14
Avhalongozi avha Vhayuuda vhakulondola idala ilya kumugoga uYeesu
(Mataayi 26:1-5; Luuka 22:1-2; Yoohani 11:45-53)
1 Zyásyaye insiku zivhili kufiha pa shikulukuulu isha Pasaakaa ni sha makaati ge vhatáluziizye.b Avhapuuti avhapiti avha Vhayuuda na vhasambiilizi avha ndajizyo izya Moose vhahalondolaga idala ilya kumulema uYeesu ku kwilu nu kumugoga. 2 Vhátili, “Litahiime lisiku ilya pa shikulukuulu, avhantu vhatahinze vhavhiishe ivho.”
Umwantanda wumo akumupaha uYeesu amafuta
(Mataayi 26:6-13; Yoohani 12:1-8)
3 Ahavhaliilizyo he haala uYeesu áamile ku Betaniya mu nyumba iya Siimoni we hali áamile na mambombo. Lwe atendiime kulya ishaakulya ahinjila umwantanda wumo we áali ni nsupa inyinza nkaani iya mafuta ge gakununchila. Amafuta gaala gáali ga mpiiya inyinji nkaani. Ahagubula insupa yiila nu kumupungulila uYeesu pi itwe. 4 Avhantu vhamo vhe vháali paala vhahaviitwa nu kuvhuzilizyanya kuuti, “Shooni she akuteezya amafuta iga vhweleele? 5 Mwe pe amafuta iga twamile tukazyaje nu kuposheela impiiya inyinji zye zikulingaana na malipilo aga mwaha wonti nu kutuuha. Tuhondeeye kunyatula nu kuuvhapa avhapiina.” Vhahamupilila umwantanda ula.
6 Ileelo uYeesu ahati, “Muleshi, shooni she mukumuyimvwa? Ambombela aminza. 7 Avhapiina muli navho shiima, inga mwasungwa muhondeeye kuvhaavwa ahavhaliilizyo honti. Ileelo ine te mbe niimwe shiima. 8 Uweene avhomba liila lye avhwezya, awupaha umuvhili waane kunsengaanya kwi siku ilya kusyilwa. 9 Nalyoli, mu nsi yonti pe galilumbiililwa aMazwi aMinza, niili lye avhomba umwantanda uno kwe liyangwaje kumukumbuha.”
UYuuda akwitiha kumulonjeelela uYeesu
(Mataayi 26:14-16; Luuka 22:3-6)
10 UYuuda uwa ku Kalyoti, we áamile wooka mu vhasundikwa vhaala kumi na mbiili, ahasogola kuyanga na vhapuuti avhapiti avha Vhayuuda, inga amulonjeelele uYeesu ku kwavho. 11 Vhahaseshela lwe vhiivwa vwe akuyanga, vhahati kwe vhamupe impiiya. Woope ahanda kulondola ahavhaliilizyo ahinza aha kumulonjeelela.
Avhasundikwa avha Yeesu vhakusengaanya ishikulukuulu isha Pasaaka
(Mataayi 26:17-25; Luuka 22:7-14, 21-23; Yoohani 13:21-30)
12 Pi siku ilya kutaliha ishikulukuulu isha makaati ge vhataluziizye, lwe ahavhaliilizyo aha kuvhoolwa ahagonzi aha Pasaaka, avhasundikwa vhaakwe vhahamuvhuziilizya uYeesu vhahati, “Tusengaanye kwoshi ukwa kuliila ishikulukuulu isha Pasaaka?” 13 UYeesu ahavhasonteelezya avhasundikwa vhavhili ahati, “Musogole mu nkaaya, kwe muhomaane nu mwanaavuli we ayitwisile insonta iya minzi, muhamulandataje. 14 Mu nyumba mwe ayinjila, muhamuvhuzilizyaje umuhaata nyumba, muhatinji, ‘UMusambiilizi akuvhuziilizya kuuti, shili kwoshi ishumba she kwe ndiile iPasaaka pooka na vhasundikwa vhaane?’ 15 Woope kwe avhalanje ishumba ishipiti isha mu nyumba injelenkanu she asengiinye, mwe musogole mutusenganizanye.” 16 Avhasundikwa vhahasogola ku nkaaya, vhahaaga inza vwe uYeesu ávhavhuziizye, vhahasengaanya ishikulukuulu isha Pasaaka.
