8
UYeesu akuuvhapa ishaakulya avhantu elufu nne (Mataayi 15:32-39)
1 Insiku zye ziila, ivhungaana ipiti nkaani lihavhungaana havhili. Pisinda avhantu vhaala vhahasililwa ishaakulya. Pe uYeesu ahavhiita avhasundikwa vhaakwe, ahavhavhuuzya ahati, 2 “Navhalolela uvhwila avhantu ivha, mwe pe insiku zitatu tuli navho, havhili ishaakulya naashimo. 3 Avhantu ivha, vhamo vhafumile ukutali, inga nati vhavhwele kumwavho ni nzala kwe vhazilishe mwi dala.” 4 Avhasundikwa vhaakwe vhahamwamula vhahati, “Avhantu ivha vhinji nkaani, ipa pe pi hombe, kwe tushaaje kwoshi ishaakulya isha kuvhakwila vhonti?” 5 Ahavhavhuziilizya ahati, “Muli na makaati galinga?” Avhasundikwa vhaakwe vhahamwamula vhahati, “Tuli na makaati saba.”
6 Pe uYeesu ahavhavhuuzya avhantu kuuti vhatendame pansi. Ahaganyatula amakaati gaala saba, ahagapuutila nu kumusalifwa uMulungu. Ahamensulanya, ahaavhapa avhasundikwa vhaakwe, vhoope vhahaavhapa avhantu. 7 Inswi zyope zyámile nyinsi vhweleele, ahazipuutila, ahati, “Muvhape avhantu.” 8 Avhantu vhaahalya, vhahiikuta, shihasyala ishaalila ivitundu saba. 9 Vhe vháliiye vháamile avhantu elufu nne. Pe uYeesu ahavhalaga. 10 Ahalimbila mu mutumbwi pooka na vhasundikwa vhaakwe, vhahasogola kuluvhazu ulwa Dalimanuta.
AVhafalisaayi vhakwanza ishilolesyo isha mafindango
(Mataayi 16:1-4)
11 AVhafalisaayi vhahiivwa kuuti uYeesu aafiha, vhahasogola ku kwakwe, vhahataliha kudalinkana nu kumulinga. Vhahanzaga alolesye ishilolesyo isha kulolesya kuuti afumile kwa Mulungu. 12 UYeesu ahasimiililwa nkaani mu mwoyo waakwe, ahati, “Shooni she avhantu avha havhaliilizyo iha vhakwanza ishilolesyo? Nalyoli nkuvhavhuuzya kuuti, avhantu ivha te mbalolesye ishilolesyo naashimo.” 13 Pe uYeesu ahavhaleha aVhafalisaayi, ahinjila havhili mu mutumbwi, ahalamba kwisyila lya sumbi.
Uvhusafu uvhwa Vhafalisaayi nu vhwa mwene uHeelodi
(Mataayi 16:5-12)
14 Avhasundikwa vháluviilwe kupaya amakaati, ileelo vháali nu mukaati wooka vhweleele mu mutumbwi. 15 Lwe vhaakulamba usumbi, pe uYeesu ahavhasoha ahati, “Mushevhaje uvhusafua uvhwa Vhafalisaayi nu vhwa Heelodi.” 16 Avhasundikwa vhaakwe vhahataliha kudalinkana vheeka, mwe vhahatinji ayanga vhwe vhulo mwe vhatáamile na makaati. 17 UYeesu ahamanya vwe vhakudalinkana, ahavhavhuuzya ahati, “Mukudalinkana mwe mutali na makaati? Mushiili kuzyaganya nu kuzimanya? Vhuli amooyo giinyu magomu? 18 Muli na minso, ileelo shooni she mutakulola? Muli na makutwi, ileelo shooni she mutakwivwa?b Pamo mutakukumbuha 19 vwe námensuliinye amakaati gasaano, nu kuuvhapa avhantu elufu tano? Mwásevile ishaalila ivitundu vilinga?” Avhasundikwa vhaakwe vhahamwamula vhahati, “Twásevile ivitundu kumi na mbiili.” 20 Pe ahavhavhuziilizya havhili ahati, “Na gaala amakaati saba ge vháliiye avhantu elufu nne, mwásevile ishaalila ivitundu vilinga?” Avhasundikwa vhahati, “Twásevile ivitundu saba.” 21 UYeesu ahati, “Mushiili kuzimanyinsanya?”
