15
Umwene uPilaato akumuvhuziilizya uYeesu
(Mataayi 27:1-2, 11-14; Luuka 23:1-5; Yoohani 18:28-38)
1 Lwe kwapalamila kusha, avhapuuti avhapiti avha Vhayuuda na vhasongo na vhasambiilizi avha ndajizyo izya Moose ni balaaza lyonti vhahapanzanya vhuuvho vheeka. Vhahamupinya uYeesu ni nkusa, vhahamunyatula nu kumutwala kwa Pilaato we áamile mupiti wa silikaali paala.a 2 UPilaato ahamuvhuziilizya uYeesu ahati, “Iwe we mwene wa Vhayuuda?” UYeesu ahati, “Iwe wayanga.” 3 Avhapuuti avhapiti vhaala vhahamulonjeelela uYeesu amalandu aminji. 4 UPilaato ahamuvhuziilizya havhili ahati, “Vhuli, utakwamula naalimo? Tejeelezya, gali galinga ge vhakukulonjeelela.” 5 UYeesu atahaamula naalimo havhili, uPilaato woope ahasukumila.
UYeesu akulongwa kufwa
(Mataayi 27:15-26; Luuka 23:13-25; Yoohani 18:39-19:16)
6 Shiima ahavhaliilizyo aha pa shikuulukuulu isha Pasaaka, uPilaato ahamwigulilaga umukungwa wooka we aVhayuuda vhahamwanzaga. 7 Pe áliipo umuntu we izina lyakwe áali wu Balaba, we ákunziilwe pooka na vhananzi avhanji kunongwa izya vhugozi nu kulinga kupindula isilikaali. 8 Avhantu avhinji vhahasogola kwa Pilaato vhahanda kumulaavha avhavhombele inza vwe ahavheelela kuvhavhombela pa shikulukuulu. 9 UPilaato ahavhavhuziilizya ahati, “Vhuli, mukwanza kuuti imwigulile umwene uwa Vhayuuda uno?” 10 Áyanzile isho mwe pe ámanyile kuuti avhapuuti avhapiti vhaala, vhámufumiizye uYeesu ku kwakwe mwe pe vháali nu mwone.
11 Avhapuuti avhapiti vhahasonzya ivhungaana ilya vhantu kuuti, vhamulaavhe uPilaato amwigulile uBalaba, ileelo uYeesu asyale. 12 UPilaato ahavhavhuziilizya havhili ahati, “Ishi inkonzye vhuli nu muntu uno we mukuti wu mwene uwa Vhayuuda?” 13 Avhantu vhonti vhahazuma ahalanga havhili vhahati, “Muhomeele!” 14 Ileelo uPilaato ahavhavhuziilizya ahati, “Shooni? Avhomvile vhuvhiivhi vhuli?” Vhahonjezya kuzuma ahalanga kuuti, “Muhomeele!” 15 Mwe pe uPilaato ahanzaga kuvhahondezya avhantu, ahamwigulila uBalaba. Ahalajizya kuuti uYeesu ahomwe nu muchaapu nu kumutwala kumuhomeela.
Avhasikaali vhakumusuupizya uYeesu
(Mataayi 27:27-31; Yoohani 19:2-3)
16 Avhasikaali vhahamutwala uYeesu pa luvhungaano ulwa nyumba ya Pilaato, pe vhahiitana impuga yonti iya vhasikaali. 17 Vhahamuzwalizya umwenda uwa langi iya zambalaawu ngati wu mwene, vhahagomba ishipambwi isha mimvwa nu kumuvhiiha mwi itwe. 18 Vhahataliha kumwizizya nu kumulamuha kuuti, “Mwakaata Mwene wa Vhayuuda!” 19 Vhahamuhoma ni lanzi mwi itwe, vhahamuswilila amati, vhahamusugamilila nu kwinama pansi ngati vhakumushindiha. 20 Lwe vhamusuupizya, vhahamuzuula umwenda ula uwa langi iya zambalawu, vhahamuzwalizya amenda gaakwe. Vhahamutwala panzi inga vhamuhomeele.
