13
UYeesu akuyanga izya kumongolwa ukwa Nyumba iMfinjile
(Mataayi 24:1-2; Luuka 21:5-6)
1 UYeesu ahafuma pa Nyumba iMfinjile na vhasundikwa vhaakwe, wooka mu vhasundikwa vhaakwe ahayanga ahati, “Musambiilizi! Yeenya amavhwe iga, ni nyumba izi vwe zili uvhwinza.” 2 UYeesu woope ahati, “Inyumba zyonti impiti zye ukuzilola ipa, zyonti zilimongolwa, te lihaavhe ivhwe lye lilisyala pamwanya pa lya mwavho.”
UYeesu akusambiilizya izya mayimba aga ku mpeleela
(Mataayi 24:3-14; Luuka 21:7-19)
3 UYeesu ahatendama pi gamba ilya Mizeituni na vhasundikwa vhaakwe, kulungamana ni Nyumba iMfinjile. UPeeteli nu Yaakobu nu Yoohani nu Andeleeya vhahanda kumuvhuziilizya ku kwilu, 4 vhahati, “Tuvhuuzye, zyonti izyo zilivhombeha li? Ishilolesyo shaakwe shili vhuli inga zyapalamila?”
5 UYeesu ahanda kuvhavhuuzya ahati, “Mushevhaje, umuntu atahavhahopenkanye. 6 Avhinji vhaliyinza kwi zina lyane, vhalivhahopenkanya avhantu avhinji vhaliiti, ‘Ine ne neene.’ 7 Niimwe lwe mwivwa inongwa izya vhulugu, ni pangwi ilya vhulugu mutahagandushe, mwe pe zye zililongolela ziniizyo. Ileelo, uvhusililishilo vhuuvhwo vhushiili. 8 Avhantu avha nsi yimo vhalisogola uku nuukwo kulwa na vha nsi iyinji, nu vhumwene vhuliilwa nu vhumwene uvhunji. Kuliyiima ivisumbi ni nzala uku nuukwo. Uvhwo vhuliivha vhutalishilo vhweleele uvhwa havhaliilizyo aha ku mpeleela, inza vwe uvhuvhaavi vhwe vhwandilo uvhwa mwantanda kupaapa.
9 “Niimwe panaapo mushevhaje, mwe pe vhalivhatwalaga mu malonjelwi, vhalivhahomaga mu masinagoogi, vhalivhatwalaga ku vhamwene na ku vhapiti avha nsi kunongwa yaane, kuvha mwe vhahoome ku kwavho. 10 Isuuti inga aMazwi aMinza galumbiililwa insi zyonti, pe uvhusililishilo vhuliyinza. 11 Lwe vhavhalema nu kuvhatwala kuvhalonjeelela, mutasiivhaje ilya kuyanga. Lyonti lye mulipelwaga ahavhaliilizyo he haala lye muhaliyangaje, mwe pe te mwemwe muliliyanga, nkandi uMupepo uMufinjile waliivhapa izya kuyanga. 12 Umujenzi alimulumila umunine ilenga inga vhamugoje. Utaata alimulumila umwana waakwe ilenga, avhaana vhalilwanga na vhapaafi vhaavho nu kuvhaazya kuuti vhavhagoje. 13 Avhantu vhonti vhalivhavitilwaga kuzya izina lyane, ileelo we akujimbiilila kufiha pa vhusililishilo we aliipokwa.
UYeesu akuvhasoha izya kupuvwa
(Mataayi 24:15-28; Luuka 21:20-24)
14 “Lwe mwamulola wumo we akuleeta isha kuhandamania nu kunanganya, ayimiliiye pe patakwanzilwa,a (we akuvhaazya amanyaje), pe vhe vhali mu mukowa uwa Yudeeya vhahashimbililaje mu magamba. 15 Umuntu we ayelelesile pamwanya pa nyumba atahiishe, poosye atahinjile mu nyumba yaakwe kuuti anyatule shonti. 16 Woope umuntu we ali ku magunda, atahagalushe kuhaaya kunyatula amenda gaakwe. 17 Vhasheela vhe vhali pa vhumwamu na vhe vhakwonsya insiku izyo! 18 Mupuutaje kuuti izi zitahavhaaje mu havhaliilizyo ha lupepu. 19 Mwe pe insiku izyo ziliyiima na mayimba ge gatahaloleha naalumo kufuma pe uMulungu apezile insi, havhili te gahavhuyiile naalumo. 20 UMWENE inga atangafupiilizya ahavhaliilizyo haala, nuumo we angapokwa. Ileelo kunongwa iya vhasavhulwa vhaakwe, uMulungu alihafupiilizya ahavhaliilizyo haala.
