Yona 2

UYona akumupuuta uMulungu

¹ Pe uYona ahamulaavha UMWENE, uMulungu waakwe, lwe ali muhati mu lwanda lwa nswi ² ahati,

“Nákukutiiye MWENE, lwe indi mu mayimba,

niiwe uhaniivwa, havhili uhanitishila.

Lwe napalamila mu mbiipa iya vhafwe nákulaavile,

niiwe uhaniivwa inkuuta yaane.

³ Lwe wansumba mu madiimi aga minzi amatali, havhili

amavhilingwa gánzyunguluuye, imbazu zyonti.

⁴ Nkatinji pamo, wanzila ntahaloleshe havhili,

pooka niisho kwe nkusuuvhile

lwe uli pa vhutendamo vhwaho uvhufinjile.

⁵ Aminzi lwe gánzyunguluuye ine,

amatundu aga mu minzi gáligubishiiye itwe lyane.

⁶ Níisile nu kufiha ku lwalo ulwa magamba.

Inkati pamo napalamila ku vhuzimu

kwe inyiiji zyakwe zihagalilwa shiima shiima.

Ileelo iwe, MWENE, Mulungu waane,

wambuusya she ne mupuuma kufuma mu mbiipa umwo.

⁷ Umwoyo waane lwe wataliha kuziliha muhati yaane,

nákukumbusile MWENE,

ulupuuto lwane luhakufishila,

mu Nyumba yaaho iMfinjile ye yili ku mwanya.

⁸ Avhantu vhe vhakuvipuuta ivintu ivwi lenga,

vhakusumba ukutali ulwavwo lwavho ku kwaho.

⁹ Ileelo ine, kwe nkufumizye impuutile iya kukusalifwa ku lwimbo,

havhili kwe nkuvhombele ivilapo vwane.

Iwe MWENE we ukupoha.”

¹⁰ UMWENE ahayivhuuzya inswi yimutapishe, yoope yihamutapiha uYona ku shimpuuma ku nsi inyumu.