10
UYeesu akusambiilizya izya kulehaana
(Mataayi 19:1-12; Luuka 16:18)
1 UYeesu na vhasundikwa vhaakwe vhaheepa pe vhahavhanga, vhahazyungulaga mu mukowa uwa Yudeeya, na mu nsi iya mwisyila ilyi jenje uYolodani. Impuga impiti iya vhantu yihasogolaga ku kwakwe nu kumuzyunguula. Ahataliha kuvhasambiilizya inza vwe ahavhombaga.
2 Isiku limo aVhafalisaayi vhahasogola kumulinga, vhahanda kumuvhuziilizya vhahati, “Mwe muumwo umulume kumutavhula umushi waakwe?” 3 UYeesu ahamwamula ahati, “UMoose álajiziizye shooni?” 4 AVhafalisaayi vhahamwamula vhahati, “UMoose ahiitiha kuuti umulume amutavhulaje umushi nu kumuleha.” 5 UYeesu ahati, “UMoose ásimvile indajizyo izyo mwe pe avhwenyi uvhugomu uvhwa mooyo gaavho vwe gaholiine na giinyu. 6 Ileelo kufuma ku vhwandilo uvhwa nsi, ‘UMulungu ápezile umwanaavuli nu mwantanda.’a 7 ‘Umwanaavuli akumuleha uyise nu nyina, akusyelementana nu mushi waakwe, 8 vhoope vhavhili vhakuvha umuvhili wooka.’b Mwe muumwo avhantu ivha vhavhili vhatakwima vhavhili havhili, wukwima muvhili wooka. 9 Mwe muumwo she ashisopenkiinye uMulungu, umuntu atahashilehaanye.”
10 Lwe vháali mu nyumba yimo avhasundikwa vhaakwe vhahamuvhuziilizya havhili izwi ilya kulehaana. 11 Ahavhavhuuzya ahati, “Umuntu wonti we akumuleha umushi nu kunyatula umwantanda uvhunji lwe akuvhembuha, akumunanjila umushi waakwe. 12 Woope umwantanda we akumuleha umulume waakwe nu kunyatulwa nu mwanaavuli uvhunji, lwe akuvhembuha.”
UYeesu akuvhaloota avhaana
(Mataayi 19:13-15; Luuka 18:15-17)
13 Avhantu vhahamuleetela uYeesu avhaana vhaavho avhansi kuuti avhavhishile inyoovhe, ileelo avhasundikwa vhaakwe vhahavhapilila. 14 UYeesu atahasungwa lwe aalola vhakuvhadindila, ahati, “Vhaleshe avhaana ivho vhinze kuli ine, mutavhadindilaje, mwe pe inga vhaliipo avhantu vhe vhali inza avhaana, uvhumwene uvhwa Mulungu vhuvhahondeeye. 15 Nalyoli nkuvhavhuuzya, inga umuntu wonti atakuvhwitiha uvhumwene uvhwa Mulungu inza umwana umunsi vwe akuposheela, ataliyinjila mweneemo.” 16 UYeesu ahavhakuukula avhaana, ahavhavhiishila inyoovhe, ahavhaloota.
UYeesu akusambiilizya izya vhulanzi uvhwa shiima
(Mataayi 19:16-30; Luuka 18:18-30)
17 UYeesu ahanda kwepa paala, umuntu wumo ahamushimbiilila, ahamusugamilila, ahamuvhuziilizya ahati, “Musambiilizi mwinza, inkonzye vhuli inga imbwaje uvhulanzi uvhwa shiima?” 18 UYeesu ahamwamula ahati, “Shooni she ukuniita kuuti ne mwinza? Ataliipo umwinza nkandi uMulungu weeka. 19 Uzimanyile indajizyo izya Moose zye zikuti, ‘Utagogaje, Utavhembuhaje, Utiivhaje, Utasimishizyaje ilenga, Utahopenkanyaaje, Uvhashindihaje utaata nu maayi waaho.’”c 20 Woope ahamwamula, ahati, “Musambiilizi, izi zyonti nkazilema kufuma kwe ku vhulumendo vhwane.” 21 UYeesu ahamwenya, ahamukunda, ahamuvhuuzya kuuti, “Usovheliilwe ishintu shooka vhweleele. Sogoola, ukazye vwonti vwe uli navwo, uvhape avhapiina impiiya zye waapata, uliyiima ni nsavho ku mwanya. Pe uyinze undandate.” 22 Ileelo uweene lwe ayiivwa izwi liila, ahavha ni nkansi pa sheeni, aheepa uku asimiliilwe, mwe pe áamile ni vwuma ivwinji.
