9
1 UYeesu ahavhavhuuzya avhantu ahati, “Nalyoli nkuvhavhuuzya kuuti, vhaliipo avhantu vhamo vhe vhimiliiye ipa, te vhahaafwe haa, lwe vhashiili kuvhulola uvhumwene uvhwa Mulungu lwe vhukwinza ku maha.”
UYeesu akugalunkana pa minso
(Mataayi 17:1-13; Luuka 9:28-36)
2 Lwe zyatuuha insiku sita, uYeesu ahavhanyatula uPeeteli nu Yaakobu nu Yoohani, ahasogola navho ku kwilu kwi gamba itali, vhahavha vheeka. Pe uYeesu ahagalunkana pa minso she vhakwenya. 3 Amenda gaakwe gahataliha kunyengʼenyela, gahiima mazelu nkaani, nuumo umuntu mu nsi umu we angahanda kufishila uvhuzelu uvhwo. 4 Pe uEeliya nu Moose vhahavhaloleshela, vhoope vhahapangaga nu Yeesu. 5 UPeeteli ahamuvhuuzya uYeesu ahati, “Musambiilizi, hinza iswe tuvhanje panaapa, tuzenje ivwegwi vitatu, shimo shivhe shaaho, shimo shivhe sha Moose, ishamwavho shivhe sha Eeliya.” 6 UPeeteli atámanyile lye akuliyanga, mwe pe vhálemiilwe ni lyoga nkaani. 7 Pe lihavhoneha ivhingo, lihavhagubishila, izwi lihivwiha kufuma mwi vhingo ilyo kuuti, “Uno Mwana waane unkundwa, mumutejelezyaje.” 8 Pe lwe vhakutalanganya, vhatahamulola uEeliya nu Moose, nkandi we Yeesu weeka na vhoope.
9 Lwe vhakwiha igamba, uYeesu ahavhahaana vhatahamuvhuuzye umuntu nuumo zye vhazivhwenyi, kufishila lwe uweene uMwana wa Aadamu azyuha. 10 Vhahalilema izwi liila, vhahanda kuvhuzilizyanya vheeka kuuti, “Kuzyuha she shooni?” 11 Vhahamuvhuziilizya uYeesu vhahati, “Avhasambiilizi avha ndajizyo izya Moose vhátili uEeliya kwe alongolele kwinza lwe ashiili kwinza uChilisiti, mwe muumwo?” 12 UYeesu ahavhaamula ahati, “Mwe muumwo, uEeliya akwanzilwa alongolele kwinza, kusengaanya zyonti. Pooka niizyo, shooni she yisimviilwe kuuti, ine ne Mwana wa Aadamu ndiyimba amayimba aminji, nu kujevhulwa? 13 Ileelo nkuvhavhuuzya kuuti, uEeliya ahinza, vhoope avhalongozi vhahamuvhombela imbiivhi zyonti zye vhahanzaga, inza vwe zyásimviilwe.”
UYeesu akumuponia umwana uwa mpepo inkandamanu
(Mataayi 17:14-21; Luuka 9:37-43a)
14 Vhahafiha ku vhasundikwa avhamwavho, vhahaaga pali ivhungaana ipiti ilya vhantu livhazyunguluuye, avhasambiilizi avha ndajizyo izya Moose vhahadalinkanaga navho. 15 Avhantu vhonti lwe vhamulola uYeesu vhahasukumila nkaani, vhahamushimbiilila, inga vhamulamushe. 16 UYeesu ahavhavhuziilizya avhantu vhaala ahati, “Mukudalinkana ishooni navho?” 17 Umuntu wumo pi vhungaana ahamwamula ahati, “Musambiilizi, namuleeta umwana waane umulumendo ku kwaho, ali ni mpepo inkandamanu, yoope yikumuvhiiha uvhwashinuunu. 18 Lwe yikumulema, yikumugwisya pansi, akufumwa itatafula mwi lomu, akusyekula amiino, akwuma nkaani umuvhili wonti. Imbalaavile avhasundikwa vhaaho kuuti vhamwefwe impepo iyo, ileelo vhaposiitwe kuyeefwa.”
19 UYeesu ahavhavhuuzya ahati, “Mwe vhantu avha havhaliilizyo iha, mutali nu lwitiho! Kwe ntendame niimwe kufishila lyeli? Havhili kwe imbajimbilile kufishila lyeli? Muleete umwana uyo kuli ine.” 20 Vhahamutwala ku kwakwe. Impepo lwe ya mulola uYeesu, yihamuvhiiha umwana ishizilisi, ahagwa pansi, ahanda kugalagata nu kufumwa itatafula mwi lomu. 21 UYeesu ahamuvhuziilizya uyise uwa mwana ula ahati, “Zyamwazile lyeli?” Ahati, “Kufuma ku vhunsi vhwakwe. 22 Ulwinji yikumusumba mu mwoto na mu minzi, inga yimugoje. Inga ungavhwezya, tulolele uvhwila, utwavwe.” 23 UYeesu ahati, “Shooni she ukuti, ‘Inga ungavhwezya?’ Zikuvhwezenkana zyonti kwa muntu wonti we ali nu lwitiho.” 24 Pe paala uyise uwa umulumendo ula ahahoola inkoolo, ahati, “Niitiha! Ileelo ulwitiho lwane lutakwiliine, naavwa imbe nu lwitiho ku kwaho!”