UYeesu akumuponia untonko uwa ku Betisayida
22 UYeesu na vhasundikwa vhaakwe vhahafiha mu nkaaya iya Betisayida. Avhantu vhamo vhahamuleetela untonko, vhahamulaavha amupalamansye inga amuponie. 23 UYeesu ahamulema inyoovhe untonko ula, ahasogola nawo kunzi ku nkaaya. Ahamuswilila amati mu minso, nu kumuvhiishila inyoovhe, pe ahamuvhuziilizya ahati, “Ukulola ishooni?” 24 Untonko ahatalanganya, ahati, “Nkulola avhantu, ileelo ngati makwi ge gakujenda.” 25 Ahamuvhiishila inyoovhe havhili ku minso, woope ahatontomela, aminso gahiima minza vhweleele, ahalola vwonti ahinza. 26 UYeesu ahamuvhuuzya umuntu ula ahati, “Vhwela kuhaaya, ileelo utahatuushe mu nkaaya.”
UPeeteli akuhomeha kuuti uYeesu wu Chilisiti
(Mataayi 16:13-20; Luuka 9:18-21)
27 UYeesu na vhasundikwa vhaakwe, vhahatuuhaga mu vijiji ivwa mu Kayisaaliya mu Fiilipi. Lwe vháali mwi dala, uYeesu ahavhavhuziilizya avhasundikwa vhaakwe kuuti, “Avhantu vhakunjanga vhakuti ine ne naanu?” 28 Avhasundikwa vhaakwe vhahamwamula vhahati, “Avhantu vhamo vhakuti we Yoohani uMwozyi we azyusile, vhamo we Eeliya,c vhamo vhakuti we wamwavho mu vhakuvhwi.” 29 Ahavhavhuziilizya ahati, “Niimwe mukuti ine ne naanu?” UPeeteli ahati, “Iwe we we Chilisiti.” 30 UYeesu ahavhasoha avhasundikwa vhaakwe vhatahamuvhuuzye naawumo inongwa zyakwe kuuti wu Chilisiti.
UYeesu akuyanga izya mayimba ni zya kufwa kwakwe
(Mataayi 16:21-28; Luuka 9:22-27)
31 UYeesu ahataliha kuvhasambiilizya avhasundikwa vhaakwe kuuti, nalyoli uweene uMwana wa Aadamu amayimba aminji kwe gamwaje. Avhasongo na vhapuuti avhapiti avha Vhayuuda na vhasambiilizi avha ndajizyo izya Moose vwe kwe vhamuhaane nu kumugoga. Isiku ilya vhutatu, alizyuha. 32 Lwe ayanga apazelu izya mayimba gaakwe, uPeeteli ahamuvuutila uYeesu kuluvhazu, ahataliha kumuhalipila. 33 UYeesu ahagalunkana, ahavheenya avhasundikwa vhaakwe, ahamuhalipila uPeeteli, ahati, “Galuuha mwisinda we Setano, mwe pe zye ukusiivha te zya Mulungu, nkandi ukusiivha izya vhantu.”
34 Pe uYeesu ahiita ivhungaana ilya vhantu pooka na vhasundikwa vhaakwe ahati, “Umuntu wonti we akwanza kundandata, ayisunde wuuyo weeka, ayitwishe ishihovhenkanyo shaakwe,d pe andandate. 35 Umuntu wonti we akulinga kuyipoha wuuyo weeka, uvhulanzi vhwakwe vhuliteega. Ileelo umuntu we akwitiha kufwa kunongwa yaane na Mazwi aMinza aga Mulungu, uweene alivhwaga uvhulanzi. 36 Kutangamwavwa umuntu naashimo, kuvwaga ivwuma vwonti, nu kuteezya uvhulanzi vhwakwe. 37 Poosye umuntu angafumwa shintu vhuli, kuvhutavhula uvhulanzi vhwakwe? 38 Umuntu wonti we akundolela insoni ine na mazwi gaane ku vhantu ivha, avhananzi avha mbiivhi avha havhaliilizyo iha, niine ne Mwana wa Aadamu, ndimulolela insoni lwe nkwinza havhili nu vhushindamu uvhwa Taata waane, pooka na vhahavhizya avhafinjile.”