaga ku Nyumba iMfinjile. 2 Ipo páamile umuntu wumo we áamile wu ntendya kufuma kupaapwa. Avhantu vhahamuvhusyaga nu kumuvhiiha pa mulyango uwa Nyumba iMfinjile insiku zyonti. Umulyango uwo avhantu vhahatinji, uMulyango uMwinza. Vhahamuvhiihaga inga alaavhaje impiiya ku vhantu vhe vhahinjilaga mu lupitu ulwa Nyumba iMfinjile.
3 Umuntu uyo, lwe avhalola avha Peeteli nu Yoohani vhakwinjila mu Nyumba iMfinjile, ahavhalaavha vhamupe impiiya. 4 Pe uPeeteli nu Yoohani vhahamutontomela, uPeeteli ahamuvhuuzya ahati, “Twenye!” 5 Woope umuntu uyo ahavheenya nu kusuuvhila kuuti kwe vhamupe shimo.
6 Ileelo uPeeteli ahamuvhuuzya ahati, “Ine intali ni mpiiya, ileelo lye ngavhwezya kuvhomba, kwe nkuvhombele. Ku maha aga izina ilya Yeesu Chilisiti uwa ku Nazaleeti, yimiliila ujendaje!” 7 UPeeteli ahamulema umuntu uyo inyoovhe iya ku ndiilo nu kumwimiilisya. Panaapo vhweleele ivihankala ivwa mu vinama ivwa muntu ula vihagoma. 8 Ahimiilila naluvhiilo, ahataliha kujenda weeka. Uweene pooka nu Peeteli nu Yoohani vhahinjila mu lupitu ulwa Nyumba iMfinjile. Ahajendaga kumo akudovha nu kumutiima uMulungu. 9 Avhantu vhonti vhahamulola akujenda wuuyo weeka kumo akumutiima uMulungu. 10 Pe vhahamumanya kuuti, we wula we ahatendamaga nu kulaavha impiiya pa mulyango uwa Nyumba iMfinjile we vhahatinji uMulyango uMwinza. Vhonti vhahasukumila nkaani ku zye zyávhombesile ku kwakwe.
UPeeteli akulumbiilila
11 Umuntu ula we vhámuponiizye, lwe akuvhalandata avha Peeteli nu Yoohani, avhantu vhonti vhahasukumilaga nkaani. Pe vhahanda kuvhashimbiilila kufishila pe vhahatinji Idala iLyilishe ilya Solomooni.a 12 UPeeteli lwe avhalola avhantu ivho, ahavhavhuuzya ahati, “Mwe vhantu vha mu Isilayeeli, shooni she mukusukumila kuli izi? Shooni she mukututontomela iswe? Mukuti umuntu uno twamuponia ku maha giitu, pamo mwe pe iswe tuli nu lujendo ulwinza ku minso aga Mulungu? 13 UMulungu uwa vhasookulu vhiitu, avha Abulahamu nu Yisaaka nu Yaakobu, amushindisile umuvhomvi waakwe uYeesu, we imwe mwámulonjeleeye ku vhapiti nu kumuhaana lwe uPilaato akuti amusatule. 14 Imwe muhamuhaana uYeesu, we Mufinjile wa Mulungu havhili Wa Nalyoli. Ileelo muhalaavha kuuti, umuntu we mugozi we asatulwe! 15 Muhamugoga uweene we áali vhwandilo uvhwa vhulanzi, ileelo uMulungu ahamuzyusya. Iswe tusimishiziizye izyo. 16 Ishi umuntu uno we mukumulola, mumumanyile. Izina ilya Yeesu nu kulyitiha izina ilyo, vwe vwamupa amaha. Inza vwe mukumulola mwenti, aapona mwe pe amwitiha uYeesu.
17 Ishi vhamwitu, imanyile kuuti imwe na vhapiti vhiinyu mwávhomvile izyo mwe pe mutámanyile. 18 Ileelo uMulungu kuli izyo zye zyávhombesile, ágalunjisiizye amazwi gaala ge áyanzile kutuushila mu vhakuvhwi vhaakwe vhonti, kuuti uChilisiti waakwe aliyimvilwa. 19 Ishi pindushi nu kuzileha imbiivhi zyinyu, mumulandate uMulungu inga avhaswile uvhutalamalandu vhwinyu. Pe haliyinza ahavhaliilizyo he mulisankaana, mwe pe muliivha nu MWENE uMulungu. 20 Havhili, alivhaleetela uChilisiti we ávhasevheeye kufuma hali, we we wu Yeesu. 21 UYeesu akwanzilwa kusyala ku mwanya, kufishila ahavhaliilizyo he uMulungu alivigalulanya ivintu vwonti kuvha vipwa, inza vwe uweene áyanzile kufuma hali, kutuushila ku vhakuvhwi vhaakwe avhafinjile. 22 Mwe pe umukuvhwi uMoose áyanzile atili, ‘Muli imwe, uMWENE wiinyu uMulungu alivhasevhela umukuvhwi we ali inza ine. Amazwi gonti ge umukuvhwi uyo alivhavhuuzya, muhagatejelezyaje ahinza. 23 Umuntu wonti we alihaana kumutejeelezya umukuvhwi uyo, uMulungu alimwefwa mu vhantu vhaakwe nu kumulovwa.’b 24 Poosye avhakuvhwi vhonti, kwandila umukuvhwi uSaamweli na vhanji vhe vhámulandasite, vháfumwizye uvhukuvhwi ku zyonti zye zikuvhombeha insiku izi. 25 Izyo zye uMulungu áyanzile kutuushila ku vhakuvhwi ivho, imwe mwe mukuziposheela. Havhili zye uMulungu áfinzile na vhasookulu vhiinyu, imwe mwe mukuziposheela. UMulungu áfinzile nu sookulu wiitu uAbulahamu kuuti, ‘Avhantu avha mu nkolo zyonti mu nsi yonti vhalilootwa kutuushila mu vhazukulu vhaaho.’c 26 Pe lwe uMulungu amusevha umuvhomvi waakwe uYeesu,d ahamusonteelezya kuli imwe suuti, inga avhaloote kwi dala ilya kuvheefwa mu mbiivhi zyinyu.”