UYeesu akuhomeelwa pa shihovhenkanyo
(Mataayi 27:32-44; Luuka 23:26-43; Yoohani 19:17-27)
21 Lwe vhali mwi dala, vhahahomaana nu muntu wumo izina lyakwe wu Siimoni, umuhaaya uwa ku Kileene, we áamile wu yise wa Alesikanda nu Lufo. Ahavhaliilizyo iho áamile kunzi iya Yelusaleemu, ahasogolaga mu nkaaya iyo. Vhahamuvijiilizya kuuti anyatule ishihovhenkanyo isha Yeesu. 22 Vhahamuleeta uYeesu pe vhahatinji pa Goligota, kwe kuuti pi Pangawe ilya iTwe. 23 Vhahaamupa idivaayi ye vhasangiinye nu mulembo uwa kupunguzya uvhuvhaavi, ileelo ahahaana kumwela. 24 Vhahamuhomeela, vhahagahomela ikuula amenda gaakwe, inga vhamanye kuuti wu naanu we anyatule shintu vhuli, pe vhahagagavhanya. 25 Yáamile saa tatu inzanchi, lwe avhantu vhaala vhakumuhomeela. 26 Vhávhiisile uvhusimbe pamwanya yaakwe, uvhwa vhulonjeelezi vhwakwe vhwe vhwátili: UMWENE UWA VHAYUDA. 27 Avhananzi vhavhili vhávhahomeleeye pooka nu Yeesu, wumo ku nyoovhe iya ku ndiilo, uwamwavho ku nyoovhe iya ku mongo. [ 28 Pe izyo zihavhombeha, inga uVhusimbe uVhufinjile vhulunjishe, vhwe vhukuti, “Vhámuvhiisile pooka na vhananzi.”]b
29 Avhantu vhe vhahatuuhaga mwi dala lye liila vhahamusamulaga, vhahayinzanyaaga amatwe gaavhoc vhahatinji, “We! Te weewe we watinji ungayibongola iNyumba iMfinjile nu kuyizenga ku nsiku zitatu! 30 Ishi, yiiha pa shihovhenkanyo ipo, uyiposhe weeka!” 31 Havhili avhapuuti avhapiti pooka na vhasambiilizi avha ndajizyo izya Moose vhahamusupizyaga vhahatinji, “Aponiaga avhanji, ileelo atangavhwezya kuyiponia weeka. 32 Vhaati, uweene wu Chilisiti, wu Mwene uwa Vhaisilayeeli. Inga twamulola akwiha pa shihovhenkanyo, pe kwe tumwitishe.” Vhoope vhe vháhomeliilwe pooka nawo vhahamuligaga.
UYeesu akufwa pa shihovhenkanyo
(Mataayi 27:45-56; Luuka 23:44-49; Yoohani 19:28-30)
33 Kwanda mu saa sita kufishila mu saa tisa, ahiisi hahagwa insi yonti. 34 Lwe yaafiha saa tisa, uYeesu ahahoola ku maha, ahati, “Eloi, Eloi, lama sabakitani!” Kwe kuuti, “Mulungu waane, Mulungu waane, shooni she wandeha!”d 35 Avhantu vhamo vhe vhímiliiye pe paala, lwe vhiivwa amazwi gaala, vhahati, “Tejeelezyi! Akumwita uEeliya.” 36 Umuntu vhumo ahashimbila naluvhiilo, ahatumpiha ishitambala mu divaayi inkali, ahavhiiha kwi lanzi, ahamumwensya ahati, “Leha twenye inga uEeliya akwinza kumwisya pa shihovhenkanyo.”
37 Pe uYeesu ahahoola ku maha nkaani nu kufwa. 38 Ipaziiya ilya mu Nyumba iMfinjile lihazeepuha pahati nu kulehaana kwima gavhili, kufuma kumwanya kufiha pansi. 39 Umupiti uwa vhasikaali we ahimililaga pilongolela paala, lwe aalola vwe uYeesu aafwa she shiila ahati, “Nalyoli umuntu uno aamile Mwana wa Mulungu!”
40 Vháliipo avhantanda vhe vhahenyelezyaga ukutali, áliipo uMaliiya uwa ku Magidala nu Saloome nu Maliiya unyina wa Yoose umuzuuna wa Yakobo. 41 Avhantanda ivho vhahalongozanyaaga nu Yeesu nu kumuvhombela lwe áali mu Galilaaya. Avhantanda avha na vhamwavho avhinji, vháfisile na woope ku Yelusaleemu.
UYoosefu akumusyila uYeesu
(Mataayi 27:57-61; Luuka 23:50-56; Yoohani 19:38-42)
42 Isiku ilyo lyáli lya kusengaanya kufishila isiku lya pa Sabaato.e Lwe haafiha hamazuuvha, 43 ahinza uYoosefu uwa ku Alimatayo, ahayigomwa ahasogola kwa Pilaato kulaavha umuvhili wa Yeesu. UYoosefu vhahamushindihaga nkaani, áamile wa mwi balaaza lya Vhayuuda, woope ahawugulililaga uvhumwene vhwa Mulungu.
44 UPilaato ahasukumila kwivwa kuuti uYeesu aafwa naluvhiilo. Ahamwita umupiti uwa vhasikaali, ahamuvhuziilizya inga uYeesu afuuye hali. 45 UPilaato lwe azyaganya kufuma kwa musikaali ula kuuti uYeesu afuuye, ahamwitishizya uYoosefu asogole awunyatule umuvhili wa Yeesu.
46 UYoosefu ahakala umwenda uwa kumusyilila uYeesu. Ahawiisya umuvhili pa shihovhenkanyo, ahawuzinga nu mwenda we ákazile, ahawuvhiiha mu mbiipa ye ábanile mwi yalaawe.f Ahaligalagaasya ivhwe ipiti, ahalivhiiha pa mulyango uwa mbiipa. 47 Woope uMaliiya uwa ku Magidala nu Maliiya unyina wa Yoose vhahapalola pe áwuvhiisile umuvhili wa Yeesu.