12
Ishiholanyo isha mugunda uwa mampensya na vhalimi
(Mataayi 21:33-46; Luuka 20:9-19)
1 UYeesu ahanda kuyanga na vhantu ku viholanyo ahati, “Umuntu wumo álimile umugunda uwa mampensya,a ahagazenjeelela uluvhaga, ahabana ishilivha isha kufinyila amampensya. Ahazenga isheegwi isha muguliilizi pa lupanda ulutali, ahavhavhiiha avhalimi, uweene ahashuula ku nsi iya kutali. 2 Ahavhaliilizyo aha kuvuna, ahamusonteelezya umuvhomvi wooka ku vhalimi avha mugunda, inga asogole amunyatulile amantonongwa gamo, mu mampensya aga mu mugunda waakwe. 3 Avhalimi vhaala vhahamulema umuvhomvi ula, vhahamuhoma nu kumushimbizya inyoovhe zyeka. 4 Umuhaata mugunda ahamusonteelezya umuvhomvi uwamwavho, woope vhahamuyimvwa nu kumuvwalazya itwe. 5 Ahamusonteelezya umuvhomvi uwamwavho havhili, vhahamugoga. Ahavhasonteelezya avhamwavho avhinji, vhahavhahoma nu kuvhagoga vhamo.
6 “Kumpeleela avhavhomvi vhaakwe vhahasila, ahasyala we mwana waakwe unkundwa, ahati, ‘Kwe vhamushindishe mwe mwana waane.’ 7 Ileelo avhalimi lwe vhamulola, vhahapanzanya vhahati, ‘Uno we mupwana waakwe, tumugoje, tunyatule wuvhe wiitu sweswe.’ 8 Vhahamulema nu kumugoga nu kumusumbila kunzi ku mugunda. 9 Mukuti umuhaata mugunda alihonzya vhuli? Aliyinza avhagoje avhalimi vhaala. Alivhapa avhanji umugunda ula. 10 Vhuli mutahavhaazya uVhusimbe uVhufinjile vhwe vhukuti,
‘Ivhwe lye mwálihaanile imwe vhazenzi,
lye lyima livhwe ilya lwalo pa shipembe isha nyumba.b
11 UMWENE we álisevile ivhwe liila,
imbombo izyo zikusukumizya pa minso giitu.’”c
12 Avhapuuti avhapiti avha Vhayuuda na vhasambiilizi avha ndajizyo izya Moose na vhasongo, vhahamanya kuuti ishiholanyo shiila shikuvhayanga vhuuvho. Vhahanzaga kumulema, ileelo vhahoogopa ivhungaana ilya vhantu. Pe vhahamuleha, vhaheepa.
Izya kusonka umusonko kwa Kayisaali
(Mataayi 22:15-22; Luuka 20:20-26)
13 Avhalongozi avha Vhayuuda vhahavhasonteelezya aVhafalisaayi na vhalandati avha Heelodi kuuti vhamulinje uYeesu ku mazwi. 14 Lwe vhaafiha, vhahati, “Musambiilizi, tumanyile kuuti we muntu wa nalyoli, havhili ukusambiilizya uvhwa nalyoli uvhwi dala ilya Mulungu. Na wumo we angakwefwa kuvhwa nalyoli, havhili utakusaajila uvhupiti uvhwa muntu. Vhuli, mwe muumwo kufumwa umusonko ku silikaali iya Shilumi iya mwene uKayisaali, pamo ha? Tumulipaje pamo tutamulipaje?” 15 Ileelo woope ámanyile ishifumbo shaavho ahati, “Shooni she mukundinga? Nampa idinaali injilole.” 16 Vhahaamupa, ahati, “Ishiholanyo she shili pa dinaali ino nu vhusimbe uvhu vhwanaanu?” Vhahati, “Vhwa Kayisaali!” 17 UYeesu ahati, “Ivwa Kayisaali mumupanje uKayisaali, ni vwa Mulungu mumupanje uMulungu.” Vhahamusukumila nkaani vwe ahavhaamula.
UYeesu akusambiilizya izya kuzyuha avhafwe
(Mataayi 22:23-33; Luuka 20:27-40)
18 AVhasadukaayid vhe vhahatinji kutaliipo kuzyuha, vhahasogola kwa Yeesu. Vhahamuvhuziilizya 19 vhahati, “Musambiilizi, uMoose átulajizizye mu Vhusimbe uVhufinjile kuuti umuntu inga aafwa, lwe amuleha umushi atali nu mwana, umunine waakwe umwanaavuli amupwanaje umwantanda umuziishe, inga amupaapile avhaana umuyazi. 20 Pe vháliipo avhanine saba, usongo ahanyatula umwantanda, ahafwa, atahaleha umwana. 21 Uwa vhuvhili woope ahapwana ahafwa, atahaleha umwana, nu wa vhutatu vhwevhulo. 22 Vhonti saba vhaahafwa, vhatahaleha umwana. Lwe vhaasila vhonti woope umuziishe aahafwa. 23 Mwe vhonti saba vhámwimaaye, isiku ilya kuzyuha aliyiima mushi wa naanu?” 24 UYeesu ahavhaamula ahati, “Mupuvile nkaani, mwe pe mutavhumanyile uVhusimbe uVhufinjile na maha aga Mulungu. 25 Avhafwe lwe vhazyuha, vhataliyiimala nu kwimalwa, mwe pe vhakwima ngati vhe vhahavhizya vhe vhali ku mwanya. 26 Ileelo inongwa izya kuzyuha avhafwe, mutahavhaazya mwi kalaata ilya Moose lye likuyanga izya mwoto we wuhaahaga pa shipindi? UMulungu ámuvhuziizye uMoose átili, ‘Ine ne Mulungu uwa Abulahamu nu wa Yisaaka nu wa Yaakobu.’ 27 Uweene te wu Mulungu uwa vhafwe, nkandi wu Mulungu uwa vhapuuma. Mwe muumwo mupuvile nkaani.”