17 Lwe hiima havhaliilizyo aha hamazuuvha, uYeesu ahafiha paala pooka na vhasundikwa vhaakwe kumi na mbili. 18 Lwe vhakulya ishaakulya, uYeesu ahati, “Nalyoli nkuvhavhuuzya kuuti, wooka mu mpuga yiinyu we akulya pooka niine kwe andonjeelele.” 19 Avhasundikwa vhaakwe vhahasimiililwa, vhahataliha kumuvhuziilizya, wooka wooka kuuti, “Vhuli neene?” 20 UYeesu ahavhaamula ahati, “Ali pahati yiinyu imwe kumi na mbiili, we akusanzila umukaati pooka niine mu luvhiga. 21 Mwe pe ine ne Mwana wa Aadamu kwe imfwe inza vwe nkasimbilwa mu Vhusimbe uVhufinjile. Ileelo, asheela umuntu ula we akundonjeelela ne Mwana wa Aadamu. Yaamile hinza ku kwakwe inga atápafiilwe.”
UYeesu akufinga ulufingwi na vhasundikwa vhaakwe
(Mataayi 26:26-30; Luuka 22:14-20; 1 Vhakolinto 11:23-25)
22 Pe lwe vhakulya, uYeesu ahanyatula umukaati, ahawupuutila, ahamensula, ahaavhapa avhasundikwa vhaakwe, ahati, “Nyatuuli, uno we muvhili waane.” 23 Pe havhili ahanyatula ishikombe isha divaayi, ahasalifwa kwa Mulungu, ahaavhapa, vhoope vhahamwelela vhonti. 24 Ahati, “Iga ge mavhanda gaane aga lufingwi,c ge gakwitiha kupoha avhantu avhinji ku vhutalamalandu vhwavho. 25 Nalyoli, nkuvhavhuuzya imwe kuuti, ntalimwela havhili idivaayi iya mampensya, kufishila pi siku liila pe ndimwela idivaayi vhupwa ku vhumwene uvhwa Mulungu.” 26 Pe vhahateela ulwimbo, vhahasogola kwi gamba ilya Mizayituni.
UYeesu akusimishizya kuuti uPeeteli kwe amuhaane
(Mataayi 26:31-35; Luuka 22:31-34; Yoohani 13:36-38)
27 UYeesu ahavhavhuuzya avhasundikwa vhaakwe ahati, “Uvhusiku uvhwa ilelo mwenti kwe mushimbile mundeshe, mwe pe yisimviilwe mu Vhusimbe uVhufinjile kuuti,
‘Ndimuhoma umudiimi,
ni ngʼonzi zilisaata.’d
28 “Ileelo lwe nazyuha, ndivhalongolela kusogola ku Galilaaya.” 29 Ileelo uPeeteli ahati, “Inga vhangakushimbila nu kukuleha vhonti, ine ntangakuleha inga hansi.” 30 UYeesu ahamwamula ahati, “Nalyoli nkukuvhuuzya kuuti, uvhusiku uvhwa ilelo lwe inkanda yishiili kuvhilishila luvhili, kwe unkaane lutatu.” 31 Ileelo uPeeteli ahahaana nkaani ahati, “Poosye inga nkufwa pooka niiwe, ntangakuhaana iwe.” Navhamwavho vhoope vhahayanga vhwevhulo.
