Luti 3

ULuti akwanza kupwanwa

¹ Lwe hatuuha ahavhaliilizyo hamo, uNaumi ahamuvhuuzya uLuti ahati, “Vhuli, te hinza mwana waane kuuti inkulondolele uvhusunzi, inga uyiime nu vhutendamo uvhwinza? ² UBohasi we uhalongozanyaaga na vhalindu vhaakwe, te wa luho lwitu? Tejeelezya. Ileelo hamazuuvha, kwe ayiime kwe vhakupuulila ishayiili. ³ Ishi iwe yisengaanye, ugeeze ahinza, upahale amafuta nu kuzwala amenda aminza. Usogole pe vhakupuulila, ileelo utahayilolesye kwa Bohasi. Uleshe aamale kulya nu kumwela. ⁴ Havhili upamanyinsanye pe akukaata, lwe asupiila uholovhele kujenda kusogola puupo, uhamugwinkule ku vinama vwakwe nu kukaata pa luvhazu. Pe uweene kwe akuvhuuzye ilya kuvhomba.” ⁵ ULuti ahati, “Kwe mbombe zyonti zye wambuuzya.”

⁶ Pe ahasogola pe vhakupuulila ishayiili. Ahavhomba inza she shiila vwe unyinavwala waakwe ámulajiziizye. ⁷ UBohasi lwe aalya nu kumwela ahasankaana. Ahasogola papiipi ni lundo ilya ishayiili ahakaata. ULuti ahanyanyatuha kusogola puupo, ahamugwinkula uBohasi ku vinama vwakwe, ahakaata pa luvhazu. ⁸ Pa vhusiku pahati uBohasi ahapampuha, ahagalunkana, ahahasamala lwe ayaaga umwantanda akaasite pa luvhazu! ⁹ Ahamuvhuziilizya ahati, “We naanu?” ULuti ahaamula ahati, “Neene ne Luti, ne muvhomvi waaho. Mwe pe iwe we mujenzi waane uwa papiipi, nkukulaavha kuuti, unsungaje ne mutuuli waaho.”

¹⁰ UBohasi ahati, “UMWENE akuloote. Walolesya umushinzi umupiti ku luho lwitu kuluusya vwe waavhomvile mwisinda kwa nyohovwala waaho. Mwe pe utavhalondooye avhalumendo avhapiina poosye avhadumbwe avha kukwimala. ¹¹ Ishi mulindu waane, utasimililwaje. Kwe nkuvhombele lyonti lye walaavha, mwe pe avhantu vhonti avha mu nkaaya ino, vhakumanyile kuuti we mwantanda uwa mwoyo umwinza. ¹² Nalyoli ne mujenzi uwa papiipi, ileelo aliipo umujenzi uwunji uwa kukupwana we wa papiipi nkaani kuluusya ine. ¹³ Ishi uyiime panaapa uvhusiku uvhu. Indaavhi inzanchi tuheenye inga angiitiha kukupwana, inga aliyiitiha hinza. Inga ahaana kwi zina lya MWENE uweene we mupuuma, ine kwe nkupwane. Kaata ipa kufishila lwe kwakusha.”

¹⁴ Pe uLuti ahakaata paala kufishila inzanchi. Lwe kushiili kusha ahafuma na hiisi, mwe pe uBohasi atahanzaga avhantu vhamanye kuuti, umwantanda akaasite apa kupuulila paala. ¹⁵ UBohasi ahati, “Yaala ishuuvhalo shaaho pansi.” ULuti ahaala, pe uBohasi ahavhiiha ishayiili, yasyaye hansi kuvha lidebe. Ahamutwiha pi itwe, pe uLuti ahavhwela kuhaaya. ¹⁶ Lwe aafiha kuhaaya, unyinavwala waakwe ahamuvhuziilizya ahati, “Zyamile vhuli mulindu waane?” ULuti ahamupanjila zye uBohasi ámuvhombeeye. ¹⁷ Havhili ahati, “Ambuziizye kuuti, ‘Utahasogole kwa nyohovwala waaho inyoovhe zyeka.’ Mwe muumwo ampiiye ishayiili ino.” ¹⁸ Woope uNaumi ahati, “Ishi guliliila suuti, mulindu waane. Tulole lye kwe livhombeshe. UBohasi te aguliilile, kuuti azimale ileelo ili.”