Maliko 6

Avhahaaya avha ku Nazaleeti vhakumusuufwa uYeesu

(Mataayi 13:53-58; Luuka 4:16-30)

¹ UYeesu na vhasundikwa vhaakwe vhahafuma ukwo, vhahafiha ku nsi iya kumwavho kwe ákuliiye. ² Lwe lyafiha isiku ilya Sabaato, ahataliha kusambiilizya mwi sinagoogi. Avhantu avhinji vhe vháliipo muula, vhahasukumila nkaani nu kuvhuzilizanya kuuti, “Ishi woope uno azyazile kwoshi insambiilizyo izi? Havhili inga njeele vhuli zye ali nazyo uno? Havhili vhaati weneewo mu nyoovhe zyakwe akuvhomba amafindango amapiti. ³ Uno te we wula uselemaala, umwana wa Maliiya, na vhanine vhaakwe vhe vha Yaakobu nu Yoose nu Yuuda nu Siimoni? Na vhanine avhalindu vhaliipo pamwitu panaapa.” Vhahayipunuzya ku kwakwe. ⁴ UYeesu ahati, “Umukuvhwi akushindikwa ku vhanji. Ileelo kumwavho poosye na ku luho lwakwe ha na pamwavho atakushindikwa ha.” ⁵ Atahavhomba havhili amafindango agamwavho, ileelo ahavhavhiishila inyoovhe avhavhinu vhansi, ahavhaponia. ⁶ Ahasukumila nkaani vwe avhantu avhinji vháposiitwe kumwitiha. UYeesu ahazyunguulaga mu nkaaya zye ziila nu kusambiilizya.

UYeesu akuvhasonteelezya avhasundikwa kumi na mbiili

(Mataayi 10:5-15; Luuka 9:1-6)

⁷ UYeesu ahavhiita avhasundikwa kumi na mbiili, inga avhasonteelezye vhavhili vhavhili, ahaavhapa amaha aga kwefwa impepo inkandamanu. ⁸ Lwe vhashiili kwepa ahati, “Nkuvhitishizya kuuti, munyatule indoogo, nkandi mutahanyatule ishaakulya, imbuguulu ni mpiiya. ⁹ Nkuvhitishizya kuuti, muzwale ivilyatu, amenda mutahanyatule gavhili, gakwiliiye ge muzwaye. ¹⁰ Havhili ahavhavhuuzya ahati, inyumba yonti ye vhavhaposheela, muhinjilaje nu kutendama mwe muula kufishila pe muliyeepa mu nkaaya iyo. ¹¹ Mu nkaaya yonti ye vhatavhaposheela nu kuvhatejeelezya, lwe mukwepa mu nkaaya iyo muhavhakunyuntile ulusuuto lwe luli mu vinama vwinyu, kulolesya kuti mwavhasoha.”

¹² Vhaheepa nu kutaliha kulumbiilila kuuti avhantu vhatonte nu kupinduha. ¹³ Vhaheefwa impepo inkandamanu inyinji, havhili vhahavhapaha amafuta kuvhaponia avhavhinu.

Umwene akumugoga uYoohani uMwozyi

(Mataayi 14:1-12; Luuka 9:7-9)

¹⁴ Umwene uHeelodi ahiivwa inongwa izya Yeesu mwe izina lyakwe lyákumusile kwonti. Vhamo vhahayangaga vhahatinji, “Wu Yoohani uMwozyi azyuha. Mwe muumwo, áali na maha aga kuvhomba amafindango.” ¹⁵ Vhamo vhahayangaga vhahatinji, “UYeesu wu Eeliya azyusile.” Vhamo vhahatinji, “Uno mukuvhwi wamwavho mu vhakuvhwi avha hali, we azyusile.” ¹⁶ Ileelo, uHeelodi lwe ayiivwa inongwa izya Yeesu na vhantu vwe vhahayangaga, ahati, “Wu Yoohani, we námudumuuye itwe, azyuha.”