23 UYeesu aheenya imbazu zyonti, ahavhavhuuzya avhasundikwa vhaakwe, ahati, “Shiliivha shigomu ku vhantu avha vwuma kwinjila ku vhumwene uvhwa Mulungu!” 24 Avhasundikwa vhaakwe vhahasukumila kwivwa amazwi gaakwe. UYeesu ahavhavhuuzya havhili ahati, “Vhaana vhaane, shigomu nkaani ku vhe vhakusuuvhila ivwuma kwinjila ku vhumwene uvhwa Mulungu!d 25 Shipupuusu ingamila kwinjila pi ndovhoolwi ilya nsindaani, kuluusya udumbwe kwinjila ku vhumwene uvhwa Mulungu.” 26 Avhasundikwa vhaakwe vhahasukumila nkaani, vhahavhuzilizanya, vhahati, “Pe wu naanu we angavhwezya kwinjila?” 27 UYeesu ahavheenya, ahati, “kwinjila ku vhumwene uvhwa Mulungu, ku vhantu litangavhombeha, ileelo kwa Mulungu lingavhombeha, mwe pe hataliipo aha kumupoota uMulungu.”
28 UPeeteli ahanda kumuvhuziilizya kuuti, “Tulesile vwonti, tukulandasite iwe. Iswe kwe zyime vhuli?” 29 UYeesu ahati, “Nalyoli, umuntu inga alesile inyumba kunongwa yaane na ku Mazwi aMinza aga Mulungu, havhili avhalesile avhanine avhanaavuli poosye avhalindu nu nyina nu yise na vhaana poosye amagunda, 30 uMulungu alimupa ivwinji nkaani ku havhaliilizyo hanaaha. Aliivha ni nyumba na vhanine avhanaavuli na vhalindu nu nyina na vhaana na magunda. Pooka niizyo kuuti avhanje na mayimba. Ku havhaliilizyo he hakwinza aliposheela uvhulanzi uvhwa shiima. 31 Ileelo avhantu avhapiti ku havhaliilizyo iha, vhaliyiima vhansi ku havhaliilizyo he hakwinza, avhantu avhansi ku havhaliilizyo iha, vhaliivha vhapiti ku havhaliilizyo he hakwinza.”
UYeesu akuyanga ulwa vhutatu izya kufwa nu kuzyuha kwakwe
(Mataayi 20:17-19; Luuka 18:31-34)
32 UYeesu na vhasundikwa vhaakwe vháali mwi dala kusogola ku Yelusaleemu, avhantu avhanji vhahanda kuvhalandata. UYeesu ahalongolela mwilongolela, avhasundikwa vhaakwe vhahasukumila, avhantu vhe vhahamulandataga vhahiima ni lyoga. Ahavhanyatula havhili kuluvhazu vhaala kumi na mbiili, ahanda kuvhapanjila zye kwe zimwaje. 33 UYeesu ahati, “Yeenyi! Twasogola ku Yelusaleemu, ukwo ine ne Mwana wa Aadamu nkusogola kulemwa na vhapuuti avhapiti avha Vhayuuda na vhasambiilizi avha ndajizyo izya Moose, kwe vhandonje imfwe, nu kuntwala ku vhantu vhe te Vhayuuda. 34 Vhoope kwe vhansaamule nu kunswilila amati nu kunkoma nu muchaapu nu kungoga. Ileelo isiku ilya vhutatu ndizyuha.”
