Yona
1
UYona akulinjizya kumutoloha UMWENE
1 Hali páali umuntu wumo we izina lyakwe áamile wu Yona umwana wa Amitayi. Isiku limo UMWENE ahayanga nawo kuuti, 2 “Usogole ku vhantu avha mu nkaaya impiti yiila, iya Ninawi uvhasoshe, mwe pe nazilola imbiivhi zyavho inyinji nkaani.” 3 Ileelo, uweene uYona, atahanzaga kusogola kuvhasoha, ahanzaga kusogola ku nsi ye vhahatinji Talashishi kumuvwama UMWENE. Ahasogola ku Yafa, kwe ahayaaga imeeli ye yikusogola ku Talashishi, ahalipa inaavhuli, ahashuula na vhavhomvi avha mu meeli.
Umuyuvhayuvha wa sumbi
4 Woope UMWENE ahatwala inkungu iya maha, nu sumbi ahavwalangana nkaani, ni meeli yihapalamila kuvunziha. 5 Avhavhomvi avha mu meeli vhahoogopa nkaani, vhahataliha kuvhahoolela avhalungu vhaavho nu kusumbila ivintu vwavho mwa sumbi, kuuti imeeli yipupuushe uvhumwamu vhwakwe. Ahavhaliilizyo iho uYona ápezile ali kwi ziho ilya pansi pa meeli, ákaasite nu kusupiila utulo utupiti nkaani. 6 Ushilongozi uwa meeli, ahaaga akaasite, ahati, “Shooni she iwe ukaasite? Damuuha umulaavhe umulungu waaho, pamo angatufwila uvhwila, tutahaafwe.”
7 Avhavhomvi avha mu meeli vhahapanzanya vhahati, “Tuhome ulutambu, inga tumumanye we agaleesite amahoosi iga.” Pe vhahahoma, lwope luhamugwila uYona. 8 Vhahataliha kumuvhuziilizya kuuti, “Ishi tuvhuuzye, iwe we amahoosi iga gatwajila, ukuvhomba mbombo vhuli? Ufumile nsi vhuli? Havhili we wa luho vhuli?” 9 UYona ahaamula ahati, “Ine ne Muhebuli, nkumushindiha UMWENE, uMulungu uwa ku mwanya, uMWENE uwa sumbi ni nsi inyuumu.”
10 UYona ahavhapanjila kuuti, inkumutoloha UMWENE. Avhavhomvi avha mu meeli vhahoogopa nkaani vhahamupilila vhahati, “Uvhomvile havhiivhi kumutoloha UMWENE.” 11 Vhahati, “Tukuvhombe shintu vhuli, inga usumbi apuume?” Mwe pe ahonjelaga kuvwalangana. 12 UYona ahati, “Mwe pe amavhilingwa iga ginzile kunongwa yaane, munyatule munsumbile mwa sumbi, woope pe kwe apuume.”
13 Avhavhomvi avha mu meeli vhatahanzaga kumutaajila mu minzi, vhahalinjizya kuhoma amakasiya kuuti vhayifumwe kunzi, vháposiitwe mwe pe usumbi áyonjeleeye kuvwalangana. 14 Pe vhahamulaavha UMWENE vhahati, “We MWENE, utahatugoje inga twefwa uvhupuuma wa muntu uno. Havhili utahatulonje lwe twamugoga inga atali nu vhunanzi, mwe pe iwe MWENE, waleeta inkungu inza vwe ukwanza.” 15 Pe vhahamunyatula uYona, vhahamusumbila mwa sumbi, pe paala usumbi ahapuuma mwa. 16 Avhavhomvi avha mu meeli vhahamwogopa nkaani UMWENE, vhahamugojela ishintu ishifinjile nu kulapa kumushindiha UMWENE.
17 Pe UMWENE ahayilajizya inswi impiti kuuti yimumile uYona, yoope yihamumila ahiima muhati yaakwe insiku zitatu uvhusiku nu musanya.