5
UYeesu akumuponia uwa mpepo izya shipena
(Mataayi 8:28-34; Luuka 8:26-39)
1 UYeesu na vhasundikwa vhahalamba usumbi, vhahafiha mu nkaaya iya Vhagelasi.a 2 UYeesu lwe aafuma mwi vhooti, umuntu uwa mpepo inkandamanu we áfumile ku mbiipa, ahahomaana nawo. 3 Umuntu uyo, uvhutendamo vhwakwe vhwáli ku mbiipa. Yáhanikiine kumupinya, poosye na manyoloolo, 4 mwe pe avhantu vhámupinyile ulwinji ni mpingu na manyoloolo, ileelo ahagadumulanyaaga. Atáliipo uwa maha aga kumupoota nu kumudindila. 5 Insiku zyonti, uvhusiku nu musanya, ahazyunguulaga ku mbiipa na mu magamba, ahahoolaga inkoolo iya halanga, havhili ahayivholanyaaga na mavhwe.
6 Lwe amulola uYeesu ukutali, ahamushimbiilila, nu kumusugamilila. 7-8 Woope uYeesu ahayivhuuzya ahati, “We mpepo inkadamanu, fuma mwa muntu uno!” Umuntu ula ahazuma ahalanga ahapiti ahati, “Nkunanjiiye shooni iwe Yeesu, we mwana wa Mulungu umupiti we ali kumwanya? Nkukulaavha nkaani kwi zina ilya Mulungu utahanjimvwe!” 9 UYeesu ahamuvhuziilizya ahati, “Izina lyaho we naanu?” Ahati, “Izina lyane ne Mpuga, mwe pe twe vhinji.” 10 Pe impepo ziila zihamulaavha nkaani uYeesu kuuti, atahazishimbizizye ukutali ni nsi yiila.
11 Pe vháamile páali igamba, pi gamba ilyo páamile impuga impiti iya nguluvhe, zyámile pi diimilo. 12 Impepo zihamulaavha uYeesu, zihati, “Twitishizye twinjile mu nguluvhe.” 13 Pe ahazyitishizya. Zihafuma mwa muntu ula, zihinjila mu nguluvhe. Impuga yonti iya nguluvhe elufu mbiili zihiiha mwi gamba nu kushimbiilila mwa sumbi, zihadwivha mu minzi nu kufwa.
14 Avhadiimi avha nguluvhe vhahashimbila kusogola kuvhavhuuzya mu nkaaya na mu magunda. Avhantu vhahasogola kwenya zye zivhombesile. 15 Vhahamwaga uYeesu nu kumulola ula we ali ni mpepo inkandamanu, atendiime azwaye amenda, havhili áali ni njeele zyonti. Vhoope vhahoogopa nkaani. 16 Vhe vhásimishiziizye vhahavhapanjila avhanji zyonti zye zyámwazile uwa mpepo inkandamanu, na zye zyázyazile inguluvhe. 17 Pe vhahamulaavha uYeesu ayeepe mu nsi yaavho.
18 Lwe uYeesu akwinjila mwi vhooti, umuntu ula we áamile ni mpepo inkandamanu ahamulaavha asogole nawo. 19 Ileelo uYeesu ahamugalusya ahati, “Sogoola uvhapanjile avhantu avha kumwinyu, imbombo zyonti zye .UMWENE akuvhombela na vwe akulolela uvhwila na vwe akwavwa.” 20 Aheepa, ahataliha kuvhapanjila avhantu mu ntala izya Dekapolib imbombo impiti zye uYeesu ámuvhombeeye. Avhantu vhonti vhahasukumila nkaani.
UYeesu akumuzyusya umwana wa Yaayili nu kumuponia umwantanda wumo
(Mataayi 9:18-26; Luuka 8:40-56)
21 Havhili uYeesu na vhasundikwa vhaakwe vhahalamba usumbi kugaluha kwisyila, avhantu avhinji vhahamuvhungatila pe paala paluvhazu pa sumbi. 22 Umuntu wumo umupiti uwa isinagoogi izina lyakwe áali wu Yaayili, ahinza kwa Yeesu, ahamusugamilila. 23 Ahamulaavha nkaani ahati, “Umwana waane umulindu akwanza kufwa, nkukulaavha uyinze, umuvhiishile inyoovhe yaaho apone, atahaafwe.” 24 UYeesu ahasogola pooka nawo, impuga impiti iya vhantu yihamulandata nu kumuviganya nkaani.
25 Páamile umwantanda wumo pa mpuga yiila, áamile nu vhuvhinu uwa kufuma amavhanda ku maaha kumi na mbiili. 26 Umwantanda uyo áamile na mayimba, ahajendaga ku vhaganga avhinji nu kufumwa ivwuma vwonti. Ileelo kutamwaviizye naashimo, ájendeleeye kuvhina nkaani. 27 Ázyivuuye imbombo izya Yeesu, ahakwenkwenya pa mpuga ya vhantu. Ahasogola ku nsinzi iya Yeesu, 28 mwe pe ásivhiliiye kuuti, “Inga napalamansya umwenda waakwe vhweleele, kwe impone.” Ahapalamansya umwenda wa Yeesu, 29 pe paala amavhanda gaakwe ge gahafumaga gahuuma, ahayimanya kuuti uvhuvhinu vhwakwe vhwepa.
30 UYeesu ahamanya pe paala kuuti amaha gaakwe gamo aga kuponia gamwepa. Ahagalunkana aheenya imbazu zyonti, ahati, “Wu naanu we apalamansya amenda gaane?” 31 Avhasundikwa vhaakwe vhahati, “Ukulola impuga vwe yituvigiinye. Tutangaamanya wu naanu we akupalamansya.” 32 Ileelo uweene ahatalanganya kwonti amwenye we ámupalamansiizye. 33 Umwantanda ula ilyoga lihamulema, ahanda kutetema mwe pe ámanyile kuuti kwe amanyishe. Ahinza, ahamusugamilila uYeesu nu kumupanjila zyonti zye zihamuyimvwaga na vwe aapona. 34 UYeesu ahati, “Nakuponia mwe pe uli nu lwitiho, sogoola ku kwaho ahinza, utahaavhine havhili.”
35 Lwe akuyanga nu mwantanda ula, vhahinza avhantu kufuma kwa Yaayili, vhahati, “Yaayili, umwana waaho umulindu afuuye, utamugulililaje umusambiilizi.” 36 Pe uYeesu lwe ayiivwa vwe vhakuyanga, ahamuvhuuzya uYaayili ahati, “Utogopaje, suvhilaga vhweleele.” 37 UYeesu ahavhahaana avhantu avhanji kumulandata, nkandi uPeeteli nu Yaakobu nu Yoohani umunine uwa Yaakobu. 38 Lwe vhaafiha mu nyumba iya Yaayili, vhahaaga avhantu vhakuloosya, nu kukuuta shaaha. 39 UYeesu ahati, “Shooni she mukuzuma ahalanga nu kuloosya? Umulindu atafuuye, akaasite vhweleele.” 40 Vhahamuseha nkaani uYeesu, ileeo uweene ahavhafumwa panzi vhonti. Ahamunyatula uyise wa mulindu nu nyina, na vhaala avhasundikwa vhatatu, ahinjila navho kwi ziho kwe umulindu áamile. 41 Ahamulema inyoovhe umulindu, ahati, “Taalita kumi,” c kwe kuuti, “Mulindu, nkukuvhuuzya, damuuha.” 42 Pe paala ahadaamuha nu kwimiilila, ahataliha kujenda. Umulindu ula áamile na maaha kumi na mbiili. Avhapaafi vhahasukumila nkaani. 43 Ileelo uYeesu ahavhalajizya nkaani kuuti vhatahamuvhuuzye naawumo ge gavhombesile paala. Ahavhavhuuzya kuuti vhamupe ishaakulya umulindu ula.