UYeesu na vhasundikwa vhatatu vhakulaaha mu shilimbika isha Getisemani
(Mataayi 26:36-46; Luuka 22:39-46)
32 Pe vhahafiha ku shilimbika isha Getisemani. UYeesu ahavhavhuuzya avhasundikwa vhaakwe ahati, “Mutendame ipa lwe nkulaavha.” 33 Ahavhanyatula uPeeteli nu Yakobo nu Yoohani, ahataliha kuswimiililwa nkaani nu kupulupuuta mu mwoyo. 34 Ahati, “Umwoyo waane wuswimiliilwe nkaani, nkuyimvwa kufwa, nguliilili panaapa, muvhanje minso!” 35 Ahasogola pilongolela hansi, ahagwa ishikupama, ahalaavha kuuti, yingavha hinza ahavhaliilizyo aha mayimba igo hasegushe. 36 Ahati, “Taata, ku kwaho vwonti vikuvhombeha, nkukulaavha kuuti uneefwezye ishikombe ishi isha mayimba. Ileelo te vwe inkwanza ine, nkandi vwe ukwanza weewe.” 37 Ahagaluha, ahaaga vhaala vhatatu vhakaasite utulo, ahamuvhziilizya uPeeteli ahati, “Siimoni, vhuli! Ukaasite? Utadamuliiye isaa inga lyoka? 38 Vhuushi, mulaaavhe, mutahinze mwinjile mu ndingo. Umwoyo wukwitiha, ileelo umuvhili wukupootwa.”
39 UYeesu ahasogola havhili kulaavha, ahavhuyizyaga kulaavha amazwi ge gaala. 40 Ahagaluha havhili, ahaaga vhakaasite, mwe pe aminso gaavho gáali mamwamu, vháposiitwe ilya kumwamula.
41 Ahinza ulwa vhutatu ahati, “Fwandi, niishi mukaasite? Ishi zyakwila! Ahavhaliilizyo haafiha, yeenyi, ine ne Mwana wa Aadamu naakulemwa mu nyoovhe izya vhatalamalandu. 42 Yimiliili tujende, yeenyi, we akundonjeelela ahafiha.”
UYuuda na vhasikaali vhakumulema uYeesu
(Mataayi 26:47-56; Luuka 22:47-53; Yoohani 18:3-12)
43 Ahavhaliilizyo he haala uYeesu lwe akuyanga, uYuuda, we wamwavho mu vhaala kumi na mbiili ahafiha na vhantu avhinji vhe vháamile na mapanga ni nduugu. Avhantu ivho, avhapuuti avhapiti avha Vhayuuda na vhasambiilizi avha ndajizyo izya Moose na vhasongo vhávhasonteleziizye.e 44 Umulonjeelezi uYuuda ahaavhapa ishimanyilo, ahati, “Ula we namufipa we avhasikaali vhahamulemaje, nu kumunyatula.”
45 UYuuda lwe aafiha, ahapitiilila kwa Yeesu ahati, “Musambiilizi!,” ahamufipa. 46 Pe paala avhantu vhaala vhahamulema uYeesu. 47 Wumo we áali nu Yeesu ahanyatula ipanga lyakwe, ahamudiba ikutwi umuvhomvi uwa Mupuuti uMupiti. 48 UYeesu ahavhavhuziilizya ahati, “Vhuli mwaninzila kundema ine lwe muli na mapanga ni nduugu ngati ne munanzi? 49 Insiku zyonti navhanga niimwe nkusambiilizya pa Nyumba iMfinjile mutandemaga. Izi zyavhombeha kuuti uVhusimbe uVhufinjile vhulunjishe.” 50 Pe avhasundikwa vhaakwe vhonti, vhahamuleha weeka nu kushimbila.
51 Áliipo umulumendo wumo ahamulandataga uYeesu, we ázwaye igolole lyeka vhweleele, avhantu vhaala vhahalinga kumulema. 52 Ileelo ahafutumuha nu kulileha igolole lyakwe, ahashimbila ishitali.
UYeesu akulongwa pilongolela ilya vhasongo avha balaaza
(Mataayi 26:57-68; Luuka 22:54-55, 63-71; Yoohani 18:13-14, 19-24)
53 Avhantu vhaala vhahamutwala uYeesu kwa Mupuuti uMupiti, vhahamuvhungaanila vhonti, avhapuuti avhapiti avha Vhayuuda na vhasongo na vhasambiilizi avha ndajizyo izya Moose. 54 UPeeteli ahamulandataga uYeesu ukutali, ahinjila mu luvhungaano ulwa nyumba iya Mupuuti uMupiti, ahatendama na vhasikaali avha Mupuuti uMupiti kwota umwoto.
55 Pe avhapuuti avhapiti avha Vhayuuda ni balaaza lyonti vhahanda kulondola uvhusimishizi uvhwa kumulonga uYeesu, inga vhamugoje, ileelo vhatahavhwaga. 56 Avhantu avhinji vhahasimishizyaga inongwa izya ilenga, ileelo zitahalingaanaga. 57 Avhantu vhamo vhahimiilila kusimishizya ilenga, vhahati, 58 “Twamwivuuye akuyanga kuuti, ‘Ingayibongola iNyumba iMfinjile ino ye yázengwilwe ni nyoovhe izya vhantu, na ku nsiku zitatu ingazenga iyinji ye yitakuzengwa ni nyoovhe izya vhantu.’” 59 Pooka niizyo uvhusimishizi vhwavho vhutahalingaana.
60 Pe ileelo, uMupuuti uMupiti ahimiilila pahati yaavho, ahamuvhuziilizya uYeesu, ahati, “Shooni she utakuvhaamula vwe vhakusimishizya?” 61 Ileelo uYeesu ahapuuma, atahaamula naashimo. UMupuuti uMupiti ahamuvhuziilizya havhili ahati, “Iwe we Chilisiti, uMwana wa Mulungu uMushindamu?” 62 UYeesu ahati, “Ine ne neene. Niimwe kwe mundole ne Mwana wa Aadamu ntendiime ku nyoovhe iya ku ndiilo iya MWENE uwa Maha, na lwe nkwinza na mavhingo aga ku mwanya.” 63 UMupuuti uMupiti lwe ayiivwa ahazeepula amenda gaakwef ahati, “Avhasimishizi vhaashi havhili? 64 Mwivwa vwe akusaamula! Mukuti vhuli?” Vhonti vhahamulonga vhahati, “Kufumiilila ni nyaamulo zyakwe, umuntu uno ahondeeye kufwa.” 65 Avhantu vhamo paala vhahataliha kumuswilila amati, vhahamugwinchila ku minso, vhahataliha kumuhoma ni mbuli, vhahati, “Kuvhwa wu naanu we akuhoma!” Avhasikaali vhoope vhahamunyatula nu kumukanza na makoofi.
UPeeteli akumuhaana uYeesu
(Mataayi 26:69-75; Luuka 22:56-62; Yoohani 18:15-18, 25-27)
66 UPeeteli lwe ali pe paala pa luvhungaano, umuvhomvi umwantanda uwa Mupuuti uMupiti ahinza. 67 Ahamulola uPeeteli lwe akwota umwoto, ahamuzyamila, ahati, “Iwe waamile pooka nuula uYeesu uMunazaleti.” 68 Ileelo uPeeteli ahamuhaanila ahati, “Ntakukumanyinsanya inga hansi, havhili ntakumanya zye ukuyanga!” UPeeteli aheepa paala, ahasogola pa mulyango, ahavhaliilizyo hanaaho inkanda yihavhilishila. 69 Umuvhomvi umwantanda ula ahamulola havhili, ahanda kuvhavhuuzya avhantu vhe vhímiliiye paala ahati, “Umuntu uno ali pooka nu Yeesu.” 70 UPeeteli ahahaana havhili. Lwe pahaavha hansi, vhe vhimiliiye paala vhahati, “Nalyoli uli pooka navho, mwe pe niiwe we Mugalilaya inza uYeesu.” 71 UPeeteli ahataliha kutipa nu kulapa, ahati, “Ntamumanyile umuntu uyo we mukumuyanga.” 72 Pe paala, inkanda yihavhilishila ulwa vhuvhili. UPeeteli ahalikumbuha izwi ilya Yeesu lye ámuvhuziizye kuuti, “Uvhusiku uvhwa ilelo lwe inkanda yishiili kuvhilishila luvhili, kwe unkaane lutatu.” UPeeteli ahasimililwa, ahanda kukuuta nkaani.