Luti
Uvhwandilo
Ikalaata ili likwitwa kwi zina ilya mwantanda we áali wu Luti uwa mu luho ulwa Vhamoabu. AVhamoabu vháali vhapalamani avha nsi iya Vhaisilaeli, ahavhaliilizyo iho yikulolesya kuuti, kwáli ulwivwano ulwinza ku vhapalamani ivha vhavhili. Ikalaata ili lili ni nongwa zye zyáfumiiye lwe avhaamuzi vhahakonzyaga mu Isilaeli (mu maaha 1375-1050 lwe uYesu áshiili kupaapwa). Ahavhaliilizyo iho uvhulongozi uwa shimwene wáshiili kutaliha mu nsi ya Isilaeli. Avhaamuzi vháali vhantu vhe uMulungu ahavhasevhaga kuvhalongozya aVhaisilaeli mu vhulugu ku vhalugu vhaavho. Havhili vhahamulaga inongwa inyinji izya Vhaisilaeli (vhaazya Vhaamuzi 2:10-19).
Ikalaata ili likutusambiilizya kuuti, uvhulootwe uvhwa Mulungu, vhwa vhantu avha nsi zyonti. UMulungu ahamuloota uLuti nu kumuvhiiha kuvha mutanzi wa luho ulwa vhumwene, kwe áfumiliiye umwene uDaudi. Ahavhaliilizyo ahatali, lwe hatuuha, uYesu Chilisiti ahapaapwa mu luho ulwo. Ishikunzi nu vhwila uvhwa Luti vhwe áamile navhwo ku luho lwa mulume waakwe vhukuloleha mwi kalaata ili. Havhili ishikunzi isha Mulungu isha kuvhasunga avhantu vhaakwe nu kuvhapoha vhe vhakuyimba shikuloleha.