UYaakobu nu Yoohani vhakulaavha uvhupiti kwa Yeesu
(Mataayi 20:20-28)
35 UYakobo nu Yoohani, avhaana vha Zebedayi, vhahasogola kwa Yeesu, vhahati, “Musambiilizi, tukwanza utuvhombele lyonti lye tukukulaavha.” 36 UYeesu ahavhavhuziilizya ahati, “Mukwanza imbavhombele ishooni?” 37 Vhahati, “Lwe wakonzya uvhumwene vhwaho tukukulaavha tuhaavhe pooka naawe, wumo ahatendame kuluvhazu lwaho ulwa kundiilo, uwamwavho kumongo.” 38 UYeesu ahati, “Mutamanyile zye mukundaavha. Mungamwelela ishikombe isha mayimba she kwe mwelele ine, poosye kwozelwa ulwozyo ulwa mayimba lwe kwe noozelwe?”e 39 Vhahati, “Ii tungavhomba.” UYeesu ahavhavhuuzya, ahati, “Ishikombe she kwe mwelele ine, niimwe vhweleele kwe mumwelele, nu lwozyo lwe kwe noozelwe ine, niimwe vhweleele kwe mwozelwe. 40 Ileelo, kutendama kuluvhazu lwane ulwa kundiilo nu lwa kumongo, te mbombo yaane kuuvhapa. Uvhuzilo uvhwo, vhwa vhantu vhe vhahavhiishilwa nziila.”
41 Avhasundikwa avhamwavho kumi lwe vhiivwa kulaavha kwa Yaakobu nu Yoohani, vhahataliha kuvhaviitilwa. 42 UYeesu ahavhiita ahati, “Mumanyile vwe avhalongozi avha vhantu vhe te Vhayuuda, vhakuvhakonzya ku vhuhali, havhili vwe avhapiti ivho vhakuvhakonzya avhantu havhiivhi. 43 Ileelo kuli imwe zitahaavhe vhwevhulo. We akwanza kuvha mupiti wiinyu, avhe muvhomvi wiinyu. 44 We akwanza kuvha wa kwanda muli imwe, avhe muzya wa vhonti. 45 Mwe pe ine ne Mwana wa Aadamu ntinzile kuvhombelwa, nkandi kuvhavhombela avhantu, nu kufumwa uvhupuuma vhwane kuvhatavhula avhantu avhinji.”
UYeesu akumuponia untonko uBatolomaayo
(Mataayi 20:29-34; Luuka 18:35-43)
46 UYeesu na vhantu vhamo vhahafiha ku Yeeliko. Lwe ahavhaliilizyo hatuuha uYeesu ahanda kujenda kufuma mu nkaaya iyo na vhasundikwa vhaakwe pooka ni mpuga impiti iya vhantu. Vhahamwaga umuntu wumo mwi dala we áali wu ntonko. Izina lyakwe áali wu Batolomaayo, uyise waakwe áali wu Timayi. Ahatendamaga mu luvhazu mwi dala kuvhalaavha avhantu. 47 Lwe ayiivwa kuuti uYeesu uwa ku Nazaleeti akutuuha, pe paala uBalitimayi ahataliha kuvhilishila, “We Yeesu, Mwana wa Daavhudi, undolele uvhwila!” 48 Avhantu avhinji vhahamupilila vhahati, “Puuma!” tavhasajiiye, pe ahonjezya kuvhilishila nkaani kuuti, “We Yeesu, Mwana wa Daavhudi, undolele uvhwila!” 49 UYeesu ahimiilila, ahati, “Mwite.” Pe vhahamwita untonko ula, vhahati, “Akukwita, sankaana! Vhuuha.” 50 Pe paala ahadomoha ahalileha igolole lyakwe, ahasogola kwa Yeesu. 51 UYeesu ahamuvhuziilizya ahati, “Ukwanza inkuvhombele shooni?” Untonko ula ahamwamula, “Musambiilizi, nkwanza kulola havhili.” 52 UYeesu ahamuvhuuzya ahati, “Sogoola, nakuponia mwe pe uli nu lwitiho.” Pe paala ahataliha kulola, ahamulandata uYeesu mwi dala.