UYeesu akusambiilizya izya Ndajizyo impiti
(Mataayi 22:34-40; Luuka 10:25-28)
28 Umusambiilizi wumo uwa ndajizyo izya Moose, ahiivwa vwe vhakuyanga nu Yeesu. Lwe aalola kuuti avhaamula ahinza, ahanda kumuvhuziilizya uYeesu ahati, “Ku ndajizyo zyonti yili kwi ye yakwanda?” 29 UYeesu ahamwamula ahati, “Indajizyo iya kwanda ye yino, ‘Vhaisilayeeli tejeelezyi, uMWENE wiitu uMulungu, wu MWENE weeka. 30 Niimwe mumukundaje uMWENE wiinyu uMulungu ku mooyo giinyu gonti na ku vhupuuma vhwinyu vhwonti na ku njeele zyinyu zyonti na ku maha giinyu gonti.’e 31 Indajizyo iya vhuvhili ye yino, ‘Muvhakundaje avhapalamani vhiinyu, inza vwe mukuyikunda mweneemwe mweka.’f Yitaliipo indajizyo iyinji impiti kuluusya izyo.”
32 Umusambiilizi ula ahati, “Musambiilizi, nalyoli wayanga ahinza kuuti uMulungu ali wooka, ataliipo uwunji ha nkandi uweene. 33 Havhili kumukunda ku mwoyo wonti na ku njeele zyonti na maha gonti, nu kumukunda umupalamani waaho inza vwe ukuyikunda weneewe, hinza kuvhomba zyonti izyo, kuluusya kufumwa impuutile izya kulungulizya ni zinji zyonti.”g 34 UYeesu lwe aalola kuuti ayaamula ahinza ahati, “Ishi wanda kuzyaganya inza vwe zikwanzilwa kwinjila ku vhumwene uvhwa Mulungu.” Pe nuumo umuntu we havhili ahanda kumuvhuziilizya.
UChilisiti wu Mwene
(Mataayi 22:41-46; Luuka 20:41-44)
35 UYeesu ahasambilizyaga pa Nyumba iMfinjile ahati, “Shooni she avhasambiilizi avha ndajizyo izya Moose, vhakuti uChilisiti mwana wa Daavhudi? 36 Umweneesho uDaavhudi ásimvile ku maha aga Mupepo uMufinjile kuuti,
‘UMWENE ámuvhuziizye uMwene waane átili,
“Tendama ku luvhazu lwane ulwa ku ndiilo,
kufishila lwe navhavhiiha avhalugu vhaaho
pansi ya vinama vwaho kuuti vhakushindishe.”’h
37 “Inga uDaavhudi wuuyo akumwita uChilisiti kuuti wu Mwene, vhuli vhuli woope uChilisiti ayiime mwana waakwe?” Avhantu avhinji vhaala, vhahamutejelezyaga ku luseshelo ulupiti.
UYeesu akuvhasoha avhantu izya shifumbo
(Mataayi 23:1-36; Luuka 20:45-47)
38 UYeesu ahasambilizyaga havhili ahatinji, “Muvhashevhaje avhasambiilizi avha ndajizyo izya Moose, vhe vhakusungwa kutandaala lwe vhazwaye inkanzu zyavho, havhili vhakwanza kuuti avhantu vhavhalamuhaje ku mushinzi mu zyansokoni. 39 Vhakusungwa kutendama mu vitengo ivwa pilongolela mu masinagoogi na mu vikulukuulu. 40 Vhanaavho vhe vhakuvhafwula inyumba zyavho avhantanda avhafwilwe, ileelo ku shifumbo shaavho vhakupuuta impuuto intali. Isiku lya kulongwa vhalilongwa nkaani.”
Impuutile iya mwantanda umuziishe
(Luuka 21:1-4)
41 UYeesu ahatendama pa Nyumba iMfinjile papiipi ni mbogooso iya kufumizya impuutile kwa Mulungu. Ahenyeelezya avhantu avhinji vwe vhahafumwaga impiiya mu mbogooso. Avhadumbwe avhinji vhahavhiihaga impiiya inyinji. 42 Ahafiha umwantanda wooka umuziishe umupiina. Ahavhiiha ishilingi zivhili vhweleele. 43 Pe uYeesu ahavhiita avhasundikwa vhaakwe ahati, “Nalyoli nkuvhavhuuzya kuuti, umwantanda umuziishe umupiina uno, aafumwa ivwinji kuluusya vhonti vhe vhavhiisile mu mbogooso. 44 Mwe pe avhanji vhonti vhavhiisile zye zyasyaye kufumiilila mu piiya zyavho. Ileelo umwantanda uno poosye ayiime mupiina, aafumwa vwonti vwe ali naavwo, havhili zye zyamile zye ziniizyo vhweleele.”