25 UYeesu ahalola avhantu vhakwonjela kumwinzila. Ahayihajila impepo inkandamanu yiila ahati, “We mpepo we umuvhomvile umulumendo uno kuvha wushinuunu havhili wu kuutwi, yeepa, utahashele havhili kumwinjila naalumo!” 26 Impepo inkandamanu yiila yihahoola nu kumugalagaasya ku maha nkaani, pe yihepa. Umulumendo ula ahiima ngati afuuye, avhantu avhinji vhahatinji aafwa. 27 UYeesu ahamulema inyoovhe, ahamuvhuusya, woope ahimiilila.
28 UYeesu na vhasundikwa vhaakwe vhahinjila mu nyumba paala pe vhahavhanga, vhahamuvhuziilizya ku kwilu vhahati, “Shooni she iswe twaposiitwe kuyeefwa impepo inkandamanu yiila?” 29 UYeesu ahati, “Impepo inkandamanu ye yili vhwevhulo utangayeefwa, nkandi lwe ukumulaavha uMulungu nu kuyiima ishaakulya.”
UYeesu akuyanga havhili izya kufwa nu kuzyuha kwakwe
(Mataayi 17:22-23; Luuka 9:43b-45)
30 UYeesu na vhasundikwa vhaakwe vhaheepa kuula, vhahatuuha pahati pa mukowa uwa Galilaaya. Atahanzaga avhantu vhamanye kwe ali 31 mwe pe ahavhasambilizyaga avhasundikwa vhaakwe. Ahatinji, “Ine ne Mwana wa Aadamu nkusogola kulemwa nu kungoga, ileelo isiku ilya vhutatu ndizyuha.” 32 Avhasundikwa vhaakwe vhatályagiinye izwi ilyo, ileelo vhahogopa kumuvhuziilizya.
UYeesu akusambiilizya izya vhulongozi
(Mataayi 18:1-5; Luuka 9:46-48)
33 UYeesu na vhasundikwa vhaakwe vhahafiha ku Kapelanawuumu. Lwe vhali mu nyumba mwe vháfishiiye, ahavhavhuziilizya ahati, “Mwadalinkanaga shooni mwi dala?” 34 Mwi dala vhahadalinkanaga vhuuvho vheeka kuuti wu naanu we mupiti pahati yaavho. Lwe avhavhuziilizya vhahiima mwa. 35 UYeesu ahatendama pahati, ahavhiita vhaala kumi na mbiili, ahati, “Inga umuntu akwanza kuvha wa kwanda, avhe kwisinda ku vhonti, havhili avhe muvhomvi wa vhonti.” 36 Ahamunyatula umwana umunsi, ahamwimiiliha pilongolela lyavho, ahamupahatila, ahati, 37 “We akumuposheela umwana umunsi inza uno kwi zina lyane, akumposheela neene. We akumposheela ine, akumuposheela ula we ansoteleziizye.”
We atakumuhaana uYeesu ali pooka nawo
(Luuka 9:49-50)
38 UYoohani ahati, “Musambiilizi, tumuvhwenyi umuntu wumo we akwefwa impepo inkandamanu ku maha aga izina lyaho. Tulinzile kumuhaana mwe pe atali pooka niiswe.” 39 UYeesu ahavhavhuuzya ahati, “Mutamuhaanaje haa, umuntu we akuvhomba amafindango kwi zina lyane, atangataliha kunjanga ahavhiivhi havhili panaapo. 40 Mwe pe we atakutuhaana iswe, ali pooka niiswe. 41 Umuntu wonti we akuuvhapa aminzi aga kumwela, mwe pe imwe mwe vhantu vha Chilisiti, nalyoli umuntu uyo alivhwaga uvhulootwe.”
UYeesu akusambiilizya izya kuzelufwa
(Mataayi 18:6-9; Luuka 17:1-2)
42 “Umuntu wonti we akuvhapuvwa avhansi vhe vhakuniitiha ine, kwashi ku kwakwe kumupinyiila ulwala mu nsingo yaakwe nu kumusumbila mwa sumbi, kuluusya uMulungu vwe angamusunda.a 43 Inga inyoovhe yaaho yikupuvwa uyidumule. Yihondeeye uyinjile ku vhulanzi ni shinkuntu kuluusya kusumbilwa mu mwoto uwa shiima ni nyoovhe zyonti.b [ 44 Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.] 45 Inga ishinama shaaho shikupuvwa, ushidumule. Yihondeeye uyinjile ku vhulanzi she we kwesu, kuluusya kusumbilwa mu mwoto uwa shiima ni vinama vwonti. [ 46 Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.] 47 Inga ilyinso lyaho likupuvwa, ulifwonkole, ulisumbe. Yihondeeye kwinjila ku vhumwene uvhwa Mulungu ni lyinso lyoka, kuluusya kusumbilwa mu mwoto uwa shiima she uli na minso gavhili. 48 Pa vhuyo paala imvinyu zililyanga ivwala vwavho haavhli zitaliifwa, nu mwoto wutaliizima.c