7
UYeesu akuvhalonga vhe vhahalemaga amaata aga vhasongo avha hali
(Mataayi 15:1-9)
1 Pe aVhafalisaayi na vhasambiilizi avha ndajizyo izya Moose vhahafuma ku Yelusaleemu, vhoope vhahavhungaana kwilongolela kwa Yeesu. 2 Vhahavhalola vhamo avhasundikwa vhaakwe vhakulya ni nyoovhe inkombezu mwe pe vhatágeezile inza avheene. 3 AVhafalisaayi na Vhayuuda vhonti vhatahalyanga ishaakulya inga vhatágeezile mu nyoovhe, mwe pe vhálemile amaata aga vhasongo vhaavho avha hali. 4 Havhili inga vhaafuma ku nsokoni inga vhatayizelufiizye vhatahalyanga. Kwámile ni zinji inyinji izya kulandata inza kwozya ivikombe ni nsonta ni viliilo ivwa kuteleshela.a
5 Pe avheene vhahamuvhuziilizya vhahati, “Shooni she avhasundikwa vhaaho vhatakulandata indajizyo izya vhasongo vhiitu avha hali? Shooni she vhakulya ni nyoovhe inkombezu?” 6 UYeesu ahavhavhuuzya ahati, “Mwe vhashifumbo! Umukuvhwi uYisaayi áyanzile zya nalyoli ku kwinyu kuuti:
‘Avhantu ivha vhakunshindiha ku malomu vhweleele,
ileelo amooyo gaavho gatansajiiye.
7 Vhakuyipuuta vhweleele,
vhakusambiilizya indajizyo izya vhantu, vhakuleha izyane.’b
8 Imwe mulesile indajizyo izya Mulungu, mulemile amaata aga vhantu. 9 Imwe mumanyile kupingaaniha indajizyo zya Mulungu, inga mulandataje amaata giinyu. 10 UMoose átili: ‘Umushindihaje utaata waaho nu maayi waaho,’c na ‘We akumuliga uyise nu nyina waakwe vhamugogaje.’d 11 ileelo imwe mukusambiilizya kuuti: ‘Umuntu inga ali ni sha kumwavwa uyise nu nyina waakwe, ileelo inga ati ishintu isho Kolibani,e 12 pe mutakumwitishizya havhili kuvhaavwa avhapaafi vhaakwe.’ 13 Vwe mukunanganya izwi lya Mulungu nu kujendeelela kulema amaata giinyu ge mukuposhelezanya, havhili mukuvhomba inyinji zye ziholiine niizyo.”
UYeesu akusambiilizya zye zikumuhombezya umuntu
(Mataayi 15:10-20)
14 UYeesu ahiita havhili ivhungaana ilya vhantu avhinji, ahati, “Tejeelezyi mwenti, muzyaganye zye nkuvhavhuuzya. 15 She shikwinjila mwa muntu shitakumuhombezya, nkandi vwe vikumufuma, vwe vikumuhombezya umuntu. [ 16 Umuntu we ali na makutwi atejeelezye.”]
17 Ahalileha ivhungaana ahinjila mu nyumba pooka na vhasundikwa. Avhasundikwa vhahamuvhuziilizya kuuti avhalovhoosezye ishiholanyo shiila. 18 Woope ahati, “Niimwe mwe vhagomu kuzyaganya? Mutamanyile kuuti ishintu she shikumwinjila umuntu kufuma kunzi shitangamuhombezya? 19 Mwe pe shitakumwinjila ku mwoyo nkandi shikwinjila mu lwanda, nu kusogola ku shikwilo.” Kuyanga vhwe vhulo ahavhitishizya ivwakulya vwonti.
20 Ahonjezya kuyanga ahati, “Vwe vikufuma kwa muntu vwe vikumuhombezya. 21 Mwe pe muhati mu mwoyo wa muntu mwe mukufuma insiivho imbiivhi nu vhumalaaya nu vhwivha nu vhugozi nu vhuvhembu nu 22 lugulumwo ulwa vintu ivwa vhanji nu vhuvhiivhi nu kuhopenkanya nu vhunanzi nu mwone nu musaamu na mabaado nu vhupukupuuku. 23 Imbiivhi zyonti izi zikufuma mwa muntu, havhili zye zikumuhombezya.”
Ulwitiho ulwa mwantanda uMugiliki lukumuponia umwana waakwe
(Mataayi 15:21-28)
24 UYeesu aheepa ahasogola mu nkaaya iya Tiilo, ahinjila ku kwilu mu nyumba yimo. Atahanzaga umuntu inga wooka amanye mwe ali, ileelo ahapootwa kuyizyiha. 25 Áliipo umwantanda wumo we umwana waakwe umulindu áamile ni mpepo inkandamanu. Umwantanda uyo ázyivuuye inongwa izya Yeesu, ahinza ahamusugamilila uYeesu. 26 Umwantanda ula atáamile Muyuuda, áamile Mugiliki,f áamile muhaaya wa Silofoyinike. Ahamulaavha uYeesu amwefwe impepo inkandamanu umwana waakwe. 27 UYeesu ahati, “Leha avhaana vhiikute nsuuti, yitakwanzilwa kuzizuvhila imbwa ishaakulya isha vhaana.” 28 Umwantanda ula ahamwamula ahati, “Mwe muumwo Mwene, ileelo imbwa zye zili pansi pa meeza, zikusevha utulagala twe tukulagala, lwe avhaana vhakulya.” 29 UYeesu ahati, “Mwe waamula ahinza, vhwelaga kuhaaya. Ukwaga umwana waaho impepo yeefile.” 30 Lwe aafiha kuhaaya, ahaaga umwana waakwe akaasite pa shitala aponile, impepo yeefile.
UYeesu akumuponia we wushinuunu havhili wu kuutwi
31 Pe uYeesu aheepa ku Tiilo, ahatuuha ku Siidoni, ahashila usumbi uwa Galilaaya ahajendeelela nu kufiha mu nsi iya Dekapoli. 32 Lwe aafiha kuula vhahamuleetela ukuutwi we áamile wu shinuunu, vhahamulaavha amuponie. 33 UYeesu ahamwefwa pe páali impuga, ahiima nawo ku kwilu. Ahaswila amati mu nsamba zya nyoovhe zyakwe nu kumupalamansya ulumili lwakwe, ahinjizya insamba izya nyoovhe mu makutwi gaakwe. 34 Aheenya kumwanya, ahiima nu vhuvhaavi mu mwoyo waakwe ahati, “Efata,” g kwe kuuti “Yiguuha.” 35 Pe paala amakutwi gahiiguha, ulumili lwe lwágomile luhatonta, ahanda kuyanga ahinza. 36 UYeesu ahavhahaana kuuti vhatahamuvhuuzye naawumo zye zivhomvilwe, ileelo vwe ahavhahaanaga vwe vhoope vhahajendelelaga kuzipanga nkaani. 37 Avhantu vhonti vhahasukumila nkaani, vhahati, “Atuvhombela zyonti ahinza, avhatuula avhakuutwi kukwivwa na vhashinuunu kuyanga.”