Luti 4

UBohasi akumupwana uLuti

¹ UBohasi ahasogola apa kuvhombela ivhungaana lya vhasongo avha mu nkaaya, ahatendama pansi. Woope umujenzi wa Elimeleki ula we uBohasi ámuyanzile, ahatuuha pe paala. UBohasi ahamwita, ahati, “Mujenzi waane, nzaaga utendame ipa.” Umuntu ula ahinza, ahatendama. ² Pe uBohasi ahavhiita avhasongo kumi avha nkaaya, ahavhalaavha, vhoope vhatendame pe paala, vhoope vhahatendama. ³ UBohasi ahamuvhuuzya umujenzi ula ahati, “Ishi uNaumi we ávhweleeye kufuma ku Moabu, akwanza kuwukazya umugunda we wáamile wa mujenzi wiitu uElimeleki. ⁴ Ishi ine naalola kuuti, inkumanyisye amazwi iga. Inga ungawanza umugunda uno, uwukale nu kuwutavhula, ku minso ga vhasongo vha vhantu vhaane na vhantu vhe vhaliipo ipa. Inga ukwanza, poosye inga utakwanza, uyanje, mwe pe iwe we wa kutaliha kuwutavhula, ine ne wa vhuvhili.” Pe ahati, “Kwe ntavhule.”

⁵ UBohasi ahati, “Hinza, ileelo inga ungawukala umugunda uyo kufuma kwa Naumi, ukwanzilwa kumupwana nu Luti uMumoabu, umuziishe wa mujenzi wiitu uMaloni, kuuti umugunda uyo wusyale mu luho lwa muyazi.” ⁶ Umujenzi ula ahaamula ahati, “Inga vwe zili vhwevhulo, ntangawutavhula umugunda uyo, intahananganye ipwana lya vhaana vhaane. Ine napootwa, upwane weneewe.”

⁷ Amanda gaala, mu maata aga Vhaisilaeli, inga avhantu vhakwanza kutavhula poosye ku kwandulizanya hamo, umuntu we ali ni shuuma ahazuulaga ishilyatu nu kuumupa we akwanza kutavhula. Isho sháali shilolesyo sha kwitinkana. ⁸ Umuntu uyo ahamuvhuuzya uBohasi ahati, “Wutavhule umugunda uyo.” Pe ahazuula ishilyatu shaakwe, ahaamupa. ⁹ Pe uBohasi ahavhavhuuzya avhasongo na vhantu vhe vháamile paala ahati, “Ileelo imwe mwe vhahoome, mwalola kuuti naakala kufuma kwa Naumi, vwonti vwe vwámile vwa Elimeleki, ni vwa Kilioni nu Maloni. ¹⁰ Pooka niizyo, uLuti uMumoabu, umuziishe wa Maloni, namupwana ayiima mushi waane. Mwe pe namupwana uLuti, ishuuma sha muyazi kuuti shisyale mu nyoovhe zya luho lwakwe, ni zina lyakwe te liteeje ku luho ulu poosye na mu hofisi zya nkaaya ino. Imwe mwe vhahoome.”

¹¹ Avhasongo vhonti pooka na vhantu vhe vháliipo paala, vhahiitiha vhahati, “Mwe muumwo, iswe twe vhahoome. UMWENE amuloote umushi waaho apaape avhaana avhinji inza vwe uLaheli nu Leya vhápaafile, vhaala vhe vhányamisiizye uluho lwitu lwonti ulwa Isilaeli. Niiwe ujendeelele kudumbuha mu luho ulwa Efulata, uyiime ni ntiimo mu Betelehemu. ¹² UMWENE akupe avhaana avhinji kutuushila umushi waaho, kuuti inyumba yaaho yinyaame ngati nyumba ya sookulu wiitu uPelesi umwana wa Tamali nu Yuda.”

Uluho lwa Bohasi

¹³ Pe uBohasi ahamunyatula uLuti, kuuti avhe mushi waakwe. Woope UMWENE ahamwavwa uLuti, ahiima pa vhumwamu, ahapaapa umwana umwanaavuli. ¹⁴ Pe avhantanda avha mu nkaaya muula vhahamuvhuuzya uNaumi vhahati, “UMWENE ashindikwaje, mwe pe atakulesile weeka, ileelo ili akupa uwa kukusunga. Woope ayiime nu lushindiho ulupiti mu Isilaeli. ¹⁵ Umwana uyo akugalushizye amaha, akusungaje mu vhugoosi vhwaho. ULuti we amupaafile umwana uno akusungwilwe nu kuukupa uvhutuuli kuluusya uvhutuuli vhwe vhwámile uvhwagaje kufuma ku vhaana saba avhanaavuli.” ¹⁶ Pe uNaumi ahamunyatula umwana ula, ahamupahatila, ahanda kumusunga. ¹⁷ Avhantanda avhapalamani vhahamwita izina kuvha wu Obedi, vhahati, “Vhaati uNaumi ali nu mwana umwanaavuli.” Pisinda uObedi ahamupaapa uYese we ámupaafile umwene uDaudi.

¹⁸ Izi zye mpaapo zya Pelesi:

UPelesi ahamupaapa uHezeloni,

¹⁹ uHezeloni ahamupaapa uLami,

uLami ahamupaapa uAminadabu.

²⁰ UAminadabu ahamupaapa uNashoni,

uNashoni ahamupaapa uSalimoni.

²¹ USalimoni ahamupaapa uBohasi,

uBohasi ahamupaapa uObedi,

²² uObedi ahamupaapa uYese,

woope uYese ahamupaapa umwene uDaudi.