^17-18 UHeelodi ámunyatuuye uHeelodiya we áali mushi wa muzuuna waakwe uFiilipo kuvha mushi. Kunongwa izyo uYoohani ámusosile uHeelodi kuuti, “Wavhomba lye mwiho kumunyatula umushi wa muzuuna waaho.” Pe uHeelodi wuuyo ahasonteelezya avhantu kumulema uYoohani nu kumukunga mu jeela, ahavhomba vhwevhulo kumuhondezya uHeelodiya. ¹⁹ Woope uHeelodiya ahamwuvhililaga uYoohani, ahanzaga kumugoga, ileelo ahapotwaga kumwaga ²⁰ mwe pe uHeelodi ahamugulililaga. Uweene uHeelodi ahamwogopaga uYoohani mwe pe ámanyile kuuti muntu wa nalyoli, havhili mufinjile. Ahasungwaga kumutejeelezya, ileelo lwe amutejeelezya ahasimililwaga nkaani.

²¹ Pe lihaloleha isiku lye lyáhondeeye uHeelodiya kumugoga uYoohani, lyáli lisiku ilya shikulukuulu isha kupaapwa uHeelodi. UHeelodi ahavhalanjila avhahombe vhaakwe na vhapiti avha vhasikaali na vhasongo avha mu Galilaaya. ²² Umulindu uwa Heelodiya ahinjila mwe mwámile ishikulukuulu, ahimba nu kumuhondezya uHeelodi na vhe vhátendiime pooka mu shikulukuulu. UHeelodi ahati, “We mulindu, ndaavha shonti she ukwanza.” ²³ Havhili ahalapa ahati, “Ndaavha shonti she ukwanza, she ungalaavha shitahatuushe inusu ya vhumwene vhwane, kwe nkupe.” ²⁴ Umulindu ula ahafuma, ahasogola kumuvhuziilizya unyina kuuti, “Indaavhe shintu vhuli?” Unyina ahamwamula ahati, “Itwe lya Yoohani uMwozyi.”

²⁵ Pe umulindu ula ahagaluha naluvhiilo kwa Heelodi ahati, “Nkulaavha umpe itwe ilya Yoohani uMwozyi mwi siniya.” ²⁶ Umwene ahiima nu vhuswimiilizu nkaani, ileelo atahanzaga kuhaana mwe álafile pa minso aga vhantu vhe vhátendiime pa shikulukuulu. ²⁷ Pe ahamusonteelezya umusikaali kusogola kuleeta itwe lya Yoohani. Umusikaali ahinjila mu jeela nu kumudumula uYoohani itwe, ²⁸ ahalileeta itwe mwi siniya, ahaamupa umulindu ula, woope ahamutwalila unyina. ²⁹ Avhasundikwa avha Yoohani lwe vhiivwa inongwa izyo, vhahasogola kuwunyatula umuvhili uwa Yoohani, vhahawusyila mu mbiipa.

UYeesu akuuvhapa ishaakulya avhantu elufu tano

(Mataayi 14:13-21; Luuka 9:10-17; Yoohani 6:1-14)

³⁰ Avhatumwa avha Yeesu vhahagaluha kufuma kulumbiilila, vhahavhungaana kwa Yeesu. Vhahamupanjila zyonti zye vhávhomvile nu kusambiilizya. ³¹ UYeesu ahati, “Tujende ku kwilu kwe kutali avhantu, tutuuzye hansi.” Ávhavhuziizye vhwevhulo mwe pe avhantu avhinji vhahavhinzilaga nu kwepa. Kunongwa iya kuvhavhombela avhantu, uYeesu na vhatumwa vhaakwe vháposiitwe nu kuhaaga ahavhaliilizyo aha kulya. ³² Vhahalimbila ivhooti kusogola ku kwilu, pe patáamile avhantu. ³³ Ileelo avhantu avhinji vhahavhalola lwe vhakwepa vhahamanya kwe vhakusogola. Avhantu vhaala pooka na vhanji kufuma inkaaya zyonti, vhahashimbiilila ukwo kwe uYeesu na vhatumwa vhaakwe vhahasogolaga, vhahalongolela kufiha. ³⁴ UYeesu lwe ayiiha mwi vhooti, ahalola ivhungaana ipiti nkaani, ahavhafwila uvhwila, mwe vháamile ngati ngʼonzi zye zitali nu wa kudiima. Ahataliha kuvhasambiilizya ivintu ivwinji.

³⁵ Lwe haafiha hamazuuvha, avhasundikwa vhaakwe vhahati, “Ipa pe pi laala vhweleele, havhili uvhusiku vhwakwila. ³⁶ Uvhalaje avhantu ivha, vhavhale mu magunda na mu nkaaya izya mupiipi vhayikalile ishaakulya.” ³⁷ Ahati, “Vhape ishaakulya.” Vhahamwamula vhahati, “Poosye inga twamile ni mpiiya idinaali miya mbiili, vhuli ukwanza tusogole tuvhakalile ishaakulya?” ³⁸ Ahavhaamula ahati, “Yeenyi, muli na makaati galinga?” Vhaheenya, vhahaaga gali gasaano ni nswi zivhili. ³⁹ Ahavhavhuuzya kuuti vhavhatendamishe vhonti mu mpuga mu mulemvwi. ⁴⁰ Vhahatendama mu mpuga, zimo miya miya, izyamwavho hamsiini hamusiini.

⁴¹ UYeesu ahanyatula amakaati gasaano ni nswi zivhili, aheenya kumwanya, ahavipuutila nu kumusalifwa uMulungu, ahavimensulanya nu kuuvhapa avhasundikwa, vhahavhagavhila vhonti. ⁴² Vhahalya vhahiikuta vihasyala ivwinji. ⁴³ Avhasundikwa vhahasevha vwe vwásyaye, vwízuuye ivitundu kumi na mbiili. ⁴⁴ Vhe vháliiye vháali avhanaavuli elufu tano.

UYeesu akujenda pamwanya pa minzi

(Mataayi 14:22-23; Yoohani 6:15-21)

⁴⁵ UYeesu ahavhalajizya avhasundikwa vhaakwe vhinjile mwi vhooti vhalambe usumbi, vhalongolele kusogola kwisyila mu nkaaya iya mu Betisayida. Uweene ahasyala akulaga ivhungaana. ⁴⁶ Lwe avhalaga, ahasogola kwi gamba kupuuta.

⁴⁷ Lwe paafiha pavhusiku pahati, ivhooti lyámile pahati pa sumbi, woope uYeesu áamile weeka ku nsi inyuumu. ⁴⁸ Ahavhalola avhasundikwa vhaakwe vhakuyimba kuhoma amakasiya mwe pe inkungu yáamile na maha nkaani. Lwe inkanda iya kutaliha yapalamila kuvhilishila, ahajendaga pamwanya pa minzi ulwa vinama, ahanzaga nu kuvhalesheelela. ⁴⁹ Lwe vhamulola akujenda pamwanya pa minzi vhahasiivha kuti pamo muzimu. Vhahahoola inkoolo ⁵⁰ mwe pe vhonti vhamuvhwenyi vhahayeleketwa. Pe ahavhavhuuzya ahati, “Mutogopaje! Sankanaaji! Neene.” ⁵¹ Ahinjila mwi vhooti mwe vháamile, pe paala inkungu yihaleha kuvugula. Vhahasukumila nkaani mu mooyo gaavho ⁵² mwe vhatázyagiinye naazimo vwe uYeesu ávhomvile ifindango ilya makaati. Vhatázyagiinye mwe vháamile vhagomu kuzyaganya.

UYeesu akuvhaponia avhavhinu ku Jenesaleti

(Mataayi 14:34-36)

⁵³ Vhahalamba, vhahafiha insi ya Jenesaleti, vhahiisya inanga iya kwimilishizya ivhooti. ⁵⁴ Vhoope lwe vhiiha mwi vhooti, avhantu vhahamumanya uYeesu. ⁵⁵ Vhaheepa naluvhiilo paala vhahasogola inkaaya zyonti, vhahavhaleeta avhavhinu mu mazagala, vhahamulandata uYeesu pe áamile. ⁵⁶ Kwonti kwe ahasogolaga mu nkaaya, mu vijiiji na mu magunda vhahavhavhiihaga avhavhinu mu nsokoni. Vhahamulaavhaga avhitishile vhapalamansye poosye ikoopi ilya mwenda waakwe. Vhonti vhe vhahapalamansyaga vhahaponaga amavhinu gaavho.