Luti 2

ULuti akusalaala mu mugunda wa Bohasi

¹ Pa Betelehemu, páali umuntu wumo we izina lyakwe vhahatinji, uBohasi, áamile mupiti havhili wu dumbwe. Áali munine wa Elimeleki, umulume wa Naumi. ² Isiku limo, uLuti uMumoabu ahamuvhuuzya uNaumi kuuti, “Unitishizye insogole kusalaala ku mugunda uwa muntu we anganitishizya. Indi nu lusuuvhilo ulwa kumwaga umuntu uwa kunitishizya kusalaala mwisinda mwe vhakuvuna.” UNaumi ahamwitishizya ahati, “Haya, sogoola mwana waane.” ³ Pe uLuti ahasogola ku mugunda, ahanda kuvhalandata vhe vhakuvuna, ahanda kusalaala vwe vikusyalilishila mwisinda lyavho. Umugunda uwo wáali wa Bohasi, uwa mu luho ulwa Elimeleki.

⁴ Pisinda uBohasi ahafiha pa mugunda kufuma ku Betelehemu, ahavhalamuha vhe vhakuvuna ahati, “UMWENE avhaloote.” Vhoope vhahati, “Niiwe UMWENE akuloote.” ⁵ Woope uBohasi ahamuvhuziilizya umwimiilizi uwa vhe vhakuvuna kuuti, “Umulindu ula vhu naanu?” ⁶ Umwimiilizi ula ahamwamula ahati, “Mulindu wa ku Moabu we ayinzile pooka nu Naumi kufuma ku Moabu. ⁷ Andaavile kuuti, imwitishizye kusalaala mwisinda mwe vhakuvuna. Atalisile kusalaala kufuma inzanchi, asogola shiniishi vhweleele, kutuuzya ku sheegwi.”

⁸ Pe uBohasi ahamuvhuuzya uLuti ahati, “Tejeelezya mwana waane. Utasogolaje kusalaala ku magunda aga vhantu avhanji, nkandi mwe mu mugunda wunuuno. Ulongozanyaaje na vhalindu vhe vhakuvhomba ipa. ⁹ Uvhenyelezyaje pe vhakusogola kuvuna uvhalaje navho. Mbasosile avhalumendo kuuti vhatahasheele kukuyimvwa. Havhili inga wuumilwa ishinyooto, umwelaje aminzi aga mu nsonta ge vhatafile avhalumendo ivho.” ¹⁰ Pe uLuti ahatena pansi nu kumusugamilila uBohasi ku vhutonsu nkaani ahati, “Shooni she wanitishizya nu kumfwila uvhwila, ne muntu uwa nsi iyinji?” ¹¹ UBohasi ahamwamula ahati, “Nivuuye zyonti zye umuvhombeeye unyohovwala waaho kufuma pe umulume waaho áfuuye. Imanyile na vwe uhavhaleha avhapaafi vhaaho, uhayileha ni nsi yaaho, na vwe uhinza kutendama na vhantu vhe utávhamanyile naalumo. ¹² UMWENE akudumbusye ku zyonti zye wazivhomba. UMWENE, Mulungu wa Isilaeli we uvhushimbiliiye uvhusunzi vhwakwe, akupe ilonka ilya ndinga.” ¹³ ULuti ahamwamula ahati, “Mwene, iwe wamfwila uvhwila nkaani, na she ntalingiine na vhavhomvi vhaaho. Nayiivwa ahinza nkaani mu mwoyo waane, mwe pe wansuuvhizya ahinza nkaani, havhili ku vhutonsu.”

¹⁴ Ahavhaliilizyo aha shaakulya, uBohasi ahamuvhuuzya uLuti ahati, “Nzaaga ulye umukati nu kusanzila mu musunyi.” ULuti ahatendama na vhavhomvi, vhoope vhahaamupa ishayiili insaalule. Ahalya, ahiikuta, havhili shimo shihasyala. ¹⁵ ULuti lwe akujendeelela kusalaala, uBohasi ahavhavhuuzya avhavhomvi vhaakwe kuuti, “Muleshe apalamilaje pa nsunzo, mutamuhalipilaje. ¹⁶ Pooka niisho, mumukweselaje insunzo zimo zye muvunile, muleshe asalaalaje, havhili mutamuhalipilaje.”

¹⁷ ULuti ahajendeelela kusalaala kufishila hamazuuvha. Lwe apuula nu kupementa ishayiili, lihafiha idebe lyoka nu kutuuha. ¹⁸ Ahanyatula ishayiili iyo, ahasogola nayo kuhaaya kwa nyinavwala. Havhili ahafumwa ishaakulya she áshilesile lwe ayiikuta, ahaamupa unyinavwala. ¹⁹ Pe unyinavwala waakwe ahamuvhuziilizya ahati, “Usalalaaye kwoshi vwonti ivi? Waamile ku mugunda wa naanu? Alootwe umuntu uyo we akwitishiziizye.” Woope ahamwamula unyinavwala waakwe ahati, “Naamile ku mugunda wa muntu we vhakuti uBohasi.” ²⁰ UNaumi ahamuvhuuzya ahati, “UMWENE we akuvhomba shiima aminza ku kwitu twe vhapuuma na ku vhayazi vhiitu, amuloote uBohasi.” Ahajendeelela kuyanga kuuti, “Umuntu uyo wa luho lwitu. Havhili mujenzi wiitu wa papiipi, we angavha mupwana wiitu.”

²¹ ULuti ahati, “Pooka niizyo, kuuti indongozanyaaje na vhavhomvi vhaakwe avhalindu, kufishila lwe vhaamala kuvuna.” ²² UNaumi ahamuvhuuzya uLuti ahati, “Ndinga mwana waane ulongozanyaaje na vhalindu avha Bohasi, uvhanje waasogooye ku mugunda uwa vhunji vháamile vhakuyimvwaje.” ²³ Pe uLuti ahalongozanyaaga na vhalindu avha Bohasi, ahasalaalaga kufishila lwe imvuno iya ishayiili ni ngana yaasila. Ahavhaliilizyo honti iho ahavhanga akutendama nu nyinavwala waakwe.