16
UYeesu akuzyuha
(Mataayi 28:1-8; Luuka 24:1-12; Yoohani 20:1-10)
1 Isiku ilya Sabaato ahvhaliilizyo aha hamazuuvha pa Chiyeeluka, uMaliiya uwa ku Magidala nu Saloome nu Maliiya unyina wa Yakobo, vhahakala amafuta aga kununchila, inga vhawupashe umuvhili uwa Yeesu. 2 Isiku ilya pa Mulungu, inzanchi nkaani, vhahasogola ku mbiipa, vhahafiha lwe izuvha lyadula. 3 Vhahavhuzilizanyaaga vhahatinji, “Wu naanu we kwe atugalagasizye ivhwe liila lye lili pa mulyango uwa mbiipa?” 4 Ileelo lwe vheenya pa mbiipa, vhahalola ivhwe liila ipiti nkaani vhalyefwizye, lili pa luvhazu pa mbiipa. 5 Lwe vhinjila mu mbiipa vhahaaga umulumendoa atendiime kuluvhazu ulwa ku ndiilo, azwaye umwenda umuzelu, vhoope vhahahasamala.
6 Woope umulumendo ula ahati, “Mutahasamalaje. Mukumulondola uYeesu uwa ku Nazaleeti, we vhamuhomeleeye. Ataliipo ipa! Yeenyi pe vhaamukasiizye. Azyusile! 7 Ishi sogooli, mumuvhuuzye uPeeteli na vhasundikwa avhamwavho vhonti, muti avhalongoleeye kusogola ku Galilaaya. Kwe kwe mumulole, inza vwe ávhavhuziizye.” 8 Pe avhantanda vhaala vhahafuma naluvhiilo mu mbiipa, vhahatetema nu kuhasamala. Vhatahamuvhuuzya umuntu nuumo, mwe pe vháamile ni lyoga.
UYeesu akumuloleshela uMaliiya na vhasundikwa vhavhili
(Mataayi 28:9-10; Yoohani 20:11-18; Luuka 24:13-35)
[ 9 Lwe azyuha inzanchi pa Mulungu, uYeesu ahamuloleshela ulwa kwanda uMaliiya uwa ku Magidala we amwefiizye impepo inkandamanu saba. 10 Woope uMaliiya ula, ahasogola kuvhavhuuzya vhe vhahavhanga nu Yeesu. Ahavhaliilizyo iho vhahavhanga vhakuloosya nu kukuuta. 11 Ileelo vhoope lwe vhiivwa kuuti uYeesu mupuuma, havhili kuuti uMaliiya uwa ku Magidala amuvhwenyi, vhahahaana kwitiha.
12 Pe ileelo uYeesu ahavhaloleshela avhasundikwa vhavhili vhe vháfumile mu nkaaya kusogola ku mwavho, áali ni sheeni ishinji. 13 Vhoope vhahasogola kuvhavhuuzya avhasundikwa avhamwavho, ileelo vhatahitiha.
UYeesu akuvhasonteelezya avhasundikwa vhaala kumi na moja
(Mataayi 28:16-20; Luuka 24:36-49; Yoohani 20:19-23; IMbombo zya Vhatumwa 1:6-8)
14 Isiku ilyamwavho uYeesu ahavhaloleshela vhaala kumi na moja, lwe vhakulya ishaakulya. Ahavhapilila mwe pe amooyo gaavho gáamile magomu, havhili mwe pe vháhaanile kuvhiitiha vhe vhamuvhwenyi lwe azyuha. 15 UYeesu ahavhavhuuzya ahati, “Musogole mu nsi yonti, mulumbiilile aMazwi aMinza ku vhantu vhonti. 16 Umuntu wonti we ayiitiha nu kwozelwa we alipokwa, ileelo we atakwitiha alilongwa. 17 Amafindango iga, kwe gavhombwaje na vhantu vhe vhakuniitiha. Kwe vhefwaje impepo inkandamanu kwi zina lyane, havhili kwe vhayangaje injango injeni. 18 Inga vhaalema injoha, poosye inga vhangamwela vwe vikuhola, te vivhavhombaje naashimo. Havhili kwe vhavhavhishilaje inyoovhe avhavhinu, vhoope kwe vhaponaje.”
UYeesu akunyatulwa kusogola kumwanya
(Luuka 24:50-53; IMbombo zya Vhatumwa 1:9-11)
19 Pe lwe ayanga navho, uMwene Yeesu ahanyatulwa kusogola kumwanya, ahatendama ku nyoovhe iya ku indiilo iya Mulungu pa vhushindamu kukonzya pooka nawo. 20 Avhasundikwa vhaheepa, vhahasogola kulumbiilila kwonti. UMwene ahavhombaga imbombo pooka navho, ahasimishizyaga izwi lyakwe ku mafindango ge vhahavhombaga.]