Luti 1

Luti

UElimeleki na vhantu avha mu nyumba yaakwe vhakusaamila ku Moabu

^1-2 Mu havhaliilizyo he avhaamuzi vhahakonzyaga mu Isilaeli, áliipo umuntu wumo we izina lyakwe vhahatinji uElimeleki uwa luho ulwa Efulata. Umushi waakwe áali wu Naumi, avhaana vhaakwe avhanaavuli, vháali vhe vha Maloni nu Kilioni, ivha vhonti vháali vha mu nkaaya iya mu Betelehemu mu mukowa uwa Yuda. Vhahasogola kutendama ku nsi iya Moabu, mwe pe insi iya ku mwavho inzala yáguuye. ³ Lwe vháamile kuula, uElimeleki, umulume wa Naumi ahafwa, uNaumi ahasyala na vhaana vhaakwe vhavhili. ⁴ Avhalumendo ivho vhahiimala avhalindu avha mu Moabu, ivho vháali vhe vha Luti nu Olipa. Vhátendiime mu nsi yiila amaaha kumi ishi. ⁵ Mu maaha igo avha Maloni nu Kilioni vhahafwa. Kwe kuuti, uNaumi uyo áfwililiilwe na vhaana vhaakwe vhonti vhavhili, pooka nu mulume.

UNaumi nu Luti vhakusogola ku Betelehemu

⁶ Lwe zyatuuha izyo, uNaumi ahiivwa kuuti, UMWENE avhaloosite avhantu vhaakwe avha ku Betelehemu, avhapiiye ishaakulya. Ahayisengaanya kwepa kufuma ku Moabu, pooka na vhanyinavwala vhaakwe. ⁷ Aheepa paala pe ahatendamaga ahahomaana na vhanyinavwala vhaakwe, vhahalema idala kusogola ku Yuda. ⁸ Woope uNaumi ahavhavhuuzya avhanyinavwala vhaakwe vhavhili ahati, “Nkuvhalaavha kuuti, mugalushe mwenti ku nkaaya izya vhapaafi vhiinyu. Nkumulaavha UMWENE avhaavwe inza vwe mwánavwizye ine na vhantu vhaane vhe vhaahafwa. ⁹ UMWENE avhaloote mwenti, muhiimalwe nu kuvhwaga uvhusunzi mu nyumba zyinyu.” Pe uNaumi ahavhalaga nu kuvhakuukula. Ileelo avheene vhahataliha kukuuta nu kuhoola nkaani. ¹⁰ Vhahati, “Ndaali! Tukusogola swenti ku vhantu vhaaho.”

¹¹ Woope uNaumi ahavhalambiilizya kuuti, “Galuushi vhaana vhaane. Shooni she mukundandata? Ntangapaapa avhaana avha kuvha vhalume vhiinyu. ¹² Vhwelaaji ku mwinyu. Mwe pe ine ne mugoosi, ntangiimalwa havhili. Poosye inga naamile nu lusuvhilo ulwa kunyatulwa uvhusiku vhwi leelo nu kupaapa avhaana, ¹³ vhuli, mungaguliilila vhinze vhakule? Mungajimbiilila mutahanyatulwe na vhanaavuli avhanji? Te muumwo vhaana vhaane. Ku kwane zigomile nkaani kuluusya imwe, mwe UMWENE ampiiye amayimba amapiti nkaani.” ¹⁴ Vhahataliha kukuuta nu kuhoola havhili, pe uOlipa ahamukumbatila, kumulaga kuvhwela kuhaaya, ileelo uLuti ahalandatana nawo.

¹⁵ UNaumi ahamuvhuuzya uLuti ahati, “Yeenya, uwamwinyu agaluha ku mwavho na ku vhalungu vhaakwe, niiwe galuuha, umulandate uwamwinyu.” ¹⁶ Ileelo uLuti ahati, “Utandambilizyaje kuuti ingalushe, havhili kuuti ntakulandataje.

Mwe pe ponti pe ulisogola pe niine ndisogola.

Pe ulitendamaga niine nditendamaga panaapo.

Avhantu vhaaho, niine vhaliivha vhaane,

uMulungu waaho, niine aliivha Mulungu waane.

¹⁷ Paala pe ulifwila nu kusyilwa niine ndifwila nu kusyilwa panaapo.

UMWENE ahampe ulutipo ulupiti inga ngalehaana niiwe,

nkandi vhwe vhufwe vhweka vhulitulehaanya.”

¹⁸ UNaumi lwe aalola kuuti uLuti agomwizye kuvhwela nawo, ahaleha kumusinjiilizya.

¹⁹ Pe vhonti vhavhili vhahajendeelela nu vhulendo kusogola ku Betelehemu. Lwe vhaafiha kuula, avhantu vhonti vhahasukumila na vhantanda vhahati, “Uno ndinga wu Naumi?” ²⁰ UNaumi ahati, “Mutaniitaje havhili kuuti Naumi. Nkandi muniitaje mutinji Mala, mwe pe uMulungu uwa maha gonti ampiiye amayimba amahali nkaani. ²¹ Lwe nkeepaga ipa, náamile navwo vwonti, ileelo ishi uMulungu uwa maha gonti ambwezya inyoovhe zyeka. Shooni she mukuti Naumi lwe UMWENE, uMulungu uwa maha gonti anjimvwizye, havhili ankomile?” ²² Isho vwe uNaumi pooka nu Luti uMumoabu, unyinavwala waakwe, vhágalusile kufuma ku Moabu, nu kufiha ku Betelehemu. Háali havhaliilizyo hakutaliha kuvuna ishayiili.