4
UYeesu akusambiilizya ishiholanyo isha muntu we akupesa imbeyu
(Mataayi 13:1-9; Luuka 8:4-8)
1 UYeesu ahataliha kusambiilizya lwe ali muluvhazu mwa sumbi. Ivhungaana ipiti nkaani lihamuvhungatila, pe uweene ahinjila mwi vhooti, ahatendama mwe muula, inga avhe nu vhuzilo uvhwa kusambiilizya avhantu vhe vháali ku nsi inyuumu. 2 Ahavhasambiilizya aminji ku viholanyo, ahati, 3 “Tejeelezyi! Umulimi wumo ásogooye kupesa imbeyu mu mugunda waakwe. 4 Lwe akupesa imbeyu, zimo zihagwila paluvhazu pi dala, inyunyi zihasevha nu kulya. 5 Izyamwavho zihagwila pi yalaawe pe patáamile intope inyinji, izyene zihamela naluvhiilo mwe pe patáamile intope inyinji. 6 Lwe izuvha lyalama nkaani zihapwa, mwe zitáamile na mazi aminji zihuuma. 7 Izyamwavho zihagwila pahati pa mimvwa, lwe zikumela amimvwa gahazibuda, zitaheela naazimo. 8 Izyamwavho zihagwila pa ntope inyinza, ziheela. Imbeyu yimo yihapaapa selasini, yimo yihapaapa imbeyu sitini, iyamwavho yihapaapa imbeyu miya.” 9 Havhili ahati, “We ali na makutwi, atejeelezye!”
UYeesu akulovhoosya ishiholanyo isha we akupesa imbeyu
(Mataayi 13:10-23; Luuka 8:9-15)
10 UYeesu na vhasundikwa vhaakwe pooka na vhantu vhe vhahamulandataga vhahasogola ku kwilu. Vhahamulaavha kuuti avhalovhoosezye iviholanyo vwakwe. 11 Uweene ahavhavhuuzya ahati, “Imwe mulosiitwe kuzimanya izya ku kwilu izya vhumwene uvhwa Mulungu, ileelo avhanji kwe imbasambilizyaje ku viholanyo, 12 nkuvhomba isho kuuti:
‘Inga vhe vhakwenya vhenyaaje,
ileelo vhatalolaje,
havhili inga vhakwivwa vhivwaje,
ileelo vhatamanyaje.
Vhatahinze vhapindushe nu kuswilwa.’”a
13 Pe uYeesu ahati, “Mutashimanyile ishiholanyo ishi? Iviholanyo ivinji mungavimanya vhuli? 14 We akupesa imbeyu we wula we akusambiilizya aMazwi aMinza. 15 Imbeyu zye zyágwiliiye paluvhazu pi dala, mazwi aminza ge avhantu vhakugiivwa, ileelo naluvhiilo uSetano akwefwa amazwi igo kufuma mu mooyo gaavho.
16 “Imbeyu zye zyávhwaliilwe pi yalaawe, mazwi aminza ge avhantu vhakugiivwa nu kugaposheela ku luseshelo, 17 ileelo amazwi igo gatahinjila muhati nkaani mu mooyo gaavho, vhakujimbiilila hansi vhweleele. Inga vhaloleha avhantu avha kuvhayimvwa ku mazwi igo nu kuvhahatamfwa, vhakuleha kugiitiha. 18 Zye zyávhwaliilwe pa mimvwa, mazwi ge avhantu vhakugiivwa, 19 ileelo vhakuyimbila uvhupuuma vhwavho, vhakutepushila mu vwuma, nu lugulumwo ulwa vintu ivwinji, lukuvhinjila nu kuvhadindila vhatakulaje mu lwitiho. 20 Imbeyu zye zyávhwaliilwe pa ntope inyinza, ge mazwi ge avhantu vhakugiivwa nu kugaposheela. Ivho vhe vhantu vhe vhakupaapa amantonongwa aga maata aminza. Vhamo selasini, avhamwavho sitini, avhamwavho miya.”
UYeesu akusambiilizya kutejeelezya ahinza
(Luuka 8:16-18)
21 UYeesu ahajendeelela kuvhasambiilizya avhantu ahati, “Uluhozyo lukwanzilwa kuluvhiiha pamwanya te kulugubishila. 22 Shonti she shizyihiime shilivundulwa, havhili shonti she vhágubishiiye shiligubulwa. 23 Umuntu we ali na makutwi atejeelezye!” 24 Ahonjezya kuvhavhuuzya kuuti, “Mutejelezyaje ahinza zye mukwivwa. Vwe mukuyifumwa kutejeelezya, vwe kwe mumanyaje ahinza, nu kwonjezelwa. 25 Vhe vhakuyifumwa nkaani kutejeelezya vhe kwe vhapelwaje kumanya nkaani, ileelo vhe vhatakutejeelezya, na hansi he vhahamanyile kwe vhafulwaje.”
UYeesu akusambiilizya ishiholanyo isha mbeyu ye yikumela
26 Havhili ahati, “Uvhumwene uvhwa Mulungu vhuli inza ishi. Umuntu vhumo ápesile imbeyu mu mugunda. 27 Ahakaataga twe tulo nu kudaamuha, atámanyile imbeyu vwe yikumela nu kukula. 28 Mwe pe intope yikupaapisya yiiyo yeeka, likutaliha intooga, likulandata ipelele, pisinda ingana. 29 Inga vwela pe akunyatula ishikwakwa nu kutaliha kuvuna.”
UYeesu akusambiilizya ishiholanyo isha mbeyu iya muzimwa
(Mataayi 13:31-32, 34; Luuka 13:18-19)
30 UYeesu ahajendeelela kuyanga ahati, “Uvhumwene uvhwa Mulungu havhili vhuli inza ishi. 31 Vhuholiine na vwe ulusanga ulwa muzimwa lukumela. She lunsi kuluusya imbeyu izinji, 32 inga lwavhwalwa lukukula, lukutalimpa kuluusya iviyavho ivinji vwe vikuvhwalwa. Lukwima ni nsamba impiti, ni nyunyi zikutenjela ivisanzo mweneemwo.”
33 UYeesu ahavhasambilizyaga avhantu ku viholanyo ivinji inza ivi, kulandatana na vwe vhahatejelezyaga. 34 Atahavhasambilizyaga ishisita shiholanyo, ileelo lwe ayiima weeka na vhasundikwa vhaakwe ahavhavundulilaga zyonti.
UYeesu akwimiliha inkungu
(Mataayi 8:23-27; Luuka 8:22-25)
35 Isiku lye liila hamazuuvha, uYeesu ahavhavhuuzya avhasundikwa vhaakwe ahati, “Tulambe kwisyila ilya sumbi.” 36 Vhahalileha ivhungaana, vhaheepa ni vhooti she uYeesu ali mwe muula. Amavhooti aganji gahalongozanya pooka navho. 37 Lwe vhakujendeelela nu vhulendo kuhinza inkungu impiti, amavhilingwa gahanda kunyamfushila mwi vhooti na minzi gahinjila nu kwizula muumwo.
38 Uweene uYeesu ápezile akaasite utulo muhati kwisinda mwi vhooti pa nsagamilo. Avhasundikwa vhaakwe vhahamudaamusya vhahati, “Musambiilizi, twavwe tukufwa.” 39 Ahadaamuha, ahayihajila inkungu nu kumuvhuuzya usumbi kuuti, “Puuma!” Pe paala inkungu yihaleha kuvugula, usumbi ahapuuma mwa! 40 UYeesu ahavhavhuuzya avhasundikwa vhaakwe ahati, “Shooni she mukwogopa? Mutali nu lwitiho niishi?” 41 Vhahoogopa nkaani, vhahavhuuzanya vhahati, “Wu naanu uno we poosye usumbi ni nkungu vikumshindiha?”