11
UYeesu akwinjila mu Yelusaleemu ku luseshelo
(Mataayi 21:1-11; Luuka 19:28-40; Yoohani 12:12-19)
1 UYeesu na vhasundikwa vhaakwe vhápalamiiye ku Yelusaleemu, pe vhahatuushila mu nkaaya izya Betaniya na Betifeji, muntende mwi gamba ilya Mizeituni.a Ahavhiita avhasundikwa vhaakwe vhavhili, 2 ahavhavhuuzya ahati, “Sogooli mu nkaaya ye yili mwilongolela lyinyu. Lwe mwinjila umwo, kwe muyaaje indogovhi inyinsi ye yitahalimbilwa nu muntu naalumo, vhayikunjiliiye. Muyisatule, mundeetele ipa. 3 Umuntu inga avhavhuziilizya kuuti, ‘Shooni she mukuyisatula indogovhi ino?’ Muhatinji, ‘UMwene akuyanza, kwe ayigalusye shiniishi.’”
4 Vhahasogola, vhahayaaga indogovhi inyinsi paluvhazu pi dala ipiti, vhayikunjiliiye panzi pa nyumba, pe vhahayisatula. 5 Avhantu vhamo vhe vhímiliiye paala lwe vhakusatula vhahavhavhuziilizya, vhahati, “Shooni she mukuyisatula indogovhi ino?” 6 Vhahavhaamula inza vwe uYeesu ávhalajiziizye, vhoope vhahavhitishila. 7 Vhahamuleetela uYeesu indogovhi yiila. Vhahatenga amenda gaavho pamwanya pa ndogovhi, uYeesu ahatendama pamwanya yaakwe.
8 Avhantu avhinji vhahatenga amenda mwi dala, vhamo amatundu ge vhátemile mu magunda, kuuti vhamuposheele uYeesu. 9 Avhantu vhonti vhe vhámulongoleeye uYeesu na vhe vhahamulandataga, vhahaluluutaga nu kumutiima vhahatinji,
“Ashindikwaje!b
Alosiitwe we akwinza kwi zina ilya MWENE!c
10 Vhulosiitwe uvhumwene uvhwa Taata wiitu uDaavhudi vhwe vhukwinza.
Ashindikwaje uMulungu we ali kumwanya!”
11 UYeesu na vhasundikwa vhaakwe vhahafiha mu nkaaya iya Yelusaleemu, vhahinjila mu luvhungaano ulwa Nyumba iMfinjile.d UYeesu ahenyeelezya ahinza mwonti, mwe háamile havhaliilizyo ha hamazuuvha, ahafuma pooka na vhasundikwa vhaakwe kumi na mbiili, vhahasogola ku Betaniya.
UYeesu akulitipa ituvhu
(Mataayi 21:18-19)
12 Isiku ilya vhuvhili inzanchi, uYeesu na vhasundikwa vhaakwe vhahafuma ku Betaniya, inzala yihamuluma uYeesu. 13 Ahalilola ituvhu ukutali, lilemvile amatundu aminji. Ahalipalamila ayeenye inga lihomile amantonongwa. Lwe aafiha ahaaga matundu geeka, mwe hatáamile havhaliilizyo ha mantonongwa. 14 UYeesu ahalivhuuzya ituvhu liila ahati, “Kufuma ileelo ili na shiima, umuntu atahagaaje amantonongwa kufuma muli iwe.” Avhasundikwa vhaakwe vhahiivwa vwe akuyanga.
UYeesu akuyizelufwa iNyumba iMfinjile
(Mataayi 21:12-17; Luuka 19:45-48; Yoohani 2:13-22)
15 Vhahafiha mu Yelusaleemu, uYeesu ahinjila mu luvhungaano ulwa Nyumba iMfinjile. Ahataliha kuvhashimbizya vhe vhahakazyaga nu kukala ivintu muumwo. Ahazigwisya imeeza zya vhe vhahandulizanyaaga impiiya ni vitengo ivwa vhe vhahakazyaga inkunda. 16 Ahavhahaana vhonti kwinjizya ivintu ivwa kukazya pa Nyumba iMfinjile. 17 Ahataliha kusambiilizya, ahati, “Yisimviilwe mu Vhusimbe uVhufinjile kuuti:
‘INyumba yaane yiliivha Nyumba ye avhantu avha nsi zyonti vhaliputilaga.’e
Ileelo imwe muyivhiisile kuvha ‘vhuuyo uvhwa vhiivha.’”f
18 Avhapuuti avhapiti avha Vhayuuda na vhasambiilizi avha ndajizyo izya Moose vhahazyivwa zye avhomba, vhahanda kulondola vwe vhamugoje. Ileelo vhógofile kumulema mwe avhantu vhahasukumilaga insambiilizyo zyakwe. 19 Lwe haafiha ahavhaliiilizyo aha hamazuuvha, uYeesu na vhasundikwa vhaakwe vhaheepa mu nkaaya muula.
UYeesu akusambiilizya izya kuvhaswila avhanji
(Mataayi 21:20-22)
20 Indaavhi yaakwe inzanchi, lwe vhakutuuha vhahalilola ituvhu liila lyumile lyonti na mazi vhweleele. 21 UPeeteli ahakumbuha izyi tuvhu liila, ahati, “Musambiilizi, yeenya! Ituvhu lye waalitifile lyumile.” 22 UYeesu ahamwamula ahati, “Muvhanje nu lwitiho kwa Mulungu. 23 Nalyoli, nkuvhavhuuzya, inga umuntu alivhuuzya igamba ili kuuti, ‘Kumpuuha ipa, ugwile mwa sumbi’, inga atali na maganigani mu mwoyo waakwe, ileelo ayitihaje kuuti nalyoli zye akulaavha zikuvhombeha havhili zilivhombeha. 24 Mwe muumwo nkuvhavhuuzya kuuti, zyonti zye mukulaavha lwe mukupuuta, nalyoli mwitihaje kuuti mwaposheela, uMulungu kwe avhapanje. 25 Lwe mukwimiilila kupuuta, inga umuntu wonti avhavhombeeye ivhiivhi mumuswilaje, inga uTaata wiinyu uwa kumwanya avhaswilaje niimwe imbiivhi zyinyu.” [ 26 Ileelo inga mutakuvhaswila avhanji, woope uTaata wiinyu uwa kumwanya atangavhaswila niimwe imbiivhi zyinyu.]
Avhalongozi vhakwanza kumanya amaha aga Yeesu
(Mataayi 21:23-27; Luuka 20:1-8)
27 Vhahafiha ku Yelusaleemu havhili, uYeesu ahajendaga pa Nyumba iMfinjile. Avhapuuti avhapiti avha Vhayuuda, na vhasambiilizi vha ndajizyo izya Moose na vhasongo vhahamusogolela, 28 vhahamuvhuziilizya, vhahati, “Ukuvhomba zyonti izi ku maha vhuli? Havhili, wu naanu we akupiiye amaha aga kuvhomba izi?” 29 Ileelo uYeesu ahati, “Niine imbavhuziilizye lyoka, niimwe munaamule, inga mwanaamula pe kwe imbavhuuzye kuuti, maha wuli ge nkuvhombela izi. 30 Amaha aga Yoohani aga kwozya gáfumile kwa Mulungu kumwanya, pamo ku vhantu? Munaamule.”
31 Vhahanda kuvhuzilizanya vhuuho vheeka vhahati, “Inga twati gáfumile kumwanya, kwe ati, ‘Shooni she mutahamwitihaga?’ 32 Inga twati gáfumile ku vhantu, avhantu kwe vhaviitwe.” Vhahoogopa mwe avhantu vhonti vhámumanyile uYoohani kuuti mukuvhwi uwa nalyoli. 33 Vhahamwamula uYeesu vhahati, “Tutamanyile.” Woope uYeesu ahati, “Niine ntakuvhavhuuzya kuuuti, maha vhuli ge nkuvhombela zyonti izi.”