21 “Ahavhaliilizyo haala, umuntu inga akuvhavhuuzya kuuti, ‘Yeenya, uChilisiti aliipo ipa,’ pamo, ‘Ali kuula,’ mutahasheele kumwitiha, 22 mwe pe vhaliyinza avhantu vhe vhakuyitaha kuuti, ‘Ine ne Chilisiti,’ na vhe vhakuyitaha kuuti vhakuvhwi. Vhalivhomba amafindango aminji aga kusukumizya, nu kulinga kuvhateezya avhasavhulwa avha Mulungu. 23 Pe imwe mushevhaje, ine imbasosile zyonti izi nziila.
Kwinza ukwa Mwana wa Aadamu ulwa vhuvhili
(Mataayi 24:29-31; Luuka 21:25-28)
24 “Lwe zyatuuha insiku izya mayimba izuvha lilivhiishilwa ahiisi, umwezi te wuhahozye uvhuzelu vhwakwe.b 25 Inzota izya ku mwanya zilivhanga zikugwa, amaha aga ku mwanya galiyingaana.c 26 Ku havhaliilizyo iho, pe avhantu vhalindola ine ne Mwana wa Aadamu nkwinza mu mavhingo ku maha nu vhushindamu.d 27 Pe alivhasonteelezya avhahavhizya vhaakwe kuvhavhungaaniha avhasavhulwa vhaakwe kufuma imbazu zine izya nsi yonti, kwandila uluvhazu ulwa kwanda kwe insi yanzite, kufisila ku vhusililiishilo uwa mwanya.
28 “Musambiililaje ishiholanyo isha ituvhu: kwe ulusamba lukusilila kukwima kutonsu, likulemvwa amatundu amapwa, pe mukumanya kuuti ahavhaliilizyo aha kuvuna hapalamila. 29 Niimwe vhweleele, lwe mukuzilola zyonti izyo zyataliha, muhamanyaje kuuti ine ne Mwana wa Aadamu mpalamiiye kwinza. 30 Nalyoli nkuvhavhuuzya kuuti, avhantu avha havhaliilizyo iha te vhafwe ishisita kuzilola zyonti ziila zikuvhombeha. 31 Imwanya ni nsi ziliyepa, ileelo amazwi gaane galiivha ga shiima.
Ataliipo umuntu we amanyile ahavhaliilizyo he aligaluha uYeesu
(Mataayi 24:36-44)
32 “Isiku lye ndigaluha havhili ataliipo umuntu we alimanyile, poosye avhahavhizya vhe vhali kumwanya vhatamanyile, niine ne Mwana waakwe ntamanyile, nkandi weTaata weeka. 33 Mushevhaje, muvhanje minso, [mupuutaje], mwe pe mutamanyile kuuti, ahavhaliilizyo haala haliifiha lye li. 34 Ishiholanyo isha kugaluha kwane shili ngati muntu we akushuula, ahayileha inyumba yaakwe na vhavhomvi vhaakwe, ahaamupa wooka wooka indajizyo ni mbombo yaakwe. Ahamuvhuuzya umuguliilizi uwa mulyango ahati, ‘Uvhanje minso.’ 35 Pe leelo muvhanje minso, mwe pe mutamanyile isiku lye umuhaata nyumba aliyinza, pamo he hamazuuvha, pamo havhaliilizyo aha pa vhusiku pahati, pamo lwe yikuvhilishila inkanda, pamo nzanchi. 36 Atahinze avhwele lwe muyiluviilwe nu kukaata. 37 Zye nkuvhavhuuzya imwe, nu kuvhavhuuzya vhonti kuuti, muvhanje minso!”