3
UYona akulandata indajizyo izya Mulungu
1 UMWENE ahayanga nu Yona ulwa vhuvhili ahati, 2 “Sogoola uvhasoshe ku Ninawi, uvhavhuuzye avhantu izwi lyane lye kwe nkupe.” 3 Pe uYona aheepa, ahasogola ku Ninawi inza vwe UMWENE ámulajiziizye. Inkaaya iya mu Ninawi yáali ya kuyitandaalila mwonti insiku zitatu. 4 UYona ahinjila mu nkaaya, ahataliha kujenda isiku ipuma, ahataliha kuvhasoha kuuti, “Zyasyala insiku alubaayini vhweleele kuuti, inkaaya ino yinanjishe.” 5 Avhantu vha mu Ninawi vhahalyitiha izwi lya Mulungu, vhahayiima kulya, avhantu vhonti avhapiti na vhasongo, vhahazwala amenda aga magunila, kulolesya kutonta kwavho.
6 Umwene uwa mu Ninawi lwe agiivwa amazwi igo, aheepa pa shitengo shaakwe, ahazuula umwenda uwa shimwene, ahazwala umwenda uwa magunila, ahatendama pi lota kulolesya kutonta kwakwe. 7 Woope umwene pooka na vhapiti vhaakwe, vhahavhalajizya avhantu vhe vhakutendama mu Ninawi vhahati, “Patahiime avhantu, avha kulinga ishaakulya shonti, poosye ivisugwa vwonti, vitahasheele kumwela. 8 Avhantu vhonti vhazwale amagunila nu kuvizwalizya ivisugwa. Havhili umuntu wonti amukuutile uMulungu ku mwoyo wonti, aaleshe uvhuvhiivhi nu vhunanzi vhwakwe. 9 Pamo uMulungu angaaleha umulaha waakwe uwa kutulonga, tutahaafwe.”
10 UMulungu lwe aalola vwe vhavhomba, na vwe vhaaleha uvhuvhiivhi vhwavho, ahavhafwila uvhwila, atahavhavhomba inza vwe áyanzile.