Yona
Uvhwandilo
UYona áali mukuvhwi kufuma mu nkaaya iya Gati-Hefa ku Isilaeli. Áamile mwana wa Amitayi uwa mu luho ulwa Zabuloni. UYona ahamuvhombelaga uMulungu havhaliilizyo he umwene uYeloboamu uwa wuvhili ahakonzyaga (vhaazya 2 Vhamwene 14:25). Ahavhaliilizyo iho insi iya Isilaeli yáamile nu vhulugu uvhupiti ni nsi iya Ashulu. UMulungu ámusonteleziizye uYona kusogola ku nkaaya impiti iya Ashulu, ye vhahayiitaga vhahatinji iNinawi, kuvhasoha avhantu vhaleshe imbiivhi zyavho.
Ikalaata ili likutusambiilizya kuuti, uMulungu akuvhakunda avhantu avha mu nsi zyonti. Havhili likutusambiilizya kuuti, umuntu naawumo we angadindila imbaatiho zya Mulungu. UYona ahahaana vwe uMulungu ámwisite, ileelo pisinda ahasogola kwe uMulungu ámusonteleziizye nu kuvhomba inza vwe uMulungu ahanzaga. Pe uYona ahaviitwa nkaani kufumililana vwe uMulungu ávhavhombeeye avhantu avha mu nkaaya iya Ninawi.