4
UYona akuviitwa lwe uMulungu akuvhafwila uvhwila avhantu avha mu Ninawi
1 UMulungu lwe avhafwila uvwhila, uYona ahaviitwa nkaani. 2 Ahamulaavha UMWENE ahati, “Násivhiliiye vhwevhulo lwe indi kuhaaya, nkanzaga kutoloshela ku Talashishi, mwe pe námanyile kuuti iwe we Mulungu uwa vhwila. Utakuviitwa naluvhiilo, shiima uli ni shikunzi, havhili ukugalulanya insiivho zyaho kuuti utahavhalonje.a 3 Ishi, we MWENE, nalamba ungoje, nkulola kuuti kwomo imfwanje, ntahiime nu vhupuuma havhili.” 4 Woope UMWENE ahamwamula uYona ahati, “Ukulola mwe muumwo kuviitwa?”
5 UYona lwe avhasoha ahafuma mu nkaaya, ahayitendamila ku vhutukulo uvhwa nkaaya iyo (ahavhaliilizyo iho áshiili kuyanga nu Mulungu). Ahazenga isheegwi isha hanzundila, ayeenye lye kwe livhombeshe mu nkaaya yiila. 6 UMWENE uMulungu ahalimezya ikwi ilya kuumupa uYona ahanzundila, inga atayimbaje nu lusanya lwe luhamwoshaaga, ikwi ilyo lyáli inza igobwe, lyope lihakula. UYona ahalisesheelela nkaani ikwi lye lyámile pa mwanya yaakwe. 7 Ileelo isiku ilya vhuvhili, uMulungu ahasonteelezya ilyongo lihalilya ikwi, lyope lihuma. 8 Izuvha lwe lyalama, uMulungu ahasonteelezya inkungu iya ilunguula kufuma ku vhutukulo. Ulusanya luhamwosha nkaani uYona pi itwe, ahasyala hansi kuuti, azilishe. UYona ahati, “Kwomo imfwanje, ntahiime ne mupuuma.”
9 Ileelo uMulungu ahamuvhuziilizya uYona ahati, “Vhuli, ukusivhiilila kuuti ukuvhomba mwe muumwo kulivitiililwa ikwi mwe lyuma?” UYona ahati, “Ee, nkuvhomba mwe muumwo imfwanje.” 10 UMWENE ahamuvhuuzya ahati, “Iwe ukulisimiililwa ikwi lye utalivhombeeye naashimo, havhili utalikuziizye. Liyimeleeye lyeka kwi siku lyoka, havhili kwi siku lyoka lyuma. 11 Niine nkulola mwe muumwo ku kwane, kuyifwila uvhwila inkaaya iya Ninawi, mwe pe mpiti, havhili yili na vhantu elufu miya mooja ishiliini, vhe vhatámanyile kwilula inyinza ni mbiivhi, havhili yili ni visugwa